«ЗэманыщIэм хуэгъэпса гупсысэ лъэщхэр»

Апхуэдэ фIэщыгъэ зиIэ зэIущIэ ин Москва дэт «Урысей» лъэпкъ центрым мы махуэхэм щекIуэкIащ. Стратегие жэрдэмхэр пхыгъэкIынымкIэ агентствэмрэ «Урысей конгресс» фондымрэ къызэрагъэпэща зэхыхьэшхуэм хэтащ УФ-м и Президент Путин Владимир, къэралым хыхьэ щIыналъэхэм я Iэтащхьэхэр, къулыкъу лъагэ пэрытхэр, жэрдэмыщIэхэр зи куэд щIалэгъуалэр. Форумым щыIащ КъБР-м и Iэтащхьэ КIуэкIуэ Казбек.

Къэрал Iэтащхьэм и унафэм тету, зэхуэсыр 2020 гъэ лъандэрэ илъэс къэс къызэрагъэпэщ. Абы и къалэн нэхъыщхьэр Урысей Федерацэм и зыужьыныгъэм сэбэп хуэхъуну, хэлъхьэныгъэ ин хуэзыщIыну, гупсысэ лъэщхэр зи лъабжьэ проектыщIэхэмрэ жэрдэмыщIэхэмрэ хэплъэу, фIыхэм я фIыжхэр къыхэхынырщ, иужькIэ ахэр гъэзэщIэнырщ. Нэхъ пасэу къыхалъхьауэ екIуэкI а Iуэхугъуэм проектхэмрэ жэрдэмхэмрэ ягъэхьащ унэтIыныгъэу тхум тещIыхьауэ. Апхуэдэхэт социальнэ IэнатIэм, хьэрычэтыщIэ Iуэхухэм, IэщIагъэлIхэр къыхэхыным, технологие зыужьыныгъэм, щIыуэпсым и щытыкIэм ятеухуа унэтIыныгъэхэр. Псори зэхэту зэхуэсым кърахьэлIат жэрдэмыщIэрэ проектыщIэу мин 35-м      щIигъу. Абыхэм яхэтщ ди Къэбэрдей-Балъкъэр Республикэм икIа лэжьыгъэщIэхэри. Нэгъабэрейм еплъытмэ, а проектыщIэхэм я бжыгъэм хуэдитIрэ ныкъуэкIэ хэхъуащ.
- Ди къэралым и Президентым жэуап зэпкърыхахэр яритащ упщIэкIэ зыкъыхуэзыгъэзахэм, апхуэдэуи къыхигъэщащ УФ-м зыужьыныгъэ и лъэныкъуэкIэ лъэбакъуэщIэхэр щичын лъэхъэнэщIэр къызэрысар. А зэманыщIэм декIун гупсысэщIэхэр, жэрдэмыщIэхэр щыкуэдт форум иным, - жиIащ КIуэкIуэ Казбек. – КъинэмыщIауэ, Путин Владимир иджыри зэ къытеувыIащ уна­гъуэм жылагъуэм щиIэ мыхьэнэр зэрыиным. Абы зэрыжиIамкIэ, нэхъыжьыIуэхэри нэхъыщIэхэри зыщIэс унагъуэшхуэхэм адэкIи зыщегъэужьыжын хуейщ къэралым. Апхуэдэущ къыддекIуэкI хабзэхэр, лъэпкъ фIыгъуэхэр, лъапIэныгъэхэр зэрыпхуэхъумэнур. Абы къыхэкIыуи къэрал унафэщIхэм гулъытэ хэха хуащIынущ унагъуэхэм заужьыным, ахэр быдэ хъуным, зэпэщу псэуным. 
ХьэрычэтыщIэ IэнатIэм адэкIи зегъэужьыным щытепсэлъы-хьым, къэралым и Iэтащхьэм къыхигъэбелджылыкIащ ди хэ-       куэгъу куэдым къалэжь хьэпшып зэмылIэужьыгъуэхэр дунейпсо утыкушхуэхэм зэрынэсар, абыхэм пщIэрэ щIэупщIэрэ зэраIэр. Апхуэдэ Iуэхугъуэхэм уащымыгуфIыкIыу къанэркъым, гугъэфIи къыпхалъхьэ IэнатIэр адэкIи зэрефIэкIуэнумкIэ. 
Зэхуэсышхуэм и утыку ирахьа гупсысэщIэхэм, проектыщIэхэм, жэрдэмыщIэхэм я нэхъыфIхэр къыхахынурэ, федеральнэ, щIыналъэ дэIэпыкъуныгъэхэр иратынущ. Ди къэралым, абы и субъектхэм я зыужьыныгъэм хуэгъэпса, лъэпкъхэм къапэщыт къалэнхэр гъэзэщIэным хуэщIа а IуэхугъуэщIэхэр щагъэзэщIэнущ УФ-м и щIыналъэ псоми.