Зэлэжьынур ягъэбелджылы

КъБР-м и Парламентым и Президиумым гъатхэ лэжьэгъуэм хыхьэу и япэ зэIущIэр екIуэкIащ. 

Ар къыщызэIуихым, хабзэубзыху IуэхущIапIэм и Уна­фэщI Егоровэ Татьянэ депутатхэм ехъуэхъуащ лэжьыгъэ купщIафIэ яIэну. Абы къыхигъэщащ гъатхэ лэжьэгъуэр къыщызэIуах зэIущIэр зэман гъунэгъум зэрекIуэкIынур, ауэ, иужьрей зэхуэсым ягъэбелджылауэ щыта Iуэхухэм тету, Парламентым лэжьэн зэрыщIидзар. 
- Ди мурадщ законопроект 20-м щIигъум дыхэплъэну. Апхуэдэуи къэпщытэныгъэ лэжьыгъэу 30-м щIи­гъуу едгъэкIуэкIынущ. Абыхэм нэгъуэщI Iуэхухэри ­къахэхъуэнущ, - жиIащ Егоровэм. - Президиумым и къыкIэлъыкIуэ зэIущIэм республикэм узыншагъэр ­хъумэнымкIэ и IуэхущIапIэхэр зэредгъэфIэкIуэну Iэмалхэм дыщытепсэлъыхьыну тедухуащ. ЩIышылэм и кIэм, Законодательствэмрэ щIыпIэ унафэр зехьэ­нымкIэ комитетым и жэрдэмкIэ, Бахъсэн къалэм ­Парламентым и зэIущIэ щедгъэкIуэкIынущ. Ар теу­хуауэ щытынущ къалэ мыинхэм зэрызрагъэужь щIы­кIэм.
Егоровэ Татьянэ тепсэлъыхьащ депутатхэр псапэ зыпылъ Iуэхухэм, щIыналъэм и жылагъуэ-политикэ гъащIэм зэрыхэтым, апхуэдэуи нэгъуэщI щIыналъэ­хэм я хабзэубзыху IэнатIэхэм зэрадэлажьэр ирагъэ­фIэкIуэну зэрамурадым. 
КъБР-м и Паламентым и зи чэзу зэIущIэр щIышылэм и 29-м екIуэкIыну траухуащ. 
Къэпщытэныгъэмрэ регламентымкIэ комитетым и унафэщI Кансаевэ Еленэ къызэхуэсахэм ягу къигъэ­кIы­жащ 2026 гъэм япэу екIуэкIыну зэIущIэм КъБР-м и Парламентым хэмыт политикэ партхэм я лIыкIуэхэ-        ри къызэрырагъэблагъэр, Къэбэрдей-Балъкъэрым и жылагъуэ-политикэ, социально-экономикэ зыу­жьы­ны­гъэм ехьэлIауэ я Iуэху еплъыкIэхэм зэрыщедаIуэр. Парламентым и Президиумым зэриубзыхуамкIэ, мы гъэм ахэр тепсэлъыхьынущ республикэм мэкъумэш IэнатIэм иджырей мардэхэм тету зэрызыщрагъэу­жьыпхъэм. 
ЗэIущIэм депутатхэр щыхэплъащ «КъБР-м и Адвокат палатэм и квалификацэ комиссэм Парламентым и лIыкIуэхэр зэрыщыхах щIыкIэм теухуауэ» респуб­ликэ законым и проектым. Жылагъуэ шынагъуэн­шагъэмрэ Iулъхьэм пэщIэтынымкIэ комитетым и унафэщI Кривко Михаил къыхигъэщащ зи гугъу ящI законыр ирагъэфIэкIуэн мурадкIэ дэфтэрыр къызэ­рыхалъхьар. Законопроектым теухуа чэнджэщхэр ­къагъэлъэгъуэн папщIэ, IуэхущIапIэ зэхуэмыдэхэм иратащ. 
КъищынэмыщIауэ, зэIущIэм щыхэплъащ нэгъуэщI щIыналъэхэм я жэрдэмхэм. Абыхэм яхэтщ сатур къызэрызэрагъэпэщым, щэхуакIуэхэм я хуитыныгъэхэр хъумэным, псыщIэгъэлъадэ Iуэхум, волонтёр зэгухьэныгъэмрэ хьэрычэт Iуэхумрэ зегъэужьыным, УФ-м Унагъуэ, Лэжьыгъэ, административнэ хабзэхэр къызэпемыгъэудынымкIэ и Кодексхэм зэхъуэкIыныгъэхэр хэлъхьэным.