Композитор цIэрыIуэ Молэ Владимир къызэралъхурэ илъэс 85-рэ ирокъу

Къэбэрдей-Балъкъэр Республикэм и лъэпкъ гъуазджэмрэ щэнхабзэмрэ хэлъхьэныгъэшхуэ хуэзыщIа цIыху гуащIафIэт Молэ Владимир. ИлъэсиплI ипэкIэ и ныбжьыр илъэс 81-м иту, ар дунейм ехыжащ.

Молэ Владимир Лил и къуэр Аруан районым хыхьэ Джэрмэншык къуажэм 1940 гъэм щэкIуэгъуэм и 2-м къыщалъхуащ. Налшык дэт макъамэ училищэ нэужьым, 1960 гъэм, ар щIэтIысхьащ Саратов консерваторэм, дирижёр, композитор факультетхэм зэгъусэу щIэныгъэ нэхъыщхьэ щызэригъэгъуэтащ. Апхуэдэуи абы аспирантурэр Тбилиси къыщиухащ. Абы иджыри щеджэу, Шортэн Аскэрбий и либреттэкIэ Владимир итхауэ щытащ «Нартхэр» балетыр, иужькIэ «Легенда гор» зыфIащыжар.

Молэм и къалэмыпэм къыщIэкIащ жыпхъэ зэмылIэужьыгъуэхэм ит макъамэ лэжьыгъэшхуэхэр. Абыхэм ящыщщ «Дахэнагъуэ» (япэ адыгэ лъэпкъ оперэщ), «Къамботрэ Лацэрэ» оперэхэр, трубамрэ оркестрымрэ, кларнетым папщIэ итха концертхэр, нэгъуэщIхэри. Ар жыджэру елэжьащ театрхэм, кинохэм макъамэ яхуэтхыным. Композиторым иIэщ уэрэд пщIы бжыгъэхэр, псом хуэмыдэу абы фIы дыдэу къехъулIащ и сабий уэрэдхэр. Иужьрейхэр щызэхуэхьэсауэ диск зыбжанэ дунейм къытехьащ.

Молэр Къэбэрдей-Балъкъэр къэрал филармонием и художественнэ унафэщIу, ди республикэм щэнхабзэмкIэ и министрым и къуэдзэу, Кавказ Ищхъэрэм ГъуазджэхэмкIэ и институтым Щэнхабзэмрэ гъуазджэхэмкIэ и колледжым и унафэщIу щытащ. Иужьрей илъэсхэм щылэжьащ КъБР-м и Композиторхэм я зэгухьэныгъэм.

ИСТЭПАН Залинэ.