Налшык щыпсэу, Къаншыуей къуажэм щыщ Ахъсорэ (Унэж) Марят «Адыгэ псалъэм» и щыпэ къакIуэкъым. Нобэ ар къыщIытхуеблэгъар и адэ къуэш Унэж Аркадий Хьэмыщэ и къуэм и гугъу къытхуищIын папщIэщ.
Мы гъэм илъэс 75-рэ ирикъуа нэхъыжьыфIым Тэрч районым и щIыпIэ администрацэм щIэныгъэмкIэ и управленэм къыбгъэдэкIыу, ФIыщIэ тхылърэ ЩIыхь тхылърэ къыхуагъэфэщащ.
«Мы махуэ лъапIэм ирихьэлIэу фIыщIэшхуэ пхудощI егъэджэныгъэм илъэс куэд зэрытебгъэкIуэдам папщIэ, - дыкъыщоджэ хъуэхъум. - Жэуаплыныгъэшхуэ зыпылъ IэнатIэр епхьэкIыху, Iущагърэ тэмакъкIыхьагърэ пхэлъу, уэ къыптехуэ къалэн псори нэгъэсауэ бгъэзэщIащ. УзэрыцIыху гущабэр, IэщIагъэм фIыуэ зэрыхэпщIыкIыр, цIыхухэр къызэрыпщыгугъыр Iэпэдэгъэлэл умыщIрэ узэпIэзэрыту, узыхуеIэм уи Iэр теIэбэу узэрылэжьар нобэ IэщIагъэм пэрыт егъэджакIуэ щIалэхэм я дежкIэ щапхъэ дахэщ. Узыншагъэ быдэрэ ехъулIэныгъэрэ уиIэу, гъащIэр ебгъэфIэкIуэным къарурэ гукъыдэжрэ хуэбгъэт зэпыту илъэс куэдкIэ упсэуну гурэ псэкIэ дынохъуэхъу».
УзэрыцIыкIурэ плъагъу цIыхур лъэпкъыр лъэпкъ зыщIыжхэм зэращыщыр къыщыбгурыIуэр уэ езыр балигъ ухъуа нэужьщ. А гурыщIэрщ Маряти къезышэжьар. «Университетыр иджыри къимыухауэ, къуажэм практикэ къагъэкIуэжауэ лэжьэн щIидзауэ щытащ си адэ къуэшым, - пещэ абы и хъыбарым. - Алгебрэмрэ геометриемрэ иригъэджу, Къаншыуей дэт курыт школым илъэс 35-кIэ щылэжьащ, и еджакIуэхэм къащIэхъуэжа бынхэри нэгъунэ иригъэджащ, сыт щыгъуи сабийхэм фIы дыдэу къалъагъуу. Иджыпсту тIысыжауэ, нэхъыжь къалэнхэр егъэзащIэ, къуэрылъху-пхъурылъхухэм и нэIэ ятригъэтщ. Куэд щIакъым ди адэ къуэшым и быным и быным и быныж зэригъуэтрэ, узыншэу Тхьэм илъэс куэдкIэ псоми къытщхьэщигъэт, дыхуэарэзыщ».
ЦIыху зэчиифIэр зэи Iуэхуншэ хъуркъым. Марят зэрыжиIэмкIэ, Аркадий жьыми щIэми ядекIуу, цIыхухэм нэшхуэгушхуэу зэрахэтым нэмыщI, къэкIыгъэхэм елIэлIэным дихьэхауэ, хадэхэкI зэмылIэужьыгъуэхэр, жыг лъэпкъыщIэхэр къигъэкIыу апхуэдэщ. Гъуэгуанэ кIыхь къэпкIуа нэужь, псом нэхърэ нэхъ лъапIэр уи напэр къабзэу узэплъэкIыжынращи, Унэж Аркадий а насыпымкIэ Алыхьыр къызэрыхуэупсам и щыхьэтщ нэхъыщIэхэм къыхуащI пщIэмрэ езым бгъэдэлъ Iулыджымрэ.
