Старэ Шэрэдж къуажэм щыщу Хэку зауэшхуэм хэтащ цIыху 371-рэ, 247-р хэкIуэдащ. Хъыбарыншэу кIуэдахэмрэ гъэрыпIэм илIыхьахэмрэ я бжыгъэр 50-м щхьэдох. Псэууэ къела цIыху 70-м щыщу нэхъыбэм ныкъуэдыкъуэу къагъэзэжащ. А псоми я гугъу къытхуищIу ди газетым къэтхауэ щытащ Хьэмдэхъу Мухьэмэд, и къуажэгъухэм ящыщ зыбжанэм Хэку зауэшхуэм къыщагъэлъэгъуа лIыхъужьыгъэхэр къигъэнаIуэу.
«Лейтенант нэхъыжь Мер Чыланий Хьэту и къуэр Брест щыIа полкым и 67-нэ фочауэ ротэм и командиру щытащ. 1944 гъэм ар зи унафэщI ротэр Ясув Подляски къалэм (Польшэм) деж щекIуэкIа зэхэуэ гуащIэу 5-м хэтащ. Нэмыцэ сэлэтрэ офицеру 50-м нэблагъэ хигъэщIат, пулемётищрэ зауэ Iэщэ-фащэ зэрылъ шыгуи 10-рэ къатрихат абы щыгъуэм. 1944 гъэм Клецкэ районым и Радзивил къуажэм деж щикIуэтыж фашистхэм ротэр щыпэуври, я техники Iэщэ-фащи хыфIадзауэ нэмыцэхэр щIагъэпхъуэжащ. Абдежым бийм къыщигъэнащ танки 3, автомашини 5, сэлэт 50-м я хьэдэхэр. ЗауэлIым хэлъа хахуагъэм папщIэ къыхуагъэфэщащ «Вагъуэ Плъыжь», «Александр Невский» орденхэр.
Майор Хьэмдэхъу Башир Хьид и къуэр Ищхъэрэ флотым Дзэ-Хьэуа къарухэм хэту Хэку зауэшхуэм и япэ махуэхэм щегъэжьауэ 1945 гъэм щIышылэм и 22 пщIондэ зэуащ. Бийм лагъым яхидзэну, я тIасхъэ къищIэну е ди сэлэтхэр хуит къищIыжыну 192-рэ уэгум зиIэтащ. 1944 гъэм бадзэуэгъуэм и 5-м къыщыщIэдзауэ 1945 гъэм щIышылэм и 22 хъуху 118-нэ полкым и 2-нэ авиаэскадрильем и унафэщIу щытащ. «Хахуагъэм папщIэ», «Зауэ щIыхьым папщIэ» медалхэр, «Ушаковым и орденым» и етIуанэ нагъыщэр, «Бэракъ Плъыжь» орденыр къыхуагъэфэщащ.
Майор Сэхъурокъуэ Аслъэныкъуэ Исмел и къуэр 968-нэ топгъауэ полкым и командиру, иужькIэ 408-нэ фочауэ дивизэм и командиру щытащ. 1942 гъэм шыщхьэуIум щегъэжьауэ фокIадэ пщIондэ Гупайкэ псым деж щекIуэкIа зэхэуэм Сэхъурокъуэм фашист сэлэтрэ офицеру куэд щиукIащ, ауэ зы зэманым бийм и къарур зэщIигъэуIуэжри, ди зауэлIхэр къаухъуреихьат. Сэхъурокъуэр зи унафэщI 63-нэ полкым хузэфIэкIащ автомат къудейкIэ я гъуэгур пхратхъын. Махуэ 18-кIэ зауэ-банэм хэтауэ, ахэр бийм къаIэщIэкIащ, хэщIыныгъэшхуи ямыIэу. 1943 гъэм гъатхэпэм и 10-м щегъэжьауэ накъыгъэм и 6 пщIондэ Абиновая, Крымская деж щекIуэкIа зауэ гуащIэм майор Сэхъурокъуэм и полкым зэтрикъутащ бийм и пулемёт 40, танкым пэщIэт Iэщэу 4, лагъымгъауэу 4, танкитI, фашист сэлэтрэ офицеру 250-м нэблагъэ хигъэщIащ.
Сэхъурокъуэм къыхуагъэфэщащ «Вагъуэ Плъыжь» орденыр, «Хэку зауэ» орденым и япэ нагъыщэр, нэгъуэщIхэри.
