Экономикэр езыгъэфIакIуэхэр

Къэбэрдей-Балъкъэрым Экономикэ зыужьыныгъэмкIэ и министерствэм щекIуэкIащ пэхуэщIэ проект «ехьэжьахэр» щIыналъэм зэрыщагъэзащIэм теухуа зэIущIэ. Абы хэтащ КъБР-м экономикэ зыужьыныгъэмкIэ и министр Рахаев Борис, Кавказ.­РФ-м, «КъБР-м корпорацэ зыужьыныгъэмкIэ и IуэхущIапIэм» я лIыкIуэхэр, щIыпIэ министерствэхэм я лэжьакIуэхэр, Iуэхур зэхьэлIа IэнатIэм щыщ нэгъуэщIхэри. 

Къыхэдгъэщынщи, пэхуэщIэ «ехьэжьахэм» хыхьэу респуб­ликэм иджыпсту 6 щагъэзащIэ, псори зэхэту сом меларди 170-м щIигъу я уасэу. Ахэр: экологие и лъэныкъуэкIэ бэдрэжан къабзэхэр къыщагъэкI «Шэджэм Агро» хуабэщырщ, Тырныауз вольфрамрэ молибденрэ къызыщIах щIыпIэр лажьэу егъэжьэжынырщ, илъэс хъурейкIэ зыщыбгъэпсэху хъу «Iуащхьэмахуэ» турист-рекреацэ комплексырщ, Налшык и «Мей», «КъуэкIыпIэ» хьэблэщIэхэр зэIузэпэщ щIынырщ, Бахъсэн Ипщэм и ГЭС-мрэ Информацэ-технологие паркыр - технологие ехьэжьахэмкIэ паркыр ухуэнхэрщ.
Кавказ Ищхъэрэм хыхьэхэм щыщу Урысей Федерацэм и щIыналъэхэм социально-экономикэ зыужьыныгъэхэр егъэгъуэтыным ехьэлIауэ щыIэ программэм ипкъ иткIэ къыхахащ иджырей пэхуэщIэхэр. Рахаев Борис зэIущIэм къызэрыхигъэщамкIи, пэхуэ­щIэ «ехьэжьахэр» щIыналъэм шыгъэзэщIэным кърикIуэу республикэм и социально-экономикэ щытыкIэр зэрефIэкIуэным и мызакъуэу абыхэм псоми лIэжьыгъэ IэнатIэщIэхэр ди цIыхухэм къыщызэхуIуахыныщ, лэжьапIэншэхэм я бжыгъэри нэхъ ­мащIэ­­ хъу­нущ.