Iэмал псори яIэщ

КъБР-м узыншагъэр хъумэнымкIэ и ми­нистр Къалэбатэ Рустам щыIащ Къэбэр­дей-Балъкъэр къэрал университетым и Медици- нэ академием лэжьыгъэм щыхагъэгъуазэ и центрым. Абы зригъэлъэгъуащ IэнатIэм лэ­жьыгъэр зэрыщызэтеублар, ар къызэрызэгъэпэща Iэмэпсымэхэм я зэфIэкIыр игъэу­нэхуащ, Медицинэ академием и студентхэм- рэ ординаторхэмрэ лэжьыгъэ и пIалъэ зэращIэм зыщигъэгъуэзащ.

- Центрым и къалэн нэхъыщхьэр, иджырей егъэджэныгъэ-медицинэ технологием и унэ­­-тIыныгъэхэр къагъэсэбэпкIэрэ, дохутырхэмрэ курыт медицинэ IэщIагъэлIхэмрэ Iуэхум щы­хуагъэхьэзыркIэ лэжьыгъэм нэхъ куууэ хэгъэ­гъуэзэнырщ. Ар къызэгъэпэщащ Iэмэпсымэ, компьютер техникэ зэхуэмыдэхэмкIэ. ЖыпIэнурамэ, эндоскопие хирургием, анестезиологием, реаниматологием, акушерствэмрэ гинеколо­гиемрэ, травматологием, нэгъуэщI унэтIыныгъэхэмкIи сымаджэм и узыншагъэр къызэрып­пщы­тэным, абы узэреIэзэну щIыкIэм хуэщIауэ центрым и егъэджэныгъэ пэшхэр узэдащ, - жиIащ Медицинэ академием и унафэщI Ми-    зиев Исмэхьил.
Министрым къыхигъэщащ центрым и лэ­жьыгъэр сыткIи тэмэму къызэрызэгъэпэщар, дохутыр IэщIагъэм хуеджэхэм я щIэныгъэм, зэфIэкIым хагъэхъуэну гупыж яIэххэмэ, Iэмал псори абдеж зэрыщаIэр. Апхуэдэу Къалэбатэмрэ Мизиевымрэ тепсэлъыхьащ медицинэ IуэхущIапIэхэм я IэщIагъэлIхэм я Iэзагъэм академием ЩIэныгъэ гуэдзэн щрагъэгъуэт и ­центрым щыхагъэхъуэным теухуауэ Iуэхур зэ-ры­зэт­раублэнум. Псалъэмакъым къызэрыхэщамкIэ, ар щхьэпэ хъунущ унэтIыныгъэ хэхам ирилажьэ дохутырхэм икIэщIыпIэкIэ дэIэпыкъу­ныгъэ хуэныкъуэ сымаджэхэм и чэзум сэбэп зэрахуэхъуфыну Iэмалхэр яIэщIэмыхужынымкIэ.
- ЦIыхухэм ягъуэт медицинэ дэIэпыкъуныгъэр ирагъэфIэкIуэн папщIэ IэщIагъэлIхэм я щIэныгъэм хэгъэхъуэныр Iуэхум и хэкIыпIэ нэхъыщхьэхэм ящыщ зыщ, - жиIащ министрым.
ЩхьэщэмыщI Изэ.