И хъуэпсапIэр зригъэхъулIащ

Зыпэрыт Iуэхум фIыуэ хэзыщIыкI IэщIагъэлIщ ЛIыхъугу Аринэ. Лэскэн щIыналъэм хыхьэ Урыху къуажэм дэт курыт школ №1-р дыщэ медалкIэ къиухащ пщащэм. Еджэным фIыуэ хэзэгъа хъыджэбзым сыт хуэдэ Iуэхугъуэми и зэфIэкI щигъэлъагъуэрт, республикэ, хэгъэгу зэпеуэ, конференцэ зэхуэмыдэхэм я утыку итащ, и къэухьым щыхьэт техъуэ фIыщIэ, щытхъу тхылъхэр мымащIэу къыхуагъэфэщащ. ЕджапIэ нэужьым ар щIэтIысхьащ КъБКЪУ-м и медицинэ факультетым.

- Дохутыр сыхъуныр сызэрыцIыкIурэ си хъуэпсапIэт, нэгъуэщI IэщIагъэ сыпэрытынкIэ хъунуи зэи сигу къэкIакъым, - жеIэ пщащэм. – Дыдейхэм зэрыжаIэжымкIэ, илъэсищ сыщыхъуам дохутыр къызэрысхэкIынур къагурыIуат. Гуащэ хьэпшыпкIэ сыджэгуми сабийхэм сахэтми, сытым дежи зыгуэрым «сеIэзэну», «згъэхъужыну» иужь ситт. Апхуэдэу унагъуэм щIэсхэми я «дохутырыр» сэрат. Сэ сыкъызыхуигъэщIауэ къэслъытэр а IэщIагъэрати, си хъуэпсапIэр Тхьэм къысхузэпищащ.

Лэжьыгъэм зи нэ къыхуикI хъыджэбзыр 4-нэ курсым щIэсу Республикэ сабий клиникэ сымаджэщым реанимацэмкIэ и къудамэм медсестрауэ лэжьэн щыщIидзащ. ИлъэситIкIэ абы щыIауэ Налшык къалэ дэт Поликлиникэ нэхъыщхьэм и ковид центрым уващ, иужькIэ и лэжьыгъэм щыпищащ госпиталым.

- Сабий реанимацэм ущылэжьэныр зэрыхьэлъэр гурыIуэгъуэщ: абы и узыр  уи псэм зэрыдэбгъахуэм нэмыщкIэ, адэ-анэм я гузэвэгъуэри ядыбогуэш, - къыпещэ ЛIыхъугум. – КъищынэмыщIауэ, жэщым сылажьрэти, махуэм еджапIэм сыкIуэрт. Ипэхэм нэхъ къыстехьэлъащ, ауэ сыт хуэдизу гугъу сехьми, кIуэ пэтыхукIэ къызгурыIуэрт сызыпэрыт Iуэхур сигу зэрырихьыр, абы сызэрыдихьэхыр. Сабийр гуфIэу, адэ-анэм дэрэжэгъуэ яIэу уащыIуплъэкIэ, узэрешар зэуэ пщогъупщэжри, уи лэжьыгъэм и IэфIыр зыхыбощIэ. Сымаджэхэм е абыхэм я Iыхьлыхэм къабгъэдэкI «Тхьэр арэзы къыпхухъу!» псалъэхэм дохутырым и гуащIэр къызэщIегъэрыуIуэж.  Лэжьыгъэм хэсча япэ лъэбакъуэхэр хьэлъэу щытами, къыхэсха IэщIагъэмкIэ сызэрыщымыуар, абы сыкъызэрыхуигъэщIар а лъэхъэнэм къызгурыIуакIэт.

И еджэным адэкIэ зэрыпищэжын хуейр фIыуэ къызыгурыIуэ хъыджэбзыр КъБКъУ-м и ординатурэм щIэтIысхьэжащ. Лэжьыгъэри еджэнри зэгъусэу пхуздэхьмэ, Iуэхум и пIалъэр нэхъ псынщIэу къапщIэу, IэщIагъэми нэхъ тыншу ухэзагъэу къелъытэ пщащэм.

