Урысей Федерацэми хамэ къэралхэми я инвесторхэр Къэбэрдей-Балъкъэрым къешэлIэным ехьэлIауэ ди щIыналъэм IэмалыфIхэр къыщызэрагъэпэщ зэпытщ. Апхуэдэ Iуэху бгъэдыхьэкIэм ипкъ иткIэ инвестицэм щхьэкIэ щыIэ хабзэхэри ирагъэфIакIуэ.
Республикэм и экономикэм мылъку къыхэзылъхьэ инвесторхэм къэрал дэIэпыкъуныгъэу иратхэм мыхьэнэ зиIэ унэтIыныгъэ зыбжанэ яхэтщ. Абы хохьэ къэрал шэсыпIэхэр, мылъкухэм ехьэлIауэ щыIэ худэчых зыхэт налогхэр, худэчых зыхэт кредитхэр, лизингкIэ къащта хьэпшыпхэмрэ техникэхэмрэ, кредитхэм я процентхэм я Iыхьэ гуэрхэр ящхьэщыхыныр, хэхъуэм щхьэщатыкI налогыр яхуэгъэмэщIэныр, зэхьэзэхуэхэм хэмыту бэджэнду щIыхэр етыныр.
2024 гъэм Урысей Федерацэм и щIыналъэхэм инвестицэ и лъэныкъуэкIэ щыщыIэ щытыкIэхэм теухуауэ зэхагъэува лъэпкъ рейтингым къызэрыщыгъэлъэгъуамкIэ, Къэбэрдей-Балъкъэрыр увыпIэ зыбжанэкIэ дэкIуэтеящ икIи Кавказ Ищхъэрэм ещанэ увыпIэр щиубыдащ. Абы нэмыщI, республикэм и инвестицэ индексым пункти 7,43-кIэ хигъэхъуащ абы ипэ ита илъэсым щыIа бжыгъэхэм елъытауэ.
УФ-м и Правительствэм иджыблагъэ щекIуэкIа зэIущIэм щытепсэлъыхьащ къэралым и бизнесым пIалъэ кIыхьым тещIыхьауэ зегъэужьыным ехьэлIауэ щыIэ Iэмалхэм. Лъэпкъ гугъапIэхэмрэ Дунейпсо банкым къигъэув мардэхэмрэ япкъ иткIэ япэ игъэщыпхъэ унэтIыныгъэу 11 къагъэлъэгъуащ. Абы хохьэ сату щIыпIэхэм я зэхьэзэхуэхэм зегъэубгъуныр, инновацэ технологиехэр дэIыгъыныр, финанс Iуэхутхьэбзэхэр егъэфIэкIуэныр, лъэпощхьэпо хэмыту бизнесыр нэхъ тыншу тхыныр, нэгъуэщIхэри.
НобэкIэ, ди республикэм и экономикэм хэхъуэ нэхъыбэу къезыт IуэхущIапIэ инхэм я лэжьыгъэхэм жыджэру щыхапщэ IТ-технологиехэр, продукцэхэм елэжьхэмрэ экотуризмэмрэ щрагъэфIакIуэ, туризм IэнатIэм, бжыгъэр зи лъабжьэ инновацэ экономикэм зрагъэужь. Апхуэдэуи щагъэзащIэ бжыгъэр зи тегъэщIапIэ программэхэр. ЖыпIэнурамэ, абы хыхьэу, 2030 гъэм ирихьэлIэу, Налшык къалэ IТ-парк къыщызэIуахынущ икIи лэжьыгъэ IэнатIэу 450-рэ абы къыщызэрагъэпэщынущ, щIыналъэми бжыгъэр зи лъабжьэ и экономикэм и щIэдзапIэ хуэхъунущ.
