КъБР-м и Iэтащхьэ КIуэкIуэ Казбек яхуэзащ республикэм лэжьыгъэ IуэхукIэ къэкIуа, ЩIалэгъуалэ IуэхухэмкIэ федеральнэ агентствэм и унафэщI Гуров Григорийрэ «Пэрытхэм я зэщIэхъееныгъэ» урысейпсо жылагъуэ-къэрал зэгухьэныгъэм и правленэм и тхьэмадэ Орлов Артуррэ. ЗэIущIэм хэтащ КъБР-м щIалэгъуалэм я IуэхухэмкIэ и министр Лу Азэмэт.
КIуэкIуэ Казбек хьэщIэхэм фIыщIэ яхуищIащ ди республикэм къыхуащI гулъытэм, «ЩIалэгъуалэм я щIыналъэ» къэрал программэмкIэ жэрдэм къыхалъхьэхэр зэрыдаIыгъым папщIэ. Мазэ ипэкIэ, Москва щыщызэIущIам, республикэм и Iэтащхьэм щIалэгъуалэ IуэхухэмкIэ унафэщIхэр Къэбэрдей-Балъкъэрым къригъэблэгъат.
АдэкIэ зэрызэдэлэжьэнум и гугъу щащIым, КIуэкIуэ Казбек жиIащ иджырей зэIущIэр щIалэгъуалэ политикэм щIыналъэм зыщиужьынымкIэ сэбэп зэрыхъунур. Республикэм и Iэтащхьэм къыхигъэщащ къэрал проектхэм я Iыхьэ щхьэхуэхэр щагъэзащIэкIэ Iуэхур щыдахын утыкурэ волонтер дэIэпыкъуныгъэкIэ зэрызыщIагъэкъуэфынур.
Апхуэдэу тепсэлъыхьащ социальнэ мыхьэнэ зиIэ проектхэр зэрагъэзэщIэнум, щIалэгъуалэм зэрадэлэжьэнум теухуа унэтIыныгъэ нэхъыщхьэхэм. Гулъытэ щхьэхуэ хуащIащ волонтер зэщIэхъееныгъэм зэрызрагъэужьынум, щIалэгъуалэр зэрыщIэнымкIэ щыIэ хэкIыпIэхэм, апхуэдэуи лъэпкъ лъапIэныгъэр гъэбыдэнымкIэ унагъуэ туризмэм и мыхьэнэм. АбыхэмкIэ сэбэп хъунущ щIыналъэм къыщызэIуах щIалэгъуалэ центрхэр.
Гуров Григорий сабийхэмрэ щIалэгъуалэмрэ яхуэгъэзауэ щIыналъэм лэжьыгъэ купщIафIэ зэрыщрагъэкIуэкIыр жиIащ, абыхэм ядэлэжьэн IэщIагъэлIхэр гъэхьэзырынымрэ щIыналъэхэм центрхэр къызэрыщызэIуахымрэ Iуэхум къыхилъытэу.
Хэкум и ХъумакIуэм и илъэсым нэхъыбэу трагъэщIэнущ дзэ-хэкупсэ проектхэм – «ЛIыхъужьхэм я щIэблэр», «Зарница 2.0.». Хэку зауэшхуэр зэриухрэ илъэс 80 зэрырикъур зэрагъэлъэпIэнум зыхуэгъэхьэзырын щIадзащ. ТекIуэныгъэм и волонтерхэм жыджэру ирагъэкIуэкI а лъэхъэнэм Къэбэрдей-Балъкъэрым и щIыналъэм щекIуэкIа лIыхъужьыгъэ, гукъутэ къэхъугъэхэм я тхыдэ фэеплъыр хъумэным хуэунэтIа лэжьыгъэхэр. ЩIалэгъуалэм я унэтIакIуэу щытынущ дзэ Iуэху хэхам и ветеранхэр.
