ЛIыхъужьыгъэм и орденыр хуагъэфащэ

  Къулъкъужын Ипщэм и курыт еджапIэ №2-м пэкIу щызэхэтащ, ар къэзыуха, дзэ Iуэху хэхам лIыхъужьу хэкIуэда Гугъуэт Нурхьэлий и щIыхькIэ. Къэралым и мамырыгъэмрэ шынагъуэншагъэмрэ зи псэр щIэзыта щIалэм абы фэеплъ къыщыхузэIуахащ.

 ЩIалэм и фэеплъым пщIэ хуащIыну, абы и  Iыхьлыхэмрэ благъэхэмрэ я гузэвэгъуэр дагъэпсынщIэну пэкIум зрагъэхьэлIащ Бахъсэн щIыналъэм и администрацэм и Iэтащхьэ Балъкъыз Артур, хабзэхъумэ IэнатIэхэм я лэжьакIуэхэм, жылагъуэ зэгухьэныгъэхэм я лIыкIуэхэм, хэкIуэдам и ныбжьэгъухэм, зыцIыхуу щытахэм, къуажэдэсхэм.

 ПэкIум щIидзэн и пэ къихуэу, къызэхуэсахэр хэкIуэдам зы дакъикъэкIэ хуэщыгъуащ. Балъкъыз Артур къыхигъэщащ Гугъуэт Нурхьэлий зэрихьа лIыгъэмрэ хахуагъэмрэ, псэемыблэжу ар мамырыгъэм зэрыщIэбэнар щIыналъэм щыпсэухэм ягу зэримыхунур.  Ар щIалэм и унагъуэм хуэгузэващ, лIыхъужьым и лIыгъэр щIэблэм щапхъэ зэрахуэхъунур къыхигъэщу.

  Фэеплъыр къызэIуаха нэужь, щIыналъэм и Iэтащхьэм Нурхьэлий и адэм фIыщIэ хуищIу абдеж щритыжащ хэкIуэдауэ и щIалэм къыхуагъэфэща «ЛIыхъужьыгъэм и орденыр».

 Зэхыхьэм хэтахэм фэеплъым удз гъэгъахэр тралъхьащ, зи псэ емыблэжу Хэкум къыщхьэщыжа щIалэм пщIэ хуащIу. ПэкIур щиухым армеец ныбжьыщIэхэм жаIащ: «ЛIыхъужьыр зэи дигу ихунукъым!» Мамырыгъэм папщIэ зи гъащIэ емыблэжахэм я фэеплъыр зэрахъумэнумрэ абы и уасэр зэрызыхащIэмрэ теухуа тхьэрыIуэ хуэдэт а псалъэхэр. Абы къегъэлъагъуэ Нурхьэлий и лIыгъэр къулыкъу къыдэзыщIахэми къыдэкIуэтей щIалэгъуалэми зэращапхъэр.

          ТЕКIУЖЬ Заретэ.