Щхьэхуэу къытеувыIащ щIалэгъуалэм

КъБР-м и Iэтащхьэ КIуэкIуэ Казбек иригъэкIуэкIащ Къэбэрдей-Балъкъэр Республикэм Террорым пэщIэтынымкIэ и комиссэм и зэIущIэр. Абы кърихьэлIащ щIыналъэм и Правительстэм хэтхэр, хабзэхъумэ, къарузехьэ IэнатIэхэм я унафэщIхэр, къэрал IуэхущIапIэхэм я къудамэу щIыпIэм щыIэхэм я лIыкIуэхэр.

ЗэIущIэм щызэпкърахащ Урысей Федерацэм терроризмэм щыпэ­щIэ­тыным хузэхалъхьа план зэгъэуIуам, 2024 - 2028 гъэхэм ятещIыхьам, щыубзыхуахэр республикэм гъэзэщIа зэ­рыщыхъур. Щхьэхуэу къытеувыIащ щIалэгъуалэм ядэлэжьэным теухуахэм, апхуэдэуи Дзэлыкъуэ, Тэрч щIыналъэ­хэм а Iуэхур зэрыщекIуэкIым.
КъимыдэкIэ, комиссэр хэплъэжащ властым и гъэзэщIакIуэ, щIыпIэ унафэр зегъэкIуэным пыщIа и органхэм я лэжьакIуэхэу профилактикэ Iуэхухэр зи пщэ дэлъхэм я IэщIагъэм хэгъэхъуэным хуэгъэзауэ зэфIагъэкIахэм кърикIуа­хэм.
Зытепсэлъыхь Iуэхухэм зэреплъхэр къагъэлъэгъуащ зэхуэсым хэтхэм, Террорым пэщIэтынымкIэ комиссэм и лэжьыгъэм дяпэкIэ къыщалъытэну чэнджэщхэр, ныкъусаныгъэхэр гъэзэкIуэжа зэрыхъуну щIыкIэм теухуахэр къыщыхалъхьащ.