ЗыхуэунэтIар псэукIэр егъэфIэкIуэнырщ

УФ-м и Къэрал советым щекIуэкIа, «ГъащIэм папщIэ инфраструктура» проектыр гъэзэщIэнымкIэ комиссэм и зэIущIэм КъБР-м и Iэтащхьэ КIуэкIуэ Казбек видеоконференц IэмалкIэ хэтащ. 

Къэрал Советым и секретарь, УФ-м и Президентым и дэIэпыкъуэгъу Дюмин Алексей хэту, зэIущIэр иригъэкIуэ-кIащ Тэтэрстаным и Раис Минниханов Рустам. Абы къы­щыпсэлъащ Правительствэм и вице-премьер Хуснуллин Марат. 
Къызэхуэсахэр тепсэлъыхьащ псэукIэр тынш икIи шына­гъуэншэ щIыным хуэунэтIа къалэнхэм, ухуэныгъэм, псэу­пIэ-коммунальнэ хозяйствэм, транспортым и инфраструкту- рэм щызэфIэхыпхъэ Iуэхухэм. Щхьэхуэу и гугъу ящIащ къа-лэ цIыкIухэм псэукIэр зэрыщегъэфIэкIуапхъэм. 
ЗэIущIэр иуха нэужь, КIуэкIуэ Казбек и телеграм каналым кърилъхьащ гу нэхъ зылъытапхъэ лъэныкъуэхэм елъытауэ, екIуэкI илъэсым къигъэув къалэнхэр. Къэбэрдей-Балъкъэрым «Коммунальнэ инфраструктурэр къэгъэ­щIэ­рэ­щIэжын» къэрал проектым ипкъ иткIэ дызэрыт илъэ­сым псы зэбгрызыш объект 20-м щелэжьынущ. Лэжьыгъэхэм я нэхъыбэр илъэсыр и кIэм нэмысу зэфIэкIынущ. УФ-м и Правительствэм и УнафэщI Мишустин Михаил арэзы зыте­хъуа  проектым и фIыгъэкIэ, Налшык къалэм псы къэзышэ Iэмэпсымэхэмрэ ар зэрагъэкъабзэхэмрэ щIэкIэ щызэра­хъуэкIынущ. Лэжьыгъэхэр 2025 - 2027 гъэхэм къриубыдэу яухыну я мурадщ. 
ЦIыхубэ зэхуэсыпIэхэр зыхуей хуэгъэзэным 2025 гъэм ­хуаутIыпщынущ сом мелуан 261-рэ. «Псыежэхым IэплIэ къыпхуещI» урысейпсо проектым зэрыщытекIуам щхьэкIэ, Шэджэм къалэм сом мелуани 105-рэ къыхуаутIыпщынущ, а лэжьыгъэри хуэгъэпсащ къалэм ущыпсэуныр нэхъ тынш щIыным. 
«ПсэупIэ» щIыналъэ проектымкIэ 2025 гъэм метр зэб­гъузэнатIэ мин 570-м нэс ятынущ. ЩIышылэм къриубыдэу, метр зэбгъузэнатIэ мин 78,6-рэ яутIыпщакIэщ, ар 2024 гъэм елъытауэ 1,7-кIэ нэхъыбэщ. Уней ухуакIуэхэм унэу 560-рэ ящIащ. 
Гъуэгу хозяйствэм щIыналъэ проектищ щолажьэ: «ЩIы­налъэмрэ щIыпIэмрэ я гъуэгухэр», «ЗекIуэкIэ шына­гъуэншэ», «Гъуэгу хозяйствэм зэрызегъэужьыпхъэ Iэмалхэр». ДяпэкIи зыхуей хуагъэзэнущ автомобиль гъуэгухэр, лъэ­мыжхэр, цIыху зэпрыкIыпIэхэр, къэувыIэпIэхэр, къи­нэмыщIхэр. 
«А лэжьыгъэ псори зыхуэунэтIар республикэм щыпсэухэм я гъащIэр ефIэкIуэнырщ», - итхащ КIуэкIуэ Казбек.