УнэтIыныгъэ куэд къызэщIиубыдэу

ЩIалэгъуалэ политикэм мы зэманым гулъытэ хэха зыщыхуэщIыпхъэ и унэтIыныгъэхэм щытеп­сэлъыхьащ, апхуэдэуи илъэс кIуам а IэнатIэм ­къащехъулIахэмрэ зэкIэ зыхунэмысахэмрэ я гугъу щащIащ КъБР-м и Iэтащхьэ КIуэкIуэ Казбекрэ ­республикэм щIалэгъуалэм я IуэхухэмкIэ и министр Лу Азэмэтрэ лэжьыгъэ IуэхукIэ щызэхуэзам.

ЗэIущIэм къыщыхагъэщащ мы зэманым респуб­ликэм «ЩIалэгъуалэм я щIыналъэ» Президент программэм ипкъ иткIэ щIалэгъуалэ центри 9 Налшыкрэ щIыналъэхэмрэ къызэрыщызэрагъэпэщар. Ар ­лъабжьэфIщ щIалэгъуалэ жэрдэмхэр гъэзэщIэ­нымкIэ.
IэщIагъэлIхэри ягъэхьэзыр – цIыху 500 хурагъэджащ щIалэгъуалэм ядэлэжьэным.
Илъэсым Iуэху зэмылIэужьыгъуэу 200 ирагъэ­кIуэ­кIащ, цIыху мин 250-рэ хуэдиз къызэщIиубыдэу. Апхуэдэ зэхыхьэхэм я къалэн нэхъыщхьэр щIалэ­гъуалэр хэкупсэу, жэуаплыныгъэ зыхащIэу гъэсэ-нырщ, ахэр хьэл мыхъумыщIэхэм япэIэщIэ щIынырщ. 
Зэрыщыту къапщтэмэ, «ЩIалэгъуалэмрэ сабийхэмрэ» лъэпкъ проектымкIэ зыхуагъэувыжахэр къайхъулIащ, абы теухуа лэжьыгъэхэм мы зэманми пащэ. Мы гъэм иджыри щIалэгъуалэ центритI къызэрагъэпэщынущ. Дзэлыкъуэ щIыналъэм и апхуэдэ Iуэ­хущIапIэм и лэжьыгъэр теухуауэ щытынущ щIалэ­гъуалэ туризмэмрэ мэкъумэш IэнатIэмрэ зегъэу­жьыным. Прохладнэм къыщызэIуахыну центрыр хуэгъэпсауэ щытынущ щIалэгъуалэм къыхалъхьэ хьэ­рычэт Iуэхухэр пхыгъэкIыным.
КъимыдэкIэ, илъэс хъурейм лэжьэну «Iуащхьэмахуэ» хэкупсэ лагерыр къызэIуахыным зыхуагъэхьэзыр.
КIуэкIуэ Казбек министрым пщэрылъ щищIащ Налшык фиджитал-центрышхуэ къыщызэIухыным и проектми елэжьыну. ЩIыналъэм и Iэтащхьэм шэч къыт-рихьэркъым щIалэгъуалэ куэд киберспортым зэры­дихьэхым, икIи Iэтащхьэм эфир занщIэкIэ цIыхухэм я упщIэхэм жэуап щаритыжым апхуэдэ лъэIукIэ зыкъыхуагъэзауэ зэрыщытар жиIащ.
Апхуэдэуи и гугъу ящIащ Урысейм ис лъэпкъхэм я ­зэкъуэтыныгъэм и илъэсу УФ-м и Президент Путин Владимир къыхилъхьам къриубыдэу республикэм и щIалэгъуалэр зыхэтыну Iуэхухэми. Абыхэм ящыщщ «ХьэщIэщ» республикэ проектыр, апхуэдэуи творческэ фестивалхэр, гъэлъэгъуэныгъэхэр, зэIущIэхэр, ­нэгъуэщI куэди - ирагъэкIуэкIыну Iуэхухэр щыубзыхуа программэр ягъэхьэзыр.