НыбжьыщIэхэм зыщIагъакъуэ

Гъэ къэс зэгухьэныгъэм и гуащIэ хелъхьэ бынунагъуэшхуэхэм щыщхэмрэ щытыкIэ гугъу ихуахэмрэ еджэгъуэм хуэгъэхьэзырыным. ХъыбарегъащIэм къызэрыщыгъэлъэгъуамкIэ, шыщхьэуIум и 1-м щегъэжьауэ  бэрэжьей къэс, IуэхущIапIэм епха псапащIэ фондым (Налшык къалэм и Къэбэрдей уэрам, №17) сабий щыгъынхэмрэ школ хьэпшыпхэмрэ щызэхуахьэс и пэшыр зэIухауэ щытынущ. 

- Республикэм щыпсэухэр къыхудоджэ гъэ еджэгъуэщIэм бынунагъуэшхуэхэм щыщхэр хуэдгъэхьэзырыным къыхыхьэну. Мы Iуэхур дэ илъэс къэс къызыдогъэпэщри, зэхуэтхьэс хьэпшыпхэр зэуапIэм пэгъунэгъу щIыналъэхэм я социальнэ IуэхущIапIэхэм щеджэ сабийхэм яхудогъэхь. Апхуэдэу нэгъабэ сабий 50-м яхуэдгъэхьэзырахэр Курск едгъэшащ, - жеIэ фондым и унафэщI Букинэ Еленэ. - Ахэр иратащ дзэ Iуэху хэхам хэтхэм я бынхэм.  Ди псапащIэ фондым и лэжьыгъэр гъэмахуэми зэпигъэуркъым: цIыхухэм кърахьэлIэ щыгъынхэм школакIуэхэм къахуэсэбэпыну хэлъхэр къахыдох. Ахэр псори шыщхьэуIум и кIэм ныбжьыщIэхэм яIэрыдгъэхьэнущ. Щхьэж и зэфIэкI мы Iуэхум къыхилъхьэмэ, шэч хэлъкъым сабий нэхъыбэ зэрытхуэгъэгушхэнум. 

IуэхущIапIэм и куратор Малкаровэ Нелэ зэрыжиIэмкIэ, псапащIэ фондым и лэжьыгъэм цIыхухэр Налшык фIыуэ щыщыгъуазэщ икIи тхьэмахуэ къэс щыгъын куэд къыхуахь. Ахэр зэхадзри, нэхъыфI дыдэхэр сабийхэм хуагъэтIылъ. 2025 гъэр къызэрихьэрэ мы IуэхущIапIэм апхуэдэ псапэ Iуэхуу 16 къызэригъэпэщащ.