Нобэ, накъыгъэм и 24-м, ди къэралышхуэм, щIэуэ къыхыхьа щIыналъэхэри хэту, и курыт еджапIэ псоми иужьрей уэзджы- нэр къыщоуэ. Дэтхэнэ школакIуэм и дежкIи мыхьэнэшхуэ зиIэ а Iуэхугъуэр псом хуэмыдэжу зыхащIэ еджэныр зэфIэзыхауэ школым къыщIэкIхэм. Ди гуапэ зэрыхъущи, а ныбжьыщIэхэм я бжыгъэм хэхъуэурэ макIуэ иужьрей илъэсхэм. Къэбгъэлъагъуэмэ, нэгъабэрей бжыгъэхэм еплъытмэ, мы гъэм курыт школыр къэзыуххэр мин 45-кIэ (проценкIэ къапщтэмэ, 7,5-кIэ) нэхъыбэщ. Ди республикэми щымащIэкъым апхуэдэ ныбжьыщIэхэр. Ахэр мини 5-м нызэрохьэс, 9-нэ классыр къэзыуххэр хэмыту.
ДэнэкIи хуэдэу, махуэшхуэр щагъэлъапIэ ди республикэм и курыт еджапIэхэми. Абыхэм я пщIантIэ хуитышхуэхэм, екIуу гъэщIэрэщIахэм нобэрей пщэдджыжьыпэм щыIуа уэзджынэр адрейхэм ещхькъым: абы и зу макъри нэхъ жьгъырущ, пкърылъ купщIэри нэхъ инщ. Ар ныбжьыщIэхэм я дежкIэ мэхъу сабиигъуэмрэ балигъ гъащIэмрэ я зэпылъыпIэ, а гъащIэщIэм хуаIэ мурадхэмрэ къащыпэщылъ IуэхугъуэщIэхэмрэ я щIэдзапIэ. Жылагъуэ мыхьэнэшхуэ зиIэ егъэджэныгъэ IэнатIэм епха а гуфIэгъуэхэм махуэшхуэр зей ныбжьыщIэхэм я гъусэу хэтщ абыхэм я егъэджакIуэхэр, адэ-анэхэр, КъБР-м и Парламентым-рэ Правительствэмрэ я лIыкIуэхэр, къалэ, къуажэ администрацэхэм я IэщIагъэлIхэр. Школ линейкэхэм апхуэдэу кърагъэблэгъащ зауэмрэ лэжьыгъэмрэ я ветеранхэр, гъунэгъу щIыналъэм щекIуэкI СВО-м хэтхэм ящыщ ди лъахэгъу зауэлIхэм ящыщу зи Iуэху хуэкIуэхэр, пщIэ зыхуащI нэхъыжьыфIхэр. Иужьрей уэзджынэм балигъ гъащIэм хишэ ныбжьыщIэхэм яхуэгъэза хъуэхъу дахэхэр абыхэм щагъэIу гуфIэгъуэ зэхыхьэхэм, ягуми я псэми къабгъэдэкIыу.
А псори фIыщIэ ящI утыкум щаIэт ныбжьыщIэхэм, атIэми абыхэм я гупсысэр хуэунэтIащ къапэщылъ къэрал къэпщытэныгъэхэм. II-нэ классыр къэзыуххэм ахэр дыгъуасэ, накъыгъэм и 23-м, яублакIэщ тхыдэ, литературэ, химие предметхэмкIэ. Жэуаплыныгъэ зыпылъ апхуэдэ махуэу ныбжьыщIэхэм иджыри хы къапэщылъщ: накъыгъэм и 27, 30, мэкъуауэгъуэм и 2, 5, 10, 11-хэр. Школыр къэзыуххэр, шэч хэмылъу, хущIокъу ахэр ехъулIэныгъэкIэ ятыну, хуопабгъэ псэм щагъафIэ я хъуэпсапIэхэм ялъэIэсыну, гугъапIэщIэхэр зрагъэхъулIэну.
Иужьрей уэзджынэр угъурлы фхуэхъуну, ныбжьыщIэхэ! Гупсысэ Iущхэр зи лъабжьэ Iуэху екIу куэд зэфIэфхыну, насып мыкIуэщIкIэ, ехъулIэныгъэкIэ гъэнщIа гъащIэ ефхьэкIыну. Гъуэгу махуэ, лъагапIэщIэхэр зи плъапIэ зи щIалэгъуэхэ! Фэ къыфпоплъэ Iуэхугъуэ хьэлэмэт куэду зэхэлъ къэкIуэну зэман дахэр!
ЖЫЛАСЭ Маритэ,
«Адыгэ псалъэ» газетым егъэджэныгъэмрэ
щIэныгъэмкIэ и къудамэм и унафэщI.
