Кавказ Ищхъэрэм и щIыналъэхэм я махуэшхуэр

«Мэшыкъуэ» щIалэгъуалэ урысейпсо XVI-нэ зэхуэсышхуэм и лэжьыгъэр шыщхьэуIум и 9-м щыщIэдзауэ 23 пщIондэ Пятигорск и Комсомол губгъуэм щокIуэкI. Зэхыхьэр къызэригъэпэщащ «Росмолодежь. Форумы» IуэхущIапIэм, «ЩIалэгъуалэмрэ сабийхэмрэ» лъэпкъ Iуэхум хыхьэу. Ар траухуащ Хэкур хъумэным и гъэу мы илъэсыр зэрагъэувамрэ Хэку зауэшхуэм ТекIуэныгъэ Иныр ди къэралым къызэрыщихьрэ илъэс 80 зэрырикъумрэ. Иджыблагъэ абы щызэхэтащ Кавказ Ищхъэрэ федеральнэ щIыналъэм и махуэшхуэр.

А махуэм «Мэшыкъуэ» зэхуэсым хэт ЩIалэгъуалэм я нэгу зрагъэужьащ, пщыхьэщхьэм концерт щIэщыгъуэ ирагъэплъащ. Кавказым икIа щIалэхэмрэ хъыджэбзхэмрэ утыкур гукъинэжу ягъэбжьыфIауэ жыпIэ хъунущ.

ЯпэщIыкIэ Ставрополь крайм и уэрэджыIакIуэ-къэфакIуэ ансамблым урыс цIыхубэ къафэхэм ящыщхэр игъэлъэгъуащ. Ингуш Республикэм и лIыкIуэхэм ингушыбзэрэ урысыбзэкIэ уэрэдхэр жаIа нэужь, зэхыхьэм хэтхэр ирагъэблагъэри, я цIыхубэ къафэр ягъэзэщIащ. Къэбэрдей-Балъкъэрым и уэрэджыIакIуэ гупым абы щыжаIа уэрэдым Комсомол губгъуэм щызэхуэса псори дежьууащ. Ди щIыналъэм и къэфакIуэ сабий ансамблым игъэзэщIа лъэпкъ къафэхэр ягу дыхьащ, шэч хэмылъу. Абы къыпызыща Къэрэшей-Шэрджэс Республикэм и щIалэгъуалэм я хэкум и дахагъэм теухуа уэрэдри псоми гунэс ящыхъуащ. Апхуэдэу лъэпкъ фащэ зэкIужхэр зыщыгъ осетин щIалэгъуалэм утыкур ягъэдэхащ, я уэрэдхэмрэ къафэхэмрэ гукъинэж ящыхъуащ. Кавказым теухуа уэрэдкIэ пшыхьыр ягъэдэхащ Шэшэн Республикэм и цIыхухъу уэрэджыIакIуэ ансамблым. КIэщIу жыпIэмэ, пшыхьым зрезыгъэхьэлIахэм цIыхубэ къафэрэ уэрэдкIэ зрагъэгъэнщIащ. Кавказ Ищхъэрэм и щэнхабзэ къулеигъэм щыхьэт зэрытехъуэм къыдэкIуэу, лъэпкъхэм я зэкъуэтыныгъэр нэхъри зыгъэбыдэ зэхыхьэт ар.

Зэхыхьэм зэхуишэсащ Урысейм, абы и гъунэгъу хэкухэм щыщ, илъэс I4-м щыщIэдзауэ 35-рэ ныбжьым ит щIалэгъуалэ 2250-рэ. Абыхэм яхэтщ егъэджакIуэхэр, гъэсакIуэхэр, «Пэрытхэр» зэгухьэныгъэм щыщхэр, УФ-м и Президентым Сабийм и хуитыныгъэхэр хъумэнымкIэ и уполномоченнэм и деж щыIэ федеральнэ сабий жылагъуэ советым и лIыкIуэхэр. Лагерыр сменитIу – «Призвание», «Миссия» - зэблэкIынущ. Зэхуэсыр трагъэщIэнущ тхыдэ фэеплъхэм, ныбжьыщIэхэр Хэку зауэшхуэм и лIыхъужьхэм зэрахьа лIыгъэм, блэкIам хэгъэгъуэзэным.

Урысейм и щIыналъэхэм икIауэ зэIущIэм хэтхэм трагъащIэ щIэблэр хэкупсэу гъэсэн зэрыхуейм, тхыдэм и пэжыр хъумэным щIалэгъуалэм хуащI хэлъхьэныгъэхэм, егъэджакIуэхэмрэ гъэсакIуэхэмрэ цIыхум, жылагъуэм, къэралым я зыужьыныгъэм хуащI хэлъхьэныгъэм. Зэхыхьэм апхуэдэу гулъытэ щыхуащI зэхуэсахэр егъэджакIуэ IэщIагъэм дегъэхьэхыным, абы и пщIэр къэIэтыным, къэралым и хабзэхэм, щIэныгъэмрэ гъэсэныгъэмрэ я лъапIэныгъэхэм.

ЗэIущIэм егъэджэныгъэ лэжьыгъи щокIуэкI, дерс зэIухахэр, дзэ Iуэху хэхам и ветеранхэм щаIущIэ пшыхьхэр къызэрагъэпэщ. «Мэшыкъуэ» лагерым япэу щIалэгъуалэ клубхэр къыщызэрагъэпэщащ. ХьэщIэ лъапIэхэм я гъусэу абыхэм методикэ лэжьыгъэхэр ягъэхьэзыр. Урысейм и егъэджакIуэ цIэрыIуэхэм я цIэхэр фIащащ а клубхэм: «Макаренкэ», «Ушинский», «Шаталов», «Сухомлинский». ЩIалэгъуалэм Iэмал яIэщ я лэжьыгъэхэр Урысейм и щIалэгъуалэм я грантхэр къэхьыным хуэунэтIа зэпеуэм хагъэхьэну.

Лагерым щызэхуэсахэр кIэлъыплъынущ Мэшыкъуэ бгым тет къуэшыкхъэм, Комсомол губгъуэм и Iэгъуэблагъуэм щыIэ Пост №1-м деж лIыхъужьхэм зы дакъикъэкIэ щахуэщыгъуэнущ, «Полк уахътыншэм», нэгъуэщI фэеплъ Iуэхухэм хэтынущ, Пятигорск къалэм дэт дзэ фэеплъхэм кIуэнущ. КъинэмыщIауэ, щIалэгъуалэр бгым кIапсэкIэ дэпщеинущ, спорт зэхьэзэхуэхэм я зэфIэкI щеплъыжынущ, Кавказым и къалэхэм зыщаплъыхьынущ, «Шоу талантов» зэпеуэм, фэилъхьэгъуэхэмрэ IэпщIэлъапщIагъэмкIэ мастер-классхэм, пшыхь гъэщIэгъуэнхэм хэтынущ.

ЩIалэгъуалэм абдеж Iэмал щаIэщ я Iуэху бгъэдыхьэкIэкIэ зэчэнджэщыну, иджырей IэмалыщIэхэр утыку ирахьэну, я щIэныгъэм хагъэхъуэну. Япэхэми хуэдэу, «Мэшыкъуэ» зэхуэсыр щIалэгъуалэр гъэсэнымкIэ, IуэхущIэхэм тегушхуэнымкIэ зыхуэбгъадэ хъун щымыIэ утыкуу къалъытэ.