Дэтхэнэри арэзы ещIыф

Зыпэрыт IэнатIэр гурэ псэкIэ къыхэзыха цIыхурщ лэжьыгъэм ехъулIэныгъэ щызыIэрызыгъэхьэфынур. Апхуэдэ цIыхухэм я къалэныр жэуаплыныгъэшхуэ яхэлъу ягъэзащIэ икIи я IэнатIэр сытым дежи зэрефIэкIуэным хущIэкъуу апхуэдэщ. Абы и лъэныкъуэкIэ щапхъэщ Нарткъалэ дэт, ЩIыналъэхэм зэдай, узыфэ зэмылIэужьыгъуэхэр зыпкърытхэм щеIэзэ сымаджэщым гинекологиемкIэ и къудамэм и унафэщI Бро (Мысрокъуэ) Маритэ Пагуэ и пхъур. Илъэс 47-рэ хъуауэ ар дохутыру мэлажьэ, иджыпсту зыпэрыт къулыкъур илъэс 23-м нэблэгъауэ ирехьэкI.
Узыншагъэм и уасэри дохутырхэм я лэжьыгъэм и мыхьэнэри нэсу зыхэзыщIэр сымаджэ хъуа цIыхурщ. Узым къигъэдзыхэм, Тхьэм нэмыщIкIэ, и гугъэ псори зрипхыр дохутырырщ, сымаджэм и дежкIэ абы и псалъэ гуапэр мылъку псоми йофIэкI. Си щхьэкIэ згъэунэхуащ Маритэ и Iэзагъри и зэфIэкIри здынэсыр. IэкIуэлъакIуэу абы и лэжьыгъэр егъэзащIэри, «псэщIэ» къыпхилъхьэжым хуэдэщ. ШыIэныгъэ хэлъу, гуапэу яхущытщ ар дэтхэнэ зыми. ЦIыху псори я хьэлкIэ зэхуэдэкъым, псом хуэмыдэу узым къыхигъэзыхьыр адрейхэм хуэдэжкъым, нэхъ тэмакъкIэщIщ, ауэ Бром дэтхэнэми бгъэдыхьэкIэ щхьэхуэ къыхуигъуэтыфрэ арэзы ищIыфу и IэнатIэм пэрытщ.
Маритэ сытым дежи хущIокъу игъэзащIэ Iуэхур нэгъэсауэ зэрызэфIихыным. ЗэIэзэ сымаджэм и нэгум нэщхъыфIагъэ илъу щIэкIыжмэщ и лэжьыгъэр къехъулIауэ къыщилъытэр. Дохутырым къуихьэлIэ хущхъуэм хуэдэуи мыхьэнэшхуэ иIэщ сымаджэм фIэщхъуныгъэ хилъхьэжынми. Ар къагурыIуэу мы бзылъхугъэр дэтхэнэ зыми гукIи псэкIи хуэгумащIэу, псалъэ дахэхэмкIэ я гукъыдэжыр къыхуиIэтыжу ябгъэдэтщ. ЦIыху гумащIэщ, щабэщ, гущIэгъу зыхэлъщ, и щIэныгъэкIи, и IэщIагъэкIи дэбгъуэн щымыIэу дохутыр нэсщ. «IэщIагъэм къыхуигъэщIащ» зыхужаIэр абы хуэдэхэращи, зыпэрыт IэнатIэм и хъер илъагъуу Тхьэм адэкIи иригъэфIакIуэ.