- Медицинэм и дэтхэнэ унэтIыныгъэри гъэщIэгъуэнщ, языхэзми уи къэухьым зезыгъэужь куэди къыхэпхыфынущ, щIэ гуэри хэплъхьэфынущ, - къехегъэщ дохутыр ныбжьыщIэм. – Республикэ сабий клиникэ сымаджэщым реанимацэм и къудамэм сыщыщыIэм онкологие, неврологие унэтIыныгъэр нэхъ сигу къыдыхьэу, а тIум зытезгъэщIэнур къысхуэмыщIэурэ екIуэкIащ. Иужьым неврологием нэхъ сыдихьэхыжри, абы сыкъытеувыIащ.

Сэ сызэреплъымкIэ, дохутыр лэжьыгъэр адрей псом хуэдэжкъым. ЦIыху гъащIэмрэ узыншагъэмрэ я хъумакIуэхэр нэгъуэщI IэщIагъэхэм пэрытхэм куэдкIэ ефIэкIын хуейщ. Дохутырыр щыуэну, дзыхэну хуиткъым, IэнатIэм къапигъаплъэ щытыкIэ къызэрымыкIуэхэм псынщIэу и хэкIыпIэр къалъэгъуфу щытыпхъэщ. Абы къыхэкIыуи фIыуэ егупсысын хуейщ  IэщIагъэр къыщыхахкIэ.

- Егъэлеяуэ жэуаплыныгъэшхуэщ дохутыр IэщIагъэр. Уи зы щыуагъэ цIыкIур къэгъэнауэ, псалъэ закъуэми сымаджэм и гъащIэр къызэригъэзэкIыфынущ, - жеIэ ЛIыхъугу Аринэ. – Аращи, IэщIагъэмкIэ щIэныгъэ зэрыббгъэдэлъыпхъэр гурыIуэгъуэщ, ауэ абы и закъуэкIэ куэд щыпхузэфIэкIынукъым ди IэнатIэм. Дохутырым дежкIэ цIыхугъэмрэ гущIэгъумрэ узыфIэмыкIыфын хьэлщ, сымаджэр зэхэпщIыкIыфыным мыхьэнэшхуэ иIэщ. Псом япэрауэ, абы и псэм телъ гузэвэгъуэр псалъэкIэ щхьэщыпхыфын хуейщ. ИужькIэщ уи щIэныгъэмрэ Iэзэгъуэмрэ щхьэпагъ нэхъ щаIэнур. Дохутыр IэщIагъэм укъыхуигъэщIауэ щытын хуейщ абы и гугъуехь псори уи фэм дэхуэн папщIэ. Умыжейуэ жэщ-махуэр щыбгъакIуи, уи шхэгъуэр щыблэбгъэкIи Iэджэрэ къыпхуохуэ, жыпIэнурамэ уи щхьэ Iуэхум ущыхунэмысыжыр нэхъыбэщ. А псом къищынэмыщIауэ, уи щIэныгъэм сытым дежи хэбгъэхъуэн хуейщ, нобэ медицинэм зыужьыныгъэшхуэхэр щокIуэкI. IэщIагъэм уехъулIэну ухуеймэ, IэнатIэм щIэуэ къыхыхьэ псоми зыщыбгъэгъуэзапхъэщ. Си щхьэкIэ сыкъапщтэмэ, медицинэ тхылъхэр, журналхэр щIызоджыкI, конференцэхэм сыхэтщ, интернетми куэд къыщызощIэ.

И IэщIагъэмкIэ бгъэдэлъ щIэныгъэм, зэфIэкIым адэкIи зэрыхигъэхъуэнырщиджыпстукIэ ЛIыхъугум и гъащIэм увыпIэ нэхъыщхьэ щызубыдыр.

ЩхьэщэмыщI Изэ.