Мэкъумэш IэщIагъэлIхэр ягъэхьэзыр

Къэбэрдей-Балъкъэр къэрал мэкъумэш университетым щылажьэ «Фермерым и еджапIэ» егъэджэныгъэ пэхуэщIэм и программэмкIэ мэкъумэш IэнатIэм IэщIагъэлI 30 мы гъэм ­хуагъэхьэзыращ. Псом нэхърэ нэхъ хьэлэмэту мыгъэрей къыщIэкIыгъуэм хэтыр, япэм къэмыхъуауэ, дзэ Iуэху хэхам и ветеран 23-рэ абы зэрыхиубыдарщ.

Мэкъумэш IэщIагъэлIхэм я дипломхэр щратыжым щыIащ КъБКъМУ-м и ректор къалэнхэр пIалъэкIэ зыгъэзащIэ Щхьэгъэ­псо Заурбий, «Урысеймэкъумэшбанкым» и Къэбэрдей-Балъкъэр къудамэм и унафэщI Сокъур Алим, КъБР-м мэкъумэш хо­зяйствэмкIэ и министрым и къуэдзэ Чеченов Ислъам, респуб­ликэм экономикэ зыужьыныгъэмкIэ и министрым и къуэдзэ ­Белецкая Ольгэ, «Хэкум и ХъумакIуэхэр» фондым щIыналъэ ­къудамэм и тхьэмадэ Дадэ МуIэед сымэ, нэгъуэщIхэри.
ЗэIущIэр къыщызэIуихым, Щхьэгъэпсо Заурбий къыхигъэщащ мэкъумэш университетым и егъэджакIуэхэмрэ щIэныгъэлIхэм­рэ, КъБР-м Мэкъумэш хозяйствэмкIэ, Экономикэ зыужьыныгъэмкIэ и министерствэхэм, щIыпIэ «Урысеймэкъумэшбанкым», щIыналъэм и мэкъумэш IуэхущIапIэ нэхъ инхэм я лэжьакIуэхэм я дерсхэр «Фермерым и еджапIэм» щIэсахэм зрагъэгъуэта щIэ­ныгъэм лъабжьэ зэрыхуэхъуар. Егъэджэныгъэ пэхуэщIэр ­мэкъумэш университетым щолажьэ илъэситI хъуауэ. 
«Фермерым и еджапIэр» къыхэзылъхьа икIи къызэгъэпэща­кIуэ нэхъыщхьэхэм хыхьэ «Урысеймэкъумэшбанкым» и лэ­жьа­кIуэхэр еджакIуэхэм я бизнес-планхэр зэхэгъэувэнымкIэ, чэнджэщхэмкIэ ядэIэпыкъуащ. Сокъур Алим къыхигъэщащ республикэм и мэкъумэш IэнатIэм IэщIагъэлIхэр хуэгъэхьэзыры­-ным банкыр зэрыхэлIыфIыхьыр зэригуапэр.
«ПэхуэщIэм дызэрыхэтам и сэбэп куэд къыдэкIащ, псом хуэмыдэу Iэмал диIащ ди щIыналъэм и мэкъумэш IуэхущIапIэ ­нэхъыфIхэм дыщыIэну, абыхэм я лэжьыгъэ зэтеухуэкIэхэм зы­щыдгъэгъуэзэну. Ди IэнатIэхэм къыщытхуэщхьэпэн щIэныгъэ къыдатащ, ди Iуэху еплъыкIэхэмкIэ дызэхъуэжащ, нэхъ гъунэ­-гъуу дызэрыцIыхуащ. Мис ахэр щынэхъыщхьэщ абы. Иджы, щIэныгъэм къыдэкIуэу, мэкъумэш бизнесым, пэхуэщIэ ехьэжьахэм зедгъэужьын папщIэ, зэпыщIэныгъэ быдэхэр диIэщ», - жиIащ «Жыг хадэгъэкI» унэтIыныгъэм хуеджа Габоевэ ФатIимэ.