ТекIуэныгъэр къызэрахьам щыщ Iуэхухэр

ТхылъыщIэ

Котляровхэ Викторрэ Мариерэ я тхылъ тедзапIэм иджыблагъэ къыщыдагъэкIащ «Память ушедшего века» тхылъыр, совет зауэлIхэм Хэку зауэшхуэм ТекIуэныгъэ Иныр къызэрыщахьрэ илъэс 80 зэрырикъум траухуар.
Тхылъым хагъэхьащ Урыс армэм, Фрунзе М. В. и цIэр зезыхьэм и Унэ Нэхъыщхьэм и дзэ-щIэныгъэлI зэгухьэныгъэм хэтахэм я лэжьыгъэхэр. Мы лэжьыгъэ щхьэпэр ТекIуэныгъэ Иным и мыхьэнэм щIэблэр хэзыгъэгъуазэщ. КъыдэкIыгъуэм и пэублэ псалъэм Дзэ ЩIэныгъэхэмкIэ Академием и академик, генерал-майор Карманов А. И. щитхащ тхылъым архив дэфтэрхэм къыщагъуэтыжа, нэхъапэIуэкIэ зыщIыпIи щытрамыдза, уеблэмэ ямыджа къэхъугъэхэмрэ зауэм теухуа тхыгъэхэмрэ зэрыщызэхуэхьэсар. А псори зытеухуэжар совет зауэлIхэр ТекIуэныгъэм хуэзышар, мамырыгъэм, фашизмыр гъэкIуэдыным я мыхьэнэр иджырей щIэблэм зыхегъэщIэныр зэрыарар.
Хэку зауэшхуэр зэрекIуэкIа илъэсиплIым къриубыдэу къэхъуа гузэвэгъуэхэр къызэщIэзыубыдэ тхылъым хагъэхьа лэжьыгъэхэм щытопсэлъыхь дзэ-хы флотым, совет авиацэм, тылым, шууеидзэм, связым, советыдзэр мылъкукIэ къызэгъэпэщауэ зэрыщытам, нэгъуэщIхэми. Апхуэдэщ «Участие советских танков в битве за Берлин», «Десять Сталинских ударов в период 1944 года», «Туапсинская оборонительная операция 1942 года» тхыгъэхэр. 
Москва щыщ хьэрычэтыщI, тхыдэдж Атэлыкъ Аслъэн и фIыгъэкIэ «Память ушедшего века» тхылъыр къыдагъэкIащ и бжыгъэр 500 хъууэ.