Лэжьыгъэхэр зрегъэлъагъу

Тэрч щIыналъэ администрацэм и Iэтащхьэ Хъущт Аслъэнбий иджыблагъэ щыIащ Терекскэ къуажэм, абы псы къабзэ зэрыкIуэ и бжьамийхэр зэрызэрагъэпэщыжыр зригъэлъагъун мурадкIэ.

Лэжьыгъэхэр щекIуэкI щIыпIэхэм экскаватор зэхуэмыдэу 6 кърашэлIащ, лэжьакIуэхэри гупищу гуэшащ. Абыхэм псы къыщIэшыпIэхэр иратIых, бетон гъэжа уэрдыхъу лъагэхэр ирагъэувэх, автомобиль гъуэгу лъабжьэхэм щыхуэзэм деж бжьамийхэр зэрыщIалъхьэным хуэдэу, ахэр щIаубруукI.

НобэкIэ бжьамийхэр зыдалъхьэну щIыр, псори зэхэту километр 21,7-рэ я кIыхьагъыу, датIыкIащ. Абыхэм щаукъуэдиящ я бгъуагъкIэ зэхуэмыдэу, псори зэхэту метр мин 20-м нэс зи кIыхьагъ, пластикым къыхэщIыкIа бжьамийхэр.

Псыкъуийуэ ягъэувыну яубзыхуа 101-м щыщу 50-р зэфIагъэкIащ, электрокъарур ирашэлIащ. Автомобиль гъуэгухэм я лъабжьэхэр щIыпIиблым деж щыщIатIыкIащ, футлярхэри хуащIыжащ.

Апхуэдэуи псы къыщIэшыпIэхэр яубрууащ, бетонхэр ирагъэувэхащ, псыр зэрагъэжабзэ Iэмэпсымэхэр иджыпсту ягъэув. Рожновскэм и башням (псыр уэру къыдэзышейм) хуэдэу зыхуэныкъуэу плIы кърашэлIащ. Ахэр щагъэувыну щIыпIэхэр бетонкIэ кърагъэжыкI. Павильонхэр яухуэн мы махуэхэм щIадзэнущ.

Хъущт Аслъэнбий лэжьакIуэхэм унафэ яхуищIащ я лэжьыгъэм еужьэрэкIыну икIи дызэрыт илъэсым, зэрызэгурыIуахэм тету, ахэр зэфIагъэкIыну.

Лэжьыгъэхэр ирагъэкIуэкI «ГъащIэм хуэщIа инфраструктурэ» лъэпкъ пэхуэщIэм хыхьэ «Коммунальнэ инфраструктурэр егъэфIэкIуэн» къэрал программэм ипкъ иткIэ.

Районыр къызэхекIухь

Бахъсэн щIыналъэ администрацэм и унафэщI къалэнхэр пIалъэкIэ зыгъэзащIэ Абрэдж Iэдиб лэжьыгъэ IуэхукIэ Зеикъуэ къуажэм щыIащ икIи зыщигъэгъуэзащ районым дежкIэ мыхьэнэшхуэ зиIэ, сабийхэм гъуазджэмкIэ я еджапIэр къызыхуэтыншэу зэгъэпэщыжыным ехьэлIа лэжьыгъэхэр здынэсам.

УнафэщIым къиплъыхьащ ухуэныгъэхэр щекIуэкI щIыпIэр икIи къипщытащ зэхуагъэувыжауэ щыта пIалъэм лэжьыгъэхэр къызэритIасэмрэ абыхэм я фIагъхэр зыхуэдэмрэ.

Абы иужькIэ, ухуэныгъэр езыгъэкIуэкIхэри къуажэ администрацэм и унафэщIри къыхуриджащ пэхуэщIэр ныкъусаныгъэншэу зэфIагъэкIыну, зыпэмыплъа гугъуехь гуэрхэр къыкъуэкI хъумэ, абыхэм ар щагъэгъуэзэну. ИужькIэ, ахэр ягъэзэкIуэжу, объектыр и чэзум ятын хуэдэу, къадэIэпыкъун щхьэкIэ.

Лэжьыгъэхэр щрагъэкIуэкI сабийхэм гъуазджэмкIэ я еджапIэр щаухуар 1960 гъэрщ икIи зэгъэпэщыжыныгъэ лэжьыгъэхэр абы лъандэрэ щрагъэкIуэкIакъым. ПэхуэщIэм къызэрыщыгъэлъэгъуамкIэ, щыIэ унэр зыхуей хуагъэзэным къыдэкIуэу, иджыри зы щIэуэ къыгуащIыхь, еджапIэм и зэфIэкIхэм къыхагъэхъуэн мурадкIэ. Лэжьыгъэр ирагъэкIуэкI «Унагъуэ» лъэпкъ пэхуэщIэм ипкъ иткIэ.

Апхуэдэуи Абрэджым зригъэлъэгъуащ щIалэгъуалэм я центру ХьэтIохъущыкъуей къуажэм щаухуэр здынэсар.

Мыбы инженер коммуникацэхэр щызэрахъуэкIащ, пэш бжыгъэхэр щаубзыхуащ, зыхуэгъэпса унэтIыныгъэхэм ятещIыхьауэ, ахэр къращIыкIыжащ, унэлъащIэхэр, иджырей обрудованэхэр щIагъэуващ.

Абрэджым илъэгъуахэм ятеухуа унафэ ищIащ центрым и лэжьыгъэр тэмэму зэтраублэну, абы къедза щыпIэр зыхуей хуагъэзэну.

Апхуэдэуи ар щыIащ а къуажэм ЩэнхабзэмкIэ и унэм икIи яIущIащ абы щылажьэхэм. Ахэр зыгъэпIетей, зытегузэвыхь Iуэхугъуэхэр зригъэщIащ, хэкIыпIэхэри къахуигъуэтыну зэгурыIуащ.