Зи IэщIагъэр фIыуэ зылъагъу

Зи IэщIагъэр фIыуэ зылъагъу цIыхур сытым дежи хущIэкъунущ и лэжьыгъэм зэрызригъэужьынум. Ар щынэралъагъущ Маринэ дежи. А бзылъхугъэм и IэщIагъэм хуиIэ лъагъуныгъэм и къежьапIэр къызыхэкIа унагъуэрщ. Курыт школ нэужьым ар щIэтIысхьащ КъБКъУ-м и медицинэ къудамэм. Апхуэдэ щIыкIэкIи пщащэр ирикIуащ адэ-анэм, Балъкъэрхэ Антонрэ Цоцэрэ, я лъагъуэм: ахэр тIури медицинэм и лэжьакIуэт. И адэр «Чайка» санаторэм и рентген IэнатIэм щылажьэрт, и анэр «Грязелечебница» IуэхущIапIэм и бальнеофизиотерапевтическэ къудамэм щыIэт. Я пщIэр лъагэу, зыхэт гупым къыщалъытэу апхуэдэт ахэр. И нэхъыжьхэм IэщIагъэ яхуэхъуам хуаIэ бгъэдыхьэкIэр зи нэгу щIэту къэхъуа Маринэ абыхэм я щапхъэр и гъуазэу зыпэрыхьэ сыт хуэдэ IэнатIэри нэгъэсауэ ирихьэкIыу къогъуэгурыкIуэ.

КъБКъУ-м и медицинэ къудамэр къиуха нэужь, абы «Терек» санаторэм неврологыу лэжьэн щыщIидзащ. ИужькIэ илъэси 10-кIэ къалэ клиникэ сымаджэщ №I-м щылэжьащ. Дохутыр IэщIагъэм къыдэкIуэу, абы фIы дыдэу хэзэгъауэ ирихьэкIащ а сымаджэщым и профкомым и тхьэмадэ къулыкъури. 2003 гъэм щегъэжьауэ 2011 гъэ пщIондэ Дол Маринэ лэжьащ «Капитал медицинское страхование» ЗАО-м и унафэщIым и къуэдзэу. Илъэс 14 хъуауэ ар мы IуэхущIапIэм и дохутыр нэхъыщхьэщ. 

Республикэм узыншагъэр хъумэнымкIэ и IэнатIэм щекIуэкIа зэхъуэкIыныгъэхэм япкъ иткIэ, поликлиникэм нэгъуэщI IуэхущIапIэхэри къыхагъэхьэжащ, апхуэдэ щIыкIэкIи ягъэзащIэ лэжьыгъэми яхь жэуаплыныгъэми къыхэхъуащ. ЩоджэнцIыкIум и цIэр зезыхьэ уэрамым тет поликлиникэм иджы иIэщ къудамищ. Зыр Мечиевым и уэрамым тетщ, адрейхэр Хьэсэней, Кэнжэ къуажэхэм дэтщ. 

Зи унафэщI поликлиникэм и лэжьыгъэр тэмэму зэтеухуауэ екIуэкIыным гулъытэ хуищI зэпытщ Маринэ, фIагъ лъагэ зиIэ медицинэ Iуэхутхьэбзэхэр цIыхухэм яхуэщIэным хуэунэтIауэ IэнатIэм щIэуэ къыхыхьэхэр я лэжьыгъэм къызэрыщагъэсэбэпыным хущIокъу. IуэхущIапIэм цIыху мин 56-м медицинэ дэIэпыкъуныгъэхэр щагъуэт. IэщIагъэлI нэсхэмкIэ ирикъуу къызэгъэпэщащ. «Узыншагъэ» лъэпкъ проектым хэту поликлиникэм зыхуеину Iэмэпсымэхэр къыIэрыхьащ. IуэхущIапIэр иджырей мардэхэм тету къагъэщIэрэщIэжащ, сыт и лъэныкъуэкIи зыхуей хуэзэу абы зэгъэпэщыжыныгъэ лэжьыгъэхэр щрагъэкIуэкIащ. Iэмал зимыIэ медицинэ страхованэм и полисхэмкIэ цIыхухэм пщIэншэу медицинэ дэIэпыкъуныгъэхэр ягъуэт, сымаджэхэм я Iуэхухэр нэхъ псынщIэу икIи тыншу зэрызэфIэкIынум теухуауэ я лэжьыгъэр убзыхуащ. Поликлиникэм къыщыпхуащIэну Iуэхутхьэбзэхэр зыхуэдэм, абы щекIуэкI лэжьыгъэм ухэзыгъэгъуазэ хъыбар кIэщIхэр къыщыпщIэфынущ IуэхущIапIэм и пэIущIэ пэшым. Апхуэдэу IэнатIэм электрон Iэмалхэр къыщагъэсэбэп, абы и фIыгъэкIэ цIыхухэр чэзум хэмыту, здэкIуэну дохутырым и деж регистратурэм зыщрагъэтх. КъищынэмыщIауэ, поликлиникэм хэту мэлажьэ пIалъэ къызыхэкI мыхъуну медицинэ дэIэпыкъуныгъэр щрат IуэхущIапIэ. Апхуэдэ дэIэпыкъуныгъэр унэм щыхуащIэнущ уз гъэтIылъа зиIэу дохутырхэр зыкъом щIауэ зыкIэлъыплъхэми асыхьэтым къытехуауэ узым хигъэзыхьхэми. Абы папщIэ поликлиникэм сымаджэхэр щатх и къудамэм упсэлъэн хуейуэ аращ. КъищынэмыщIауэ, поликлиникэм хэтщ махуэрылажьэ сымаджэщ, гъуэлъыпIэ 64-рэ щIэту.

