И адэм хуэфащэ ЩоджэнцIыкIу Еленэ

ЩоджэнцIыкIу Алий и пхъу Ленэ цIыхухэм ягу къинэжащ гуапагъэр зэбэкI, цIыхугъэ зыхэлъа, щIэныгъэ куу зиIа цIыхубз гуащIафIэу. «И адэм хуэфэщэн пхъут» хужаIэ зыцIыхуу щытахэм. ГъащIэ кIыхь Тхьэм къыхузэпимыщами, къыхуиуха дэтхэнэ и зы махуэри IуэхуфIкIэ гъэнщIауэ ирихьэкIащ.

 Бахъсэн районым хыхьэ Кушмэзыкъуей къуажэм Ленэ къыщалъхуащ 1929 гъэм. Дохутыр IэщIагъэрт къыхихари, Налшык дэт фельдшер-акушер еджапIэмрэ Осетие Ищхъэрэм и медицинэ институтымрэ къиухащ. 1954 гъэм лэжьэн щыщIидзащ Республикэ сымаджэщым терапиемкIэ и къудамэм. ИужькIэ илъэс зэмылIэужьыгъуэхэм ар щытащ Республикэ сымаджэщым и терапие къудамэм и унафэщIу, УзыншагъэмкIэ министерствэм и терапевт нэхъыщхьэу, КъБКъУ-м и медицинэ факультетым госпитальнэ терапиемкIэ и кафедрэм и ассистенту, итIанэ доценту. Абы и Iэдакъэ къыщIэкIащ щIэныгъэ лэжьыгъэу 13.

ЩоджэнцIыкIур зи лэжьыгъэм гурэ псэкIэ бгъэдэт дохутырт, и IэнатIэмкIэ ихь жэуаплыныгъэр куууэ зыхищIэу, сытым дежи и къалэныр нэсу игъэзащIэу апхуэдэт. И щIэныгъэ лэжьыгъэхэм я гугъу пщIымэ, Ленэ нэхъыбэу зэлэжьар къурмакъей, тхьэмбыл уз зиIэу псчэхэм, жьы къызыпиубыдхэм я дежкIэ хущхъуэ нэхъыфIыр къэхутэнырщ. «Лечение бронхиальной астмы в условиях высокогорья» монографием абы къыщигъэлъэгъуат зи гугъу тщIы узыфэхэм уазэрыпэщIэтыфыну Iэмалхэр. А лэжьыгъэр абы игъэхьэзырат СССР-м и АМН-м и член-корреспондент, Къыргъыз медицинэ институтым терапиемкIэ и кафедрэм и унафэщI, медицинэ щIэныгъэхэм я доктор, професссор Миррахимов Мирсаид и унафэм щIэту. Ленэ куэдкIэ и фIыгъэщ Iуащхьэмахуэ лъапэ къурмакъей, тхьэмбыл узыфэ зыпкърытхэм я сымаджэщ къыщызэрызэIуахар. Къэралым и щIэныгъэлI цIэрыIуэхэр къригъэблагъэурэ абы куэдрэ конференцхэр зэхишэрт, студентхэм зыхуеджэр нэхъыфIу къагурыIуэн папщIэ, Iуащхьэмахуэ лъапэ щыIэ сымаджэщым ишэрти, IэнатIэм и щэхухэм хигъэгъуазэрт. Езым и щIэныгъэм хигъэхъуэнымкIи Ленэ сыт хуэдэ Iэмалри къигъэсэбэпырт, медицинэ тхылъхэр и Iэпэгъут, Iэзагъэм щыхагъахъуэ курсхэм щIэх-щIэхыурэ кIуэрт, конференцхэм жыджэру хэтт.

Медицинэ щIэныгъэхэм я кандидат ЩоджэнцIыкIу Ленэ зыдэлэжьахэми, иригъэджахэми, зэIэзахэми фIыуэ къалъагъурт, пщIэ къыхуащIырт. Абы и псэемыблэж лэжьыгъэри гулъытэншэ хъуакъым. Апхуэдэу Ленэ къыхуагъэфэщауэ щытащ Лэжьыгъэм и Бэракъ Плъыжь орденыр, «Илъэс куэд лъандэрэ хьэлэлу зэрылэжьам папщIэ» медалыр, КъБАССР-м и Президиумым и ЩIыхь тхылъыр, «КъБАССР-м щIыхь зиIэ и дохутыр» цIэр, нэгъуэщI къэрал дамыгъэхэр. Ар щытащ КъБАССР-м и Совет Нэхъыщхьэм и депутату.