Мелуани 6,5-м щIегъу

Хьэрычэт IэнатIэ

УФ-м и хьэрычэт IэнатIэ мыинымрэ курытымрэ (МСП) хэтхэм я бжыгъэр, 2016 гъэм ахэр тхын зэрыщIадзэрэ, мы гъэм мелуани 6,59-рэ хъуащ.

МСП-м и реестрым къызэрыщыгъэлъэгъуамкIэ, Къэбэрдей-Балъкъэрым и хьэрычэт IэнатIэ мыинымрэ курытымрэ я бжыгъэр 2024 гъэм мин 22,6-рэ хъуащ. БлэкIа илъэсми я щхьэ хуэлэжьэжхэрэ уней IуэхущIапIэу щIыналъэм щIэуэ щатхащ 5786-рэ икIи къапщытэж пIалъэм къриубыдэу абыхэм щылэжьащ цIыху мини 108,7-рэ е республикэм IэнатIэ щыпэрыт и цIыхухэм я процент 34-р.

Къэрал псор къэбгъэлъагъуэмэ, 2024 гъэм хьэрычэт IэнатIэ мыинымрэ курытымрэ ику иту хэхъуэу къатам щыщу сом триллион 1,7-р IэнатIэ цIыкIухэм яйщ, хьэрычэт мыиным - триллион 0,6-рэ, хьэрычэт курытым - триллион 0,2-рэ. Зы IэнатIэм къылъысу хэхъуэу иIэр процент 11,2-кIэ нэхъыбэ хъуащ икIи, илъэс пIалъэкIэ къэбгъэлъагъуэмэ, щыIэ инфляцэм ар щхьэдэхащ.