Сабий сымаджэхэм ехьэлIауэ

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ «ИдогъаджэДощIэ» - Къы­щыпхуэсакъ еджапIэ» («УчимЗнаем» - Заботливая шко­ла») пэхуэщIэм и къызэгъэ­пэщакIуэ Шариков Сергей. А пэхуэщIэм ди республикэм лэжьэн щыщIидзэнущ ды­зэрыт илъэсым и фокIадэ ­ма­зэм щегъэжьауэ. Iуэхум елэжь IэщIагъэлI гуп иджыпсту ди щIыналъэм щыIэщ.
 
IуэхугъуэщIэр жыджэру де­­Iыгъ Статс-секретарь - УФ-м зыхъумэжыныгъэмкIэ  и ми­нист­рым и къуэдзэ Цивилевэ ­Аннэ. Абы къызэрыхигъэщамкIэ, пэ­хуэ­щIэм IэмалыщIэхэр ­къа­хузэIуех узыфэ зэмы­лIэу­жьы­­гъуэхэр зыпкърыту сымаджэщым зэман кIыхькIэ щIэлъ сабийхэми, абыхэм я адэ-анэхэми, егъэджакIуэхэми. Нэ­хъыщ­­хьэращи, апхуэдэ сабийм фIэщхъуныгъэ хэлъ мэхъуж къы­пэщылъ къалэнхэм зэры­пэл­ъэ­щынумкIэ.  
КIуэкIуэ Казбекрэ Шариков Сергейрэ гупсэхуу тепсэ­лъы­хьащ мыхьэнэшхуэ зиIэ а со­циальнэ пэхуэщIэр ди респуб­ликэм гъэзэщIа зэрыщыхъу-нум. Абы ехьэлIа лэжьыгъэ щхьэ­пэхэр зэрызэфIахыну щIы­кIэхэр яубзыху. Абы къызэщIеу­быдэ сымаджэщхэм, санат­о­рэхэм, унэм зи узыншагъэм щыкIэлъызыгъэплъ сабийхэм я еджэныр нэхъыфIу къызэгъэ­пэща зэрыхъуну Iэмалхэр. 
ПэхуэщIэм лэжьэн щыщIи­дзэнущ Налшык дэт Республикэ гимназием, КъуэкIыпIэ хьэб­лэм щыIэм. Ар хуэгъэзауэ щы­тынущ Республикэ сабий кли­никэ центрым и къудамэ 11-м щIэлъ сабийхэр егъэджэным. Псантхуэм, наркологием, тхьэмбыл узыфэхэм, узыфэ зэры­цIалэхэм щеIэзэ IуэхущIапIэ-хэм, апхуэдэу «Лэгъупыкъу» социальнэ центрым къыщызэрагъэпэщынущ ныбжьыщIэхэр ­онлайну зэребгъаджэ хъуну Iэмалхэр къозыт IэнатIэ хэхахэр.  
Лэжьыгъэр гъэзэщIэным жы­­джэру хыхьащ  IэщIагъэлI 30. Абыхэм яхэтщ психологхэр, логопедхэр, дефектологхэр, нэ­гъуэщIхэри. Гупым хэтхэм курс зэхуэмыдэхэр къыщаухащ Рогачёв Дмитрий и цIэр зезыхьэ, Лъым, лъышх узым епха сабий узыфэхэмкIэ щIэ­ныгъэ-къэ­хутакIуэ медицинэ центрым, Блохин Николай и цIэкIэ щыIэ онкологие IуэхущIапIэм. 
Ди республикэм и пашэ КIуэ­кIуэ Казбек фIыщIэ яхуи­щIащ Шариков Сергеи ар зи пашэ Iэ­щIагъэлI гупми, мыхьэ­нэшхуэ зиIэ апхуэдэ пэхуэщIэр ди республикэм щыгъэлэ­жьэ­нымкIэ сэбэп зэрыхъум пап­щIэ.