Шагъырым хохъуэ

«РИА Новости» хъыбарегъащIэ IэнатIэм иригъэкIуэкIа къэпщытэныгъэхэм къызэрагъэлъэгъуамкIэ, УФ-м и щIыналъэхэм ящыщу илъэс блэкIам жызум шагъыру къыщыщIагъэкIам и кудагъым нэхъыбэу хэзыгъэхъуар Къэбэрдей-Балъкъэрырщ, ауэ а фадэ лIэужьыгъуэр нэхъыбэу щрагъахъуэр Краснодар крайрщ.

2025 гъэм ди къэралым шагъырыр щIыналъэ 18-м къыщыщIагъэкIащ, абы ипэ ита илъэсым абы елэжьхэр 19 хъууэ щытащ. Алтай крайр абыхэм якIэрыхуащ: нэгъабэ къыщыщIэдзауэ а фадэ лIэужьыгъуэр а щIыналъэм щрагъэхъуэжыркъым.

Мыдрейуэ, Къэбэрдей-Балъкъэрым шагъыру къыщыщIагъэкIым хуэдэ 1,8-кIэ е декалитр мин 984,4-м нэблагъэкIэ хигъэхъуащ. Абы къыкIэлъокIуэ Ленинград областыр – декалитр мелуани 3,9-рэ иIэу. Ещанэ увыпIэр Дагъыстэным иIыгъщ – декалитр мелуани 2,2-рэ.

Жызумым къыхэщIыкIа шагъыру Осетие Ищхъэрэ – Аланием щрагъахъуэм и куэдагъым Iыхьэ плIанэм хуэдизкIэ хигъэхъуащ икIи декалитр мелуани 3,4-рэ хъуащ.  Адыгейм процент 19-кIэ хигъэхъуащ икIи декалитр мелуан 1,9-рэ къыщIигъэкIащ.

Нэхъыбэ дыдэу шагъырым кIэрызыгъэхуар Тверь областырщ – хуэдэ 87-кIэ, Томск областым и зэхуэдитIым нэскIэ ар игъэмэщIащ.

Зэрыхабзэу, шагъыр нэхъыбэ нэгъабэ изыгъэхъуар Краснодар крайрщ – декалитр мелуан I5,5-рэ е къэралым псори зэхэту къыщыщIагъэкIым и процент 42-р. Абы къыкIэлъокIуэ Кърымыр – декалитр мелуани 7,1-рэ иIэу (процент 19-кIэ хэхъуащ). Ещанэу къакIуэ Ленинград областым процент 11-кIэ хигъэхъуащ илъэс блэкIам.

«Росалкогольтабакконтроль»-м ипэIуэкIэ зэбгригъэха хъыбарым къызэрыхэщамкIэ, 2025 гъэм жызумым къыхэщIыкIа шагъыру УФ-м къыщыщIагъэкIам и куэдагъым процент 13,6-кIэ хагъэхъуащ е декалитр мелуан 36,981-м нагъэсащ.                          

ЩЭУЕЙ Башир.