ТекIуэныгъэм и махуэшхуэм зыхуагъэхьэзыр

КъБР-м и Iэтащхьэ КIуэкIуэ Казбек республикэм и къалэхэм, щIыпIэхэм я Iэтащхьэхэр зыхэта «щIыналъэ сыхьэт» зэхуэсыр иригъэкIуэкIащ. 

ЗэIущIэм щытепсэлъыхьащ ТекIуэныгъэм и махуэшхуэр республикэм зэрыщекIуэкIыну щIыкIэм. МахуэщI зэхуэсхэр щызэхэтынущ къалэхэм, жылэхэм ящыщ дэтхэнэми. Абыхэм кърихьэлIэнухэм ягъэлъэпIэнущ Хэку зауэшхуэм хэкIуэдахэм, абы лIыхъужьыгъэ къагъэлъагъуэу хэтахэм я фэеплъхэр, апхуэдэуи дзэ Iуэху хэхам (СВО) хэт зауэлIхэм я щIыхьыр щаIэтынущ. 
Апхуэдэу зэIущIэм и гугъу щащIащ лъэпкъ проектхэр, федеральнэ, щIыналъэ программэхэр республикэм зэрыщагъэзащIэм. Iэтащхьэм зэрыжиIамкIэ, ди республикэм къыщащта проектхэмрэ программэхэмрэ я нэхъыбапIэм къызэ­щIиубыдэ лэжьыгъэхэр яублакIэщ, дэтхэ­нэ IэнатIэми и Iуэху зыIутыр и нэIэм щIэтщ. 
Гъатхасэр щIыналъэм зэрыщекIуэкIым щытепсэлъыхьым, къыхагъэщащ бжьы­хьэсэ къэкIыгъэхэр щIыгъэпшэркIэ къы­зэрызэрагъэпэщакIэр, гъатхэ лэжьыгъэ­хэри хъарзынэу зэрызэтраублар. КъэкIыгъэ зэмылIэужьыгъуэхэр хасэнущ гектар мин 216-м щIигъу гъавэ щIапIэхэм. Псори зэхэту вэн-сэн лэжьыгъэхэр щрагъэ­кIуэ­кIынущ, нэгъабэ ещхьу, гектар мин 282-м щIигъум. Псы зыщIагъэлъадэ къэкIыгъэхэр тращIащ гектари мини 3,4-м. Ар планым и процент 98-рэ мэхъу. Къэралыр зэрыщыту къапщтэмэ, а бжыгъэр нэхъыфI дыдэщ. 
Мэкъумэш-промышленнэ IэнатIэм игъуэ­тыну къэрал дэIэпыкъуныгъэр мы гъэм сом меларди 4-м щIигъунущ. Нэхъыбэу а мылъкур хуаутIыпщынущ хадэ­хэкIым, псыщIэгъэлъадэм, Iэщышхуэ гъэхъуным, жылэхэм зегъэужьыным епха Iуэхухэм. 
Хэхауэ тепсэлъыхьащ Мэкъумэш-про­мышленнэ IэнатIэм щызекIуэ Iуэху зехьэ­кIэм бжыгъэхэр лъабжьэ хуэщIыным. Абы и фIыгъэкIэ нэхъыфIу кIэлъыплъа хъу­нущ IэнатIэм и унэтIыныгъэ зэмылIэужьы-гъуэ­хэм яIэ щытыкIэм, жылапхъэхэр къы­зэрагъэсэбэпым, щIыпIэхэм щызэфIах лэжьыгъэхэр зыхуэдэм.