ЛэжьапIэншэхэм я бжыгъэм хощI

Урысей Федерацэм и щIыналъэхэм ящыщу 2024 гъэм къриубыдэу лэжьапIэншэхэм я бжыгъэр нэхъыбэу зыгъэмэщIахэм яхэтщ Къэбэрдей-Балъкъэрыр. Абы ипэ ита илъэсым елъытауэ проценти 4-кIэ нэхъ мащIэ хъуащ IэнатIэ зимыIэхэм я бжыгъэр. Ар къигъэлъэгъуащ Новости РИА-м иджыблагъэ иригъэкIуэкIа къэпщытэныгъэхэм. 
ЩIыналъэм лэжьапIэншэу щыпсэум я куэдагъымкIэ ди республикэм 77-нэ увыпIэр къэралым щиIыгъщ, Кавказ Ищхъэрэм щыетIуанэщ, Ставрополь крайм къыкIэлъыкIуэу. 
ЛэжьыгъэмкIэ дунейпсо зэгухьэныгъэм и мардэм тету, лэжьапIэншэхэм я куэдагъыр къызэрабжыр абыхэм я бжыгъэмрэ IэнатIэ пэрытхэмрэ (я ныбжькIэ илъэс I5-м щегъэжьауэ нэхъыжьхэмрэ) зыхуэдизыр зэпалъыта нэужьщ. 
Къэбэрдей-Балъкъэрым и цIыхухэм ику иту мазих пIалъэкIэ лэжьыгъэ къалъыхъуащ. 
УФ-м и щIыналъэхэм ящыщу IэнатIэ зимыIэхэм я бжыгъэр щынэхъ мащIэр Мэзкуу къалэмрэ Амур областымрэщ, щынэхъыбэр Ингушымрэ Къэрэшей-Шэрджэсымрэщ. 
Къэпщытэныгъэхэр езыгъэкIуэкIахэм зэрыжаIэмкIэ, къэралым и IэнатIэхэм цIыху зэрахуримыкъум къыхэкIыу, иужьрей илъэсхэм лэжьапIэншэхэм я бжыгъэр нэхъ мащIэ хъууэрэ макIуэ. ЖыпIэнурамэ, Росстатым къызэритамкIэ, 2024 гъэм и еплIанэ Iыхьэм лэжьапIэншэхэм я бжыгъэм фIыуэ хэщIащ икIи проценти 2,3-кIэ ехащ. Абы ипэ ита илъэсым и апхуэдэ пIалъэм щыIа бжыгъэм нэхърэ процент 0,6-кIэ нэхъ мащIэщ ар. ЦIыху бжыгъэм хуэбгъакIуэмэ, мин 470-кIэ нэхъ мащIэ хъуащ лэжьапIэншэхэр.