Япэ щIыкIэ гъуэгухэр…

Къэбэрдей-Бэлъкъэрым транспортымрэ гъуэгу хозяйствэмкIэ и министр ДыщэкI Аслъэн щIыпIэ гъуэгу управленэм, муниципалитетхэм, ухуэныгъэ IуэхущIапIэхэм я лэжьакIуэхэр игъусэу къызэхикIухьащ республикэм и щIыналъэхэр икIи зыщигъэгъуэзащ абыхэм щекIуэкI гъуэгу лэжьыгъэхэм.

Псалъэм къыдэкIуэу, «ГъащIэм хуэщIа инфраструктурэ» лъэпкъ пэхуэщIэм ипкъ иткIэ Тэрч щIыналъэм и щIыпIи 4-м гъуэгухэр зэIузэпэщ мы махуэхэм щащI. Абы хохьэ Дей къуажэм ЩауэцIыкIум и цIэр зезыхьэ, километри 4,1-рэ зи кIыхьахь и уэрамыр, Дей, Курп Ищхъэрэ къуажэхэмрэ Осетие Ищхъэрэ - Аланиемрэ (гъунапкъэм нэсыху) зэпызыщIэ, километри 5,8-рэ зи кIыхьагъ автомобиль гъуэгур, Курп Ищхъэрэмрэ Ипщэмрэ ухуэзышэ, километри 4,8-рэ зи кIыхьагъ гъуэгур, Тэрч къалэм и Къэбэрдей, Гоголымрэ Кировымрэ я цIэхэр зезыхьэ, псори зэхэту километр 1,6-рэ зи кIыхьагъ уэрамхэр. Мыбыхэм ухуашэ иджы щIэуэ яухуа, мы гъэм къызэIуахыну курыт еджапIэщIэмрэ сабий садымрэ. Уэрамхэм трагъэкIуэдэну мылъкур Тэрч щIыналъэ бюджетым къыхэкIынущ.

Апхуэдэуи министрым Май щIыналъэм щызригъэлъэгъуащ Май къалэр, Урожайнэ къуажэр, Осетие Ищхъэрэ – Аланиер зэпызыщIэ автомобиль гъуэгум телъ лъэмыжымрэ Налшыкрэ Май къалэмрэ зэпызыщIэ, къэрал мыхьэнэ зиIэ автомобиль гъуэгумрэ щрагъэкIуэкI лэжьыгъэхэр. АдэкIи щыIащ Александровскэ, Уэзрэдж жылэхэр зэпызыщIэ, километри 2 зи кIыхьагъ гъуэгур щызэрагъэпэщыж щIыпIэм.

Шэрэдж щIыналъэм хыхьэ Шэрэдж Ищхъэрэ, Жэмтхьэлэ, Сукан-Су жылэхэр зэпызыщIэ гъуэгуми, Зэрэгъыж УнэлIокъуэмрэ Къардэнымрэ я цIэхэр зезыхьэ уэрамхэми апхуэдэ лэжьыгъэхэр щрагъэкIуэкI.

Гулъытэншэу къэнакъым «ГъащIэм хуэщIа инфраструктурэ» лъэпкъ пэхуэщIэм хыхьэу Аруан щIыналъэм и Мэрзэхъурэ Шытхьэлэрэ къуажэхэм, Налшыкрэ Нарткъалэрэ зэпызыщIэ трассэм щыхыхьэж щIыпIэм нэсыху, къыщагъэщIэрэщIэж гъуэгухэр. Псори зэхэту километри 7 я кIыхьагъщ абыхэм.

Гъуэгум къыщыщIедзэ Налшыкрэ Нарткъалэрэ зэпызыщIэ трассэм дежи Шытхьэлэ къуажэм и Школьнэ уэрамым ирокIуэ, адэкIэ къуажитIыр зэпищIэу, Мэрзэхъу и Комсомольскэ уэрамым щыпещэж.

Лъэпкъ пэхуэщIэм хыхьэу Дзэлыкъуэ щIыналъэм и Сэрмакъ къуажэм дэт кхъэм хуэкIуэ гъуэгур къызыхуэтыншэу мы махуэхэм зэрагъэпэщыж. ЛэжьакIуэхэм иджыпсту гъуэгу щхьэфэр тратхъунщIыкI икIи асфальтыщIэ зэрытралъхьэным хуэдэу и лъабжьэр ягъэбыдэ, иужькIэ утемыгузэвыхьу илъэс куэдкIэ ущызекIуэ хъун хуэдэу. Абы къыдэкIуэу, гъуэгубгъухэм иджырей уэздыгъэхэр щыпадзэнущ, дамыгъэхэр щагъэувынущ, зэхыхьэпIэ-зэхэкIыпIэхэр къыхагъэщхьэхукIынущ.

Апхуэдэ лэжьыгъэхэр щрагъэкIуэкI Малкэ, Ингушли хъупIэм ухуэзышэ автомобиль гъуэгуми. Малкэ къуажэм Лениным и цIэр зезыхьэ, километри 8,1-рэ зи кIыхьагъ, уэрамым тетщ курыт еджапIищ, сабий сад, мэжджыт, фельдшер-акушер пункт, къуажэ администрацэмрэ полицейхэмрэ я хэщIапIэхэр. Мыбдежми гъуэгущхьэр щытратхъунщIыкI, лъабжьэр ягъэбыдэ, гъуэгубгъур мывэхэмкIэ кърагъэтIылъэкI, лъэс лъагъуэхэр къыхагъэщхьэхукI.

Зи гугъу тщIа гъуэгу лэжьыгъэхэр псори дызэрыт илъэсым зэфIагъэкIын мурад щыIэщ.