КъБР-м и Парламентым и комитетхэм я зэIущIэхэм депутатхэмрэ республикэм и министерствэхэм я лIыкIуэхэмрэ зэгъусэу щытепсэлъыхьащ «КъБР-м и бюджетыр 2026 гъэм, 2027 - 2028 гъэхэм ятещIыхьауэ» щIыналъэ законым.
КъБР-м финансхэмкIэ и министр Лисун Еленэ къигъэлъэгъуащ республикэм и бюджетыр къэкIуэну илъэсищым зыхуэдэнур. Дэфтэрыр щагъэхьэзырым, щIыналъэм и налог, бюджет Iуэхухэр къалъытащ. АбыкIэ тегъэщIапIэ ящIащ республикэм и социально-экономикэ зыужьыныгъэр 2026, 2027-2028 гъэхэм хуэгъэфэщауэ зыхуэдэнур къыщыгъэлъэгъуа проектыр.
Лисун Еленэ къыхигъэщащ федеральнэ бюджетым и бюджет трансфертхэр трагуэшэныр зэфIэкIа иужь, щIыналъэм ейми зэхъуэкIыныгъэхэр зэрыхалъхьэжынур.
Законодательствэмрэ щIыпIэ унафэр зехьэнымкIэ, Жылагъуэ шынагъуэншагъэмрэ Iулъхьэм пэщIэтынымкIэ, Къэпщытэныгъэмрэ регламентымкIэ комитетхэм зэгъусэу ирагъэкIуэкIа зэIущIэм Iуэхугъуэ куэд щызэпкърахащ. Зытепсэлъыхьахэм ящыщщ зэзыгъэкIуж хеящIэхэм я лэжьыгъэр къызэгъэпэщыныр зи пщэ дэлъ IэнатIэм ахъшэ хухэхыным, цIыхухэм зэрызыщIагъакъуэ Iэмалхэм, сабий зеиншэхэм унэ зэрыратым, нэгъуэщIхэми теухуахэр.
ЛэжьыгъэмкIэ, социальнэ политикэмкIэ, узыншагъэр хъумэнымрэ ветеранхэм я IуэхухэмкIэ, ЕгъэджэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ, Жылагъуэм зегъэужьынымрэ хъыбарегъащIэ политикэмкIэ комитетхэм хэтхэр къытеувыIащ цIыху щхьэхуэхэр хущхъуэкIэ къызэрызэрагъэпэщынум, Паллиативнэ IэнатIэм, Лъы щат станцым зэрызрагъэужьынум, апхуэдэуи курыт школхэм зэрыщеджэ тхылъхэр къызэращэху ахъшэм щIыгъун зэрыхуейм. КъищынэмыщIауэ, депутатхэр тепсэлъыхьащ спортым хухэха щIыпIэхэр зыхуей хуэгъэзэным зэрыпащэнум, щэнхабзэ щIэинхэр къэралым зэрихъумэ щIыкIэм, «Эльбрус» щIалэгъуалэ лагерыр зэраухуэм.
ЭкономикэмкIэ, зыужьыныгъэмкIэ, туризмэмрэ хьэрычэт IуэхумкIэ, Мэкъумэш IэнатIэмкIэ, щIыуэпсыр къэгъэсэбэпынымкIэ, экологиемрэ дыкъэзыухъуреихь дунеймкIэ комитетхэм щытепсэлъыхьащ СВО-м хэтхэм, хьэрычэт ныбжьыщIэхэм къэралыр зэрадэIэпыкъунум, хьэрычэт Iуэху мащIэмрэ курытымрэ зэрызрагъэужьынум, ди щIыналъэм щыIэ къэкIыгъэхэмрэ псэущхьэхэмрэ я щытыкIэр къызэрапщытэм, псы Iуфэхэр гъэбыдэным ехьэлIа лэжьыгъэр къызэрызэрагъэпэщым, мэл гъэхъунымрэ жызум гъэкIынымрэ ахъшэ хухэхыным, нэгъуэщI куэдми.
УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэмкIэ, ПромышленностымкIэ, транспортымкIэ, связымрэ гъуэгу IэнатIэмкIэ комитетхэм я зэIущIэм гулъытэ хэха щыхуащIащ къалэхэр зэIузэпэщ щIынымрэ цIыхухэр унэжьхэм къыщIэгъэIэпхъукIынымрэ. Апхуэдэуи къыхалъхьащ сабий-ныбжьыщIэ автоеджапIэхэм зегъэужьыным, гъуэгу-транспорт фэбжьхэм сабийхэр щыхъумэным ехьэлIа Iуэхум ныбжьыщIэхэмрэ щIалэгъуалэмрэ хэшэным мылъку хухахын хуейуэ.
ЗэIущIэхэм къыщаIэта Iуэхухэм адэкIи елэжьынущ. КъБР-м и Парламентым БюджетымкIэ, налогхэмрэ финанс IуэхухэмкIэ и комитетым хуагъэхьынущ зэхъуэкIыныгъэхэмрэ гу зылъытапхъэхэмрэ.
Къыхэгъэщыпхъэщ, зэрагъэбелджылам тету, щэкIуэгъуэм и 18-м республикэм и хабзэубзыху IуэхущIапIэм законопроектым зэрыщедэIуэнур. Дэфтэрым зыщыщыбгъэгъуазэ хъунущ КъБР-м и Парламентым и сайтым (parlament.kbr.ru) «Законопроекты» и Iыхьэм.
КъБР-м и Парламентым и
пресс-IуэхущIапIэ.
