Я фэеплъыр яхъумэ

Жэпуэгъуэм и 13-р  Къэрал кIуэцI органхэм я лэжьакIуэхэу зи къалэн зыгъэзащIэу хэкIуэдахэм  я фэеплъ махуэщ 

2005 гъэм жэпуэгъуэм и 13-м   IэщэкIэ зэщIэузэда бзаджащIэхэр  ятеуат хабзэхъумэ,  къарузехьэ IэнатIэ 18-м.  Абы хиубыдат Урысей ФСИН-м и Управленэу КъБР-м щыIэм и хэщIапIэри. МахуитIкIэ екIуэкIа зэхэуэм хэкIуэдащ IэнатIэм и лэжьакIуи  5.    

Республикэм щыIэ УФСИН-м и хэщIапIэм деж  сыхьэти 10-м  Iэщэ уэ макъ къыщыIуащ. КъатегуплIахэм япэу япэщIэхуащ къэрал кIуэцI къулыкъум и майор  Нурсахатов Джумагельды.  А пщэдджыжьым ар ежьэрт  пщэрылъ къыщащIар игъэзэщIэну.  Къыщапщытэ-щыблагъэкI пунктым и бжэр Iуихри, офицерым     уэрамым гу щылъитащ камуфляжхэр зыщыгъхэм, нэкIу Iупхъуэ фIыцIэхэр зыIулъ, Iэщэ зыIыгъхэм. Нурсахатовыр къыщалъагъум,  бзаджащIэхэм шэхэр къытрагъэлъэлъащ.  ЛIыхъужьу  хэкIуэда  Джумагельды ЛIыгъэм и орденыр къыхуагъэфэщащ.   

БзаджащIитIым яхузэфIэкIащ  Управленэм и пщIантIэм зыдадзэу лэжьакIуэхэм автоматхэмкIэ яхэуэн, гранатэхэри ядзырт. Абыхэм яужькIэ пщIантIэм дыхьащ «Мерседес» хужь, икIи абы исахэми уэн щIадзащ. «Вулкан» къудамэ хэхам и лэжьакIуэхэу зи плъырыгъуэхэр террористхэм къапэуври, административнэ унэм  щIыхьэну Iэмал иратакъым.

БзаджащIэхэм яхэуэн щIадзащ къэрал кIуэцI къулыкъум и сержант нэхъыщIэ   Корчагин Иванрэ   прапорщик  Хлопов Сергейрэ. ЩIэпхъаджащIэхэр къыщыдыхьам ахэр щIыбым дэтт,  бронетранспортерым пэмыжыжьэу. Машинэм зыкъуагъапщкIуэри, я лэжьэгъу    Iэщэншэхэм ядэIэпыкъуну хэтащ.  Къатеуахэм Хлоповымрэ Корчагинымрэ  яхэуэху, плъыр къулыкъум  УФСИН-м и лэжьакIуэхэр IэщэкIэ зэщIиузэдащ. ЩIалитIыр хэкIуэдащ, ауэ я ныбжьэгъухэм Iэмал иратащ бзаджащIэхэм жэуап ткIий зэрыратыным зыхуагъэхьэзырыну. Къагъэлъэгъуа лIыгъэм папщIэ, мыпсэужу тIуми къыхуагъэфэщащ ЛIыгъэм и орден.  Корчагин Иван щеджа Налшык и  школ №30-м  абы и щIыхькIэ фэеплъ пхъэбгъу къыщызэIуахащ 2017 гъэм и накъыгъэм.  Апхуэдэуи Хлопов Сергей и фэеплъыр мыкIуэдыжын щащIащ  щеджа, щыхьэрым и школ №25-м.     

Жэпуэгъуэм и  14-м наIуэ хъуащ  милицэм и ещанэ къудамэм къатеуахэм щапэувам  Налшык къалэм щыIэ, районхэм зэдай уголовнэ-гъэзэщIакIуэ инспекцэ №1-м и лэжьакIуэ, къэрал кIуэцI къулыкъум и  лейтенант  Шыкъ Эллинэ зэрыхэкIуэдар. Ар и лэжьапIэм щIэст, жэпуэгъуэм и 13-м  и пщэдджыжьым  Налшык и ОВД  №3-м и унэм бзаджащIэхэр  щыщIыхьам.    Дамателъхэр зытелъ  пщащэр абдежым щаукIащ. Шыкъ Эллинэ    къыхуагъэфэщащ  ЛIыгъэм и орден.   

Налшык къалэ  и   3-нэ   ОВД-м и деж щыIэ уголовнэ-гъэзэщIакIуэ  инспекцэ №1-м    и лэжьакIуэ, къэрал кIуэцI къулыкъум и капитан  Шыбзыхъуэ Беслъэн  и гъащIэри къызэпаудащ щIэпхъаджащIэхэм.  Абы  и къалэныр щрихьэкIырт 3-нэ ОВД-м икIи бзаджащIэхэр  япэу зытегуплIахэм ящыщщ. IукIуэтыну Iэмал иIами,  офицерым  и ныбжьэгъухэр къигъэнакъым  икIи и  пIатIронхэр иухыху  я лэжьакIуэ цIыхубзхэр ихъумащ. Абы бзаджащIэхэр нигъэсакъым Iэщэмрэ шэхэмрэ зыщIэлъ къудамэм.      Шыбзыхъуэми  ЛIыгъэм и орденыр къыхуагъэфэщащ мыпсэужу.   Беслъэн и фэеплъ пхъэбгъу щеджа, Налшык дэт 13-нэ школым 2017 гъэм  и гъатхэпэм щыфIадзащ.  

2005 гъэм жэпуэгъуэ и 13 - 14-хэм,   Урысей ФСИН-м и управленэу КъБР-м щыIэм  деж  щIэпхъаджащIэу пщIы щаукIащ.  А махуэм ныкъусаныгъэхэр ягъуэтащ административнэ унэм, къыщапщытэ-щыблагъэкI пунктым, гаражхэм,  унэлъащIэхэм, зэрылажьэ техникэм, исащ къагъэсэбэп  транспортыр. Нэхъыщхьэр икIи гущIыхьэр  уголовнэ-гъэзэщIакIуэ IэнатIэм и лэжьакIуитху зэрыхэкIуэдарщ.    

2006 гъэм и жэпуэгъуэм  УФСИН-м и хэщIапIэм щагъэуващ зи къалэн зыгъэзащIэу,  лIыгъэрэ хахуагъэрэ къагъэлъагъуэу, я псэ емыблэжу   бзаджащIэхэр изыгъэкIуэта я лэжьакIуэхэм  я фэеплъ мемориал. Абы тетхащ илъэс зэхуэмыдэхэм зи къалэн зыгъэзащIэу  хэкIуэдахэу 13-м я цIэхэр.

           БАХЪСЭН   Азэмэт.