Жэуаплыныгъэ зыхэлъхэр, захуагъэм темыкIхэр

Урысей Федерацэм СледствиемкIэ и комитетыр къызэрызэрагъэпэщрэ илъэс 15 зэрырикъумкIэ  КъБР-м и Iэтащхьэ КIуэкIуэ Казбек ехъуэхъуащ СледствиемкIэ управленэу Къэбэрдей-Балъкъэр Респуб­ликэм щыIэм и лэжьакIуэхэмрэ и ветеранхэмрэ:

«Илъэс блэкIахэм къриубыдэу СледствиемкIэ комитетыр хъуащ къэралым и хабзэхъумэ IэнатIэм мы­хьэнэшхуэ зиIэ и къудамэхэм ящыщ зы.
Следователым и IэщIагъэм цIыхум къалэн щещI хабзэм куууэ хищIыкIыну, жэуаплыныгъэ хэлъыну, захуа­гъэм темыкIыу тетыну. А хьэлхэр нэгъэсауэ яхэлъщ щIыналъэм СледствиемкIэ и управленэм и лэ­жьакIуэхэм.
Нобэ фэ къалэнышхуэ фогъэзащIэ хабзэр къызэпызыудхэр къыщIэгъэ­щэнымкIэ, апхуэдэхэм япэщIэтынымкIэ, хэлъхьэныгъэшхуэ хувощI щIэп­хъа­джагъэхэр, Iулъхьэ зэIэпыхыныр къызэпыудыным хуэгъэза бэнэныгъэм, цIыхухэм я хуитыныгъэхэр хъу­мэным, апхуэдэуи къэралым и сэбэп зыхэлъхэм ткIийуэ фыкъыщхьэщож. Си гум къыбгъэдэкIыу фIыщIэ фхузощI хьэлэлу фи къулыкъур зэреф­хьэкIым, фи Iуэхум фызэрыхуэпэжым папщIэ.
Шэч къытесхьэркъым фи пщэ къыдэхуэ къалэнхэр дяпэкIи щIыхь пылъу зэрывгъэзэщIэнум, законымрэ хабзэмрэ сакъыу зэрыфхъумэнум. Узыншагъэ быдэ, ехъулIэныгъэхэр фиIэну, фи Iуэхухэр сыткIи зэпэщу щытыну сынывохъуэхъу», - щыжеIэ Iэтащхьэм и хъуэхъум.