- Сэ сызэреплъымкIэ, дохутыр IэщIагъэр псом нэхърэ нэхъ гугъущ, - жеIэ Дол Маринэ. – ЦIыху гъащIэр зи IэмыщIэ илъым ихь жэуаплыныгъэр куууэ зыхищIэу, и зэфIэкIрэ и щIэныгъэрэ къигъэсэбэпу жэщ-махуэ имыIэу сымаджэм зэрыдэIэпыкъуным хущIэкъуу щытыпхъэщ. Тыншкъым ар, ауэ а IэщIагъэр къыщыхэпхакIэ абы къыдэкIуэ гугъуехьми ухуэхьэзырын хуейщ. Уигури уи псэри етауэ бгъэзащIэ лэжьыгъэрщ ехъулIэныгъэ къыпхуэзыхьынур. Ди къалэн нэхъыщхьэр цIыхухэм фIагъышхуэ зиIэ медицинэ Iуэхутхьэбзэхэр яхуэщIэнырщ, ар тхузэфIэкIын папщIэ зэрызыдужьыным, ди Iэзагъэм зэрыхэдгъэхъуэным дыхущIэкъупхъэщи, а Iуэхуми сытым дежи гулъытэ худощI. Мыхьэнэшхуэ идот ди цIыхухэм гъащIэ узыншэ ирахьэкIыну къыхуедджэнми. Абы и лъэныкъуэкIи щIэх-щIэхыурэ Iуэхугъуэ щхьэхуэхэр идогъэкIуэкI. ЕхъулIэныгъэ дыщиIэнур гупыр зэкъуэту зы Iуэхум дытелажьэмэщ. Абы ипкъ иткIи поликлиникэм и лэжьыгъэр адэкIи зэредгъэфIэкIуэным зэрыгупу ди къару идохьэлIэ.

Зэрынэрылъагъущи, и гуащIэ емыблэжу и лэжьыгъэм пэрытщ Маринэ. И нэIэм щIэт IуэхущIапIэм щекIуэкI псоми щыгъуазэщ а бзылъхугъэр: и лэжьакIуэхэми сымаджэхэми гулъытэ яхуищIу, унэтIыныгъэм щIэуэ къыхыхьэ псори IэнатIэм къызэрыщигъэсэбэпыным, ар зыужьыныгъэщIэхэм зэрыхуишэным хущIэкъуу и къалэныр ирехьэкI. ЖыпIэнурамэ, унафэщI гумызагъэщ. Апхуэдэ Iуэху бгъэдыхьэкIэрщ къызыпэкIуар Долым къыхуагъэфэща къэрал дамыгъэ лъапIэр. 

Узыншагъэ быдэ иIэу, и лэжьыгъэм хъер къыпэкIуэу, и зэфIэкIым хэхъуэу, ехъулIэныгъэщIэхэр иIэу, зыхэт гупым, жылагъуэм я деж и пщIэр щылъагэу илъэс куэдкIэ и IэнатIэм пэрытыну ди гуапэщ!