ЛIыхъужьхэм я фэеплъыр Шэджэм къыщызэIуах

Шэджэм къалэм накъыгъэм и 8-м къы­щызэIуахащ ТекIуэныгъэм и Паркыр, Хэку зауэшхуэм лIыхъужьыгъэ къагъэлъагъуэу хэта ди хэкуэгъухэу Байсултанов Алимрэ Къуэныкъуей Назиррэ, зи къэралыр зыхъумэжу дзэ Iуэху хэхам хэтхэм я мемориалхэр. Абыхэм ехьэлIа зэхуэсым хэтащ КъБР-м и Iэтащхьэ КIуэкIуэ Казбек. 

«Мы мемориалыр я дамыгъэщ лIакъуэхэм я зэпыщIэныгъэр зэрыбыдэм, Хэкум и хъума­кIуэхэм яхуэтщI пщIэм, - щитхащ республикэм и Iэтащхьэм и телеграм-каналым. - Скульптурэ зэхэтым увыпIэ хэха щеубыд зэIузэпэщ ящIа щIыпIэ дахэм.
Паркыр къызэрагъэпэщащ «ЦIыхухэм я зэIузэпэщ псэукIэм хуэгъэпсауэ» лъэпкъ проектым ипкъ иткIэ. Ар щытынущ цIыху куэд зыхэт щэнхабзэ Iуэхухэр щрагъэкIуэкI, Шэджэм щIыналъэм щыпсэухэм я зыгъэпсэхупIэ екIуу.
ТекIуэныгъэ Иныр илъэс 80 зэрырикъум къы­хузэрагъэпэща махуэшхуэ дауэдапщэм хы­хьэу творческэ гупхэм ягъэзэщIащ Къуэныкъуей Назиррэ Байсултанов Алимрэ ятеухуа уэрэдхэр. Аращ цIыхубэм я гум илъщ жыхуаIэр икIи а фэеплъыр зэи тщыгъупщэнукъым.
Зэхуэсым хэтащ щIалэгъуалэ зэгухьэныгъэхэр, дзэ къулыкъум лIыгъэ къыщагъэлъа­гъуэу къэралыр зыхъума, зи гъащIэхэр къэкIуэну щIэблэхэм я мамыр псэукIэм щIэзыта щIалэхэр зыщыщ лъэпкъхэм я лIыкIуэхэр. Абыхэм я лIыхъужьыгъэр ящыгъупщэркъым, абыхэм ирогушхуэ.
Нобэрей дауэдапщэм иджыри зэ дигу къигъэкIыжащ Унагъуэм и илъэс екIуэкIам, иджы – Хэкум и хъумакIуэм и илъэсым япыщIа ди лъапIэныгъэхэмрэ хабзэхэмрэ».