Иуан Хьэсэн ТIалиб и къуэр лейтенант нэхъыжьт, ротэм и командирт. 1944 гъэм фокIадэм и 19-м щегъэжьауэ и 28 пщIондэ Эстонием деж бийм и зауэлI куэд щыхигъэщIащ ар зи унафэщI ротэм. Командир набдзэгубдзаплъэм, зи къалэныр къикIуэт зымыщIэу зыгъэзащIэм и фIыгъэкIэ абы и ротэм зауэ гъуэгу километр 350-рэ зэпичащ, бийм и сэлэтрэ офицеру 40-м нэс гъэру яубыдащ. 1945 гъэм щIышылэм и 24-м Одер псым деж Иуан Хьэсэн и ротэм щызэтриукIащ бийм и зауэлIи 100-м нэблагъэ. Абдежым лIыхъужьыр уIэгъэ хьэлъэ щыхъуауэ щытащ.
Иуан Хьэсэн ТIэлиб и къуэм къыфIащащ «Совет Союзым и ЛIыхъужь» цIэ лъапIэр.
Хьэпэ Пётр Хьэзешэ и къуэр хьэуа десант дивизэм и 7-нэ гвардием и полкым и телефонистт. Кунишевкэ къуажэм щекIуэкIа зауэхэм щыгъуэ связыр бгъуэ зэпаудати, бгъуэми зэпищIэжыфащ. I943 гъэм щэкIуэгъуэм и 17-м Медеревэ районым деж дакъикъи 7 - 8-м и кIуэцIкIэ связыр тIэу щызэпищIэжащ. 1944 гъэм шыщхьэуIум и 14-м Чайновэ жылэм и Iэгъуэблагъэм бийм зэпымыууэ къыщигъэуа лагъымхэм я зэранкIэ связыр кIуэдат. Хьэпэм дакъикъи 10-м и кIуэцIым связыр хэнейрэ зэтриухуэжащ. 1945 гъэм и щIышылэм Стопницэ бгым и Iэгъуэблагъэм щекIуэкIа зауэ гуащIэм связыр зэпымыууэ Iисраф ищIырт. 7-нэ гвардие полкым связымкIэ и командир сержант Хьэпэ Пётр мафIэ лыгъейм хэту связыр 17-рэ зэпищIэжащ. 1945 гъэм мазаем Одер псым щызэпрыкIым, батареемрэ дивизионым и командирымрэ я зэпыщIэныгъэр абы тэмэму къызэригъэпэщащ. Апхуэдэ лIыгъэ абы щигъэлъэгъуащ Каушен къуажэми, Шпрее псым дежи.
Сэбан Николай Iэубэчыр и къуэр 28-нэ сапёр гвардием и командирт. 1944 гъэм бийм и танк ебгъэрыкIуэныгъэм пэщIэтащ. И псэр игъэнэхъапэртэкъым нэмыцэхэм пэгъунэгъу дыдэ щыхъухэм дежи. Фашистхэр къызрикIуэну гъуэгум лагъымхэр щыщIитIэри, абы бийм и танк къигъэуащ. Тирасполь областым и Слобудкэ-Джурильнэ районым I944 гъэм Сэбаныр зыхэта гупым щыщIатIащ лагъым 300-м щIигъу. 1945 гъэм гъатхэпэм и 29-м сержант Сэбаным унафэ къыIэрыхьащ гъущI кIапсэ банэхэмкIэ гъэбыда, лагъым щыщIатIа щIыпIэм гъуэгу щыпхашыну: сэлэт лъэсыдзэмрэ Iэщэ-фащэ къезышэкIхэмрэ блэгъэкIын хуейт. Гвардием и сержант Сэбан Николай и гупым лагъым 300-м нэблагъэ къыщIахащ. Абы къыхуагъэфэщащ «Вагъуэ Плъыжь» орденыр, «ЩIыхь» орденым и 3-нэ нагъыщэр, «Хахуагъэм папщIэ» медалыр.
Лейтенант Дзыгъуанэ СулътIан Хьэжсет и къуэр зыхэта батареер 1944 гъэм мэкъуауэгъуэм и 17-м топышэр къытелъалъэу бийм япэ Салменкайтэ псым зэпрыкIри, къуэкIыпIэ лъэныкъуэмкIэ щыIэ и Iуфэм деж зыщигъэбыдащ. Абдеж бийм топышэм зэрызыщахъумэ и пулемётитI икъутащ, зауэлI 20 хигъэщIащ. Батареем и командир лейтенант Гольченкэ уIэгъэ хъуа нэужь, 1944 гъэм бадзэуэгъуэм и 26-м лейтенант Дзыгъуанэр батареем и командир ящIащ. ИкIи абы а къалэныр лIыгъэ хэлъу ирихьэкIащ.
Дзыгъуанэ СулътIан къыхуагъэфэщащ «Хэку зауэ» орденым и етIуанэ нагъыщэр».
