Лъэпкъ экономикэр зыгъэбыдэхэр

Илъэсым и экспортер

«2024 гъэм и экспортер» урысейпсо зэхьэзэхуэм и щIыналъэ Iыхьэу Къэбэрдей-Балъкъэрым нэгъабэ щрагъэкIуэкIам кърикIуахэр наIуэ къащIащ иджыблагъэ. Ар илъэс къэс зэхашэ «Дунейпсо кооперацэмрэ экспортымрэ», «Зэхьэзэхуэр зи лъабжьэ экономикэ лъэщ» лъэпкъ пэхуэщIэхэм япкъ иткIэ. Къызэзыгъэпэщыр, хабзэ зэрыхъуауэ, КъБР-м «Си хьэрычэт IэнатIэ» и центрыращ, КъБР-м Экономикэ зыужьыныгъэмкIэ и министерствэр къыдэIэпыкъуу.
ЕрыскъыхэкIхэм елэжьхэм ящыщу 2004 гъэм и экспортер нэхъыфIу къалъытащ «Налшык-IэфIыкIэ» IуэхущIапIэр. Мэкъумэш-промышленнэ IэнатIэм щылажьэхэм я деж «Отбор»-р щытекIуащ. Республикэм и промышленностым и IэнатIэхэм ящыщу зэхьэзэхуэм хэтахэм «Тэрчналмэс» заводыр япэ хъуащ. Псом нэхърэ нэхъыфIу нэгъабэ зызыужьа IуэхущIапIэу къалъытащ «Империал»-р. «ЦIыхубз экспортер нэхъыфI» зэхьэзэхуэм щытекIуащ «Эльбрус К», «Фрукт сити» IуэхущIапIэхэм я унафэщIхэр. Иджырей технологие ехьэжьахэр къэзыгъэсэбэпхэм я деж «Антиград»-м япэ увыпIэр къихьащ. 
Фигу къэдгъэкIыжынщи, нэгъабэрей зэхьэзэхуэм республикэм и IуэхущIапIэ 20 ирагъэблэгъащ икIи ахэр лIэужьыгъуихыу гуэша зэпеуэхэм хэтащ. КъэпщытакIуэхэм зэпалъытащ 2024 гъэм щIышылэм и 1-м къыщыщIэдзауэ дыгъэгъазэм и 31-м нэсыху абыхэм яIа зэфIэкIхэмрэ къагъэлъэгъуа хэхъуэхэмрэ. 
«Урысей Федерацэм и продукцэхэр хамэ къэралхэм щыпхыгъэкIынымкIэ, я фIагъкIэ абыхэм яйхэми къакIэрымыхуу, лъэпкъ экономикэр гъэбыдэнымкIэ экспортерхэм нэгъабэ ирагъэкIуэкIа лэжьыгъэхэм хуэфащэ пщIэ къэралым зэрахуищIам и дамыгъэщ мы саугъэтыр», - щыжаIащ КъБР-м «Си хьэрычэт IэнатIэ» и центрым.