ЩIыпIэхэр ягъэдахэ

2019 - 2023 гъэхэм къриубыдэу Къэбэрдей-Балъкъэрым зэIузэпэщ щащIащ, зыхуей щыхуагъэзащ цIыхухэр куэду щызэхуэс щIыпIэу 169-рэ, фэтэр куэду зэхэт унэхэм я пщIантIэу 571-рэ, абыхэм ящыщу 47-р - утыкушхуэу, 38-р - жыг хадэ цIыкIуу, 19-р - паркыу, езыхэм къэкIыгъэхэр щыкуэду, сабий, спорт джэгупIэфIхэмкIэ къызэгъэпэщауэ.

БлэкIа илъэсри абыхэм къакIэрыхуакъым. Псалъэм къыдэкIуэу, щIыналъэм и жылэ 31-м цIыху куэд щызэхуэс я щIыпIэу 31-рэ, фэтэр куэду зэхэт унэхэм я пщIантIэу 31-рэ ягъэтэмэмащ.

Мы гъэм мурад щыIэщ республикэм цIыхухэр куэду щызэхуэс и щIыпIэхэм ящыщу 38-р зыхуей хуагъэзэну. Ауэ а бжыгъэм иджыри зихъуэжынущ икIи псори зэхэту лэжьыгъэхэр щрагъэкIуэкIыну щIыпIэхэр зэрыхъунур наIуэ къыщыхъунур дызыхыхьа илъэсым и етIуанэ мазищырщ.

ЗэкIэ къыхаха щыпIэ 38-м ящыщу 8-р къэзыгъэлъэгъуар республикэм щыпсэухэрщ. Ахэр хэтащ щIыпIэхэр зэIузэпэщ щIыным ехьэлIауэ интернеткIэ ирагъэкIуэкIа урысейпсо IэIэтым.

Абы нэмыщI, Урысейпсо зэхьэзэхуэм щытекIуа «Псым IэплIэ къуешэкI» пэхуэщIэр Шэджэм къалэм щыгъэзэщIэным яужь ихьэну я мурадщ.

Республикэм дэтхэнэ щIыпIэми сыт хуэдэ лэжьыгъэ мы гъэм щрагъэкIуэкIынуми, абы ехьэлIауэ IэIэтым фыхэтыну фыхуеймэ, абы теухуа хъыбархэр псори къыщыфхуэщIэнущ мы адресымкIэ https://pos.gosuslugi.ru/lkp/fkgs/offer/. Апхуэдэуи фи Iуэху еплъыкIэхэр абы къыщыжыфIэ хъунущ щIышылэм и 15-м щегъэжьауэ мазаем и 28-м пщIондэ.