Къэралым ядеIыгъ

8 августа, 2025 - 11:15
Ди республикэм и IуэхущIапIэхэм щIыналъэ льготэ зэхуэмыдэхэр зиIэхэм щыщхэр лэжьапIэ къызэращтэм щхьэкIэ Соцфондым и Къэбэрдей-Балъкъэр къудамэм къэрал дэIэпыкъуныгъэ хэхахэр абыхэм яритынущ. Псалъэ папщIэ, абы хохьэ юридическэ лицохэр, уней, фейдэ къегъэщIыныр зи лэжьыгъэу щымыт IуэхущIапIэхэр, ныкъуэдыкъуэхэм я урысейпсо жылагъуэ зэгухьэныгъэхэр, нэгъуэщIхэри.
  ЖыпIэнурамэ, дзэ Iуэху хэхам и ветеранхэр, ныкъуэдыкъуагъэкIэ льготэ зиIэ гупхэм хиубыдэхэр, зи закъуэу бын зыпI анэхэмрэ сабий куэд зиIэхэмрэ, нэгъуэщIхэри лэжьапIэ къэзыщтэ IуэхущIапIэхэм улахуэу абыхэм иратынур субсидие хуащIынущ. НыкъуэдыкъуагъэкIэ 1-2-нэ гупхэм хыхьэхэм лэжьыгъэ IэнатIэхэр щхьэхуэу къахузэзыгъэпэщхэмрэ ахэр зэрылэжьэфын Iэмэпсымэхэр, оборудованэхэр къэзыщэхухэмри къэрал дэIэпыкъуныгъэхэр иратынущ. 
ЛэжьакIуэхэм ирата улахуэм щхьэкIэ субсидие къыIахыжын папщIэ, IуэхущIапIэхэм щIыпIэ Соцфондым лъэIу щIалъхьэн хуейщ, абыхэм щхьэкIэ щыIэ реестрым хагъэхьэн щхьэкIэ, цIыхур лэжьапIэ къащтэу мазэ дэкIа нэужь е илъэс екIуэкIым и дыгъэгъазэм и 15-м фIамыгъэкIыу. Субсидиер Iыхьищу зэпаудынущ: цIыхур лэжьапIэ къызэращтэрэ зы мазэ, мазищ, илъэс ныкъуэ дэкIа нэужь къратыжыну. Зы лэжьакIуэм хуэзэу Соцфондым итыжыну ахъшэр псори зэхэту сом 67 320-рэ мэхъу.
2025 гъэм щегъэжьауэ ныкъуэдыкъуагъэкIэ 1-2-нэ гупхэм хиубыдэхэмрэ дзэ Iуэху хэхам ныкъуэдыкъуагъэ хэзыха ветеранхэмрэ IэнатIэхэр къахузэзыгъэпэщ, лэжьэфын щхьэкIэ ахэр зыхуеину Iэмэпсымэхэмрэ оборудованэхэмрэ къэзыщэху IуэхущIапIэхэм субсидиеу сом мин 200-м нэблагъэ иратыжынущ. Ауэ абы щхьэкIэ цIыху къащтар мазибгъум щIигъукIэ зы IэнатIэм щылэжьэн хуейщ. 
Лэжьыгъэ зэгурыIуэныгъэр лэжьакIуэм зэрыращIылIэрэ мазищ зэрыдэкIыу, IуэхущIапIэм лъэIу тхылъыр республикэм цIыхухэм лэжьыгъэ къахуэзыгъуэт и центрым щIелъхьэ, IэнатIэ къызэрызэIуихамрэ къищэхуа Iэмэпсымэхэмрэ щыхьэт техъуэ дэфтэрхэр щIыгъуу. АдэкIэ, дэфтэрхэм дагъуэ хуамыщIу щытмэ, центрым ахэр щIыпIэ Соцфондым хуегъэхь, IуэхущIапIэр реестрым хагъэхьэн, тригъэкIуэда мылъкур компенсацэ хуащIыжын, ахъшэ къратыжын щхьэкIэ.
МЫСОСТ Башир.
  • 51 просмотр
Поделиться:

Читать также:

11.05.2026 - 15:18 → ЩIэуахътыншэри аращ
11.05.2026 - 14:16 → ЗауитIми я лIыхъужь
11.05.2026 - 13:15 → 115-нэ шуудзэм теухуауэ иджыри зэ
11.05.2026 - 12:13 → Щапхъэ дахэ игъэлъагъуэрт
11.05.2026 - 10:11 → ЦIыху зэпIэзэрыт