Зэныбжьэгъугъэм и шэсыпIэ

ФокIадэм и 12 - 14-хэм Къэбэрдей-Балъкъэрым и щIыналъэхэм щекIуэкIынущ «Кавказ Ищхъэрэм ис лъэпкъхэм я зэныбжьэгъугъэ» фIэщыгъэр зезыхьэ, лъакъуэрыгъажэмкIэ 33-нэ зэхьэзэхуэм и 9 - 11-нэ Iыхьэхэр. Спортсменхэм махуэ зыбжанэм къриубыдэу ди республикэм щызэпачыну къапэщылъщ псори зэхэту километр 380-м щIигъу гъуэгуанэр.

А къызэдэжэр траухуащ ТекIуэныгъэ Иныр илъэс 80 мы гъэм зэрырикъуам.

Налшык къалэм Абхъазым и утыкум фокIадэм и 12-м зэпеуэр щрагъэжьащ икIи фокIадэм и I4-м Безенги аузым ар щаухынущ.

Зэхьэзэхуэр 1994 гъэм щегъэжьауэ ирагъэкIуэкI икIи Урысей Федерацэм лъакъуэрыгъажэ спортымкIэ и чемпионатхэм я зы Iыхьэу щытщ. Хабзэ зэрыхъуауэ, абы щызэпоуэ УФ-м, Белоруссием, Къэзахъстаным, Хьэрып Эмират Зэгуэтхэм я командэхэр.

Мыгъэрей зэпеуэр щекIуэкIынущ Адыгейм, Краснодар крайм, Къэрэшей-Шэрджэсым, Къэбэрдей-Балъкъэрым, Осетие Ищхъэрэ – Аланием, Шэшэным я щIыналъэхэм. А махуэхэм къриубыдэу псори зэхэту километр I500-рэ гъуэгуанэ спортсменхэм къызэранэкIынущ.

Зэхьэзэхуэм кърикIуахэм ятеухуа хъыбар ди газетым и къыкIэлъыкIуэ къыдэкIыгъуэм тетынущ.