Сабиигъуэ зымылъэгъуахэр

«Зауэм и бынхэр» жылагъуэ зэгухьэныгъэм и къудамэу Аруан щIыналъэм щыIэм и унафэщI Джатокъуэ Казбек иригъэ­кIуэкIа зэIущIэм къы­щапщы­тэжащ илъэс блэкIам зых­уагъэувыжа къалэнхэм ­ящы­щу зэфIагъэкIамрэ ды­зы­техьа илъэсым зэлэжьы­нумрэ. 

ЗэIущIэм хэтахэр Джато­къуэм щигъэгъуэзащ нэгъабэ яхузэфIэкIахэм. 
- Гъэ блэкIам къриубыдэу ­плIэ едгъэкIуэкIащ правле-нэм и зэ­хыхьэ.  Курыт еджапIэхэмрэ щэнхабзэмкIэ унэ­хэмрэ зыдэ­д­гъэIэпыкъуурэ, зэхыхьэ 30-м нэс къызэдгъэ­пэщащ. Дэ зэи тщыгъупщэ мыхъун Iуэхущ ди нэхъы­жьыфIу фIыр зи Iэужьхэм а лъэхъэнэ хьэлъэм ягъэва бэлыхьымрэ яшэча хьэза­-бым­рэ зыхуэдэр. Школхэмрэ щэнхабзэмкIэ унэмрэ зэIу- щIэ дахэхэр къыщызэдгъэ­пэщурэ, нэхъыжьхэм я нэгу зедгъэужьащ, «Зауэм и бынхэр» зытет ме­далхэри абдеж щахэтлъхьащ. Нэхъыжьхэм я гукъэкIыжхэм, ягъэва бэлы­хьым щагъэгъуэзащ абы­хэм яхуэдгъэза ныбжьы­щIэхэр. Хэкур фIыуэ лъа­гъуным, ущие гуапэм дерс ­къыхахыным, ныбжьэгъугъэр ягъэ­пэ­жы­ным, зэкъуэту псэу­ным - ахэ­ращ­ нэхъыжьхэр зы­теп­сэ­лъ­ы­хьар.
ЗэIущIэм къэкIуэну зи къару къимыхьа нэхъыжьхэм я унэм дыкIуэурэ медалхэр тыгъэ яхуэт­щIащ, я къуэрылъху-пхъу­рылъхухэр щыту, абыхэм ялъагъур я гум къинэн папщIэ. Ахэр зыуэ щогуфIыкI а тIэкIуми, пхуэ­мыIуэтэщIыным хуэдизщ. Мис апхуэдэу, зы мащIэкIэ нэхъ мыхъуми, я гум дедэхэщIэну, абыхэм ятелъа гугъуехьыр зэ­рытщымыгъупщар зыхедгъэ­щIэ­ну дэ псоми ди къалэнщ! 
Гъэ дызытехьам Хэку зауэшхуэр зэриухрэ илъэс 80 зэрырикъур Iэтауэ дгъэлъэпIэну ди мурадщи, Iуэхум хэтыну гупыж зыщIхэр фыкъыдогъэблагъэ, - жиIащ Джато­къуэм.  
АдэкIэ къэпсэлъэщ Компартым и район къудамэм и япэ ­секретарь Къардэн Мурадин. 
- Ину фIыщIэ фхузощI «Зауэм и бынхэр» жылагъуэ зэгухьэ­ныгъэм хэтхэмрэ зыкъыф­щIэ­зыгъакъуахэмрэ! Дэ псоми ди къалэнщ нэхъыжьхэм я гур хэзыгъахъуэ зэхыхьэ гуапэхэр нэхъыбэрэ къызэдгъэпэщыну, абыхэм сабиигъуэ, щIалэгъуэ зэрамыIар зэрытщIэр, лейуи фIыщIэ зэрахуэтщIыр нэры­лъагъу ящытщIын папщIэ. Ди нэхъыжьхэм я псалъэ зэхэзых нэхъыщIэхэм ар ягу зэримыхунум шэч къытесхьэркъым. Ды­зэрыхьа илъэсым ТекIуэныгъэм и махуэшхуэр илъэс 80 зэрырикъур дэнэ щIыпIи щагъэлъэпIэнущ. Дэ ди къалэнщ а Iуэхугъуэр зыхуей хуэзэу ­къы­зэдгъэпэщыну, щIэблэр хэ­куп­сэу дгъэсэну, къызыхэкIа лъэп­къыр ящIэжу, тхыдэм пщIэ хуащIу къэхъун папщIэ, - жиIащ абы. 
ЗэIущIэм и кIэухым, «Зауэм и бынхэр» жылагъуэ зэгухьэ­ныгъэм хэтхэм щыщу лэжьыгъэм къыхэжаныкIахэмрэ дэIэ­пы­къуэ­гъу къахуэхъуахэмрэ Джатокъуэм яритащ щIыхь тхылъ­хэмрэ фэеплъ медалхэмрэ.         
  Тхыгъэри сурэтри
КЪАНКЪУЛ Зазий ейщ.