Гъуэгу лэжьыгъэхэр

Илъэсым икIэхэм зэфIагъэкIынущ

Бахъсэн къалэм цIыхухэр куэду щызэхуэс и щIыпIитI зэIузэпэщ ящIынущ мы гъэм «ГъащIэм хуэщIа инфраструктурэ» лъэпкъ пэхуэщIэм ипкъ иткIэ. Ахэр зэхэту метр зэбгъузэнатIэ 4300-рэ мэхъу.

Лэжьыгъэхэр щрагъэкIуэкIынущ Лениным и цIэр зезыхьэ уэрамымрэ Гагариным и цIэр зезыхьэ уэрамымрэ щызэхыхьэ щIыпIэм къыщыщIэдзауэ 103-нэ унэм деж нэсыху Iыхьэм, УхуакIуэхэм я жыг хадэ цIыкIум.

Проектым къызэрыщыгъэлъэгъуамкIэ, лъэс лъагъуэхэм плиткэхэр иралъхьэнущ, мывэхэмкIэ кърагъэбыдэкIынущ, уэздыгъэхэр щыпадзэнущ, тетIысхьэпIэхэмрэ кIэрыхубжьэрыху идзыпIэхэмрэ щагъэувынущ, жыгыщIэхэр щыхасэнущ.

Апхуэдэуи, мыбдежым щытщ цIыху мин 1,5-м нэблагъэ щыпсэу, къат куэду зэтет унэхэр, Къэбэрдей-Балъкъэр мэкъумэш колледжыр, щIыпIэ МВД-м, Бахъсэн районым и прокуратурэм, ЦIыхухэм лэжьыгъэ IэнатIэхэр къахуэзыгъуэт центрым я хэщIапIэхэр. Мыбыхэм цIыху миным нэблагъэ махуэ къэс щызэблокI икIи абыхэм я тыншыпIэр къызэгъэпэща хъунущ а Iуэхухэр зэфIэкIмэ.

Лэжьыгъэхэр дызэрыт илъэсым и кIэхэм зэфIагъэкIынущ.

Гъуэгум и зы Iыхьэ

«Малкэ – Ингушли» автомобиль гъуэгум щыщ, Чыщбалъкъ къуажэм Чкаловым и цIэр зызыхьэ и уэрамыр къызыхуэтыншэу зэрагъэпэщыжын щIадзащ. Лэжьыгъэхэр щекIуэкIыну щIыпIэм щыIэщ къуажэ администрацэм и хэщIапIэр, амбулаторэр, курыт еджапIэр, сабий садыр икIи километри 4-м щIигъу и кIыхьагъщ.

Лэжьыгъэхэр ирагъэкIуэкI «ГъащIэм хуэщIа инфраструктурэ» лъэпкъ пэхуэщIэм ипкъ иткIэ икIи ахэр зэфIэкIа нэужь къуажэдэс мин 1,5-м я шынагъуэншагъэмрэ тыншыпIэмрэ къызэгъэпэща хъунущ. 

Абы нэмыщI, «Малкэ – Ингушли» автомобиль гъуэгум ухуешэ Дзэлыкъуэ щIыналъэр зэрыгушхуэ и щIыпIэ дахэхэм, эко-лъагъуэхэм, хъупIэхэм.

         Уэрамхэр къызэщIагъаблэ

Тэрч щIыналъэм и Дей, Курп Ищхъэрэ къуажэхэм я автомобиль гъуэгухэм иджырей уэздыгъэхэр щыпадзащ. ЩIыналъэ гъуэгу фондым къыхэкIа мылъкумкIэ япэ жылэм километри 6-м щIигъу, етIуанэм – километри 5 зи кIыхьагъ я уэрамхэр къыщызэщIагъэблащ.

Дей къуажэм гъущIым къыхэщIыкIа пкъохэмрэ трансформатору 5-рэ щагъэуващ, ток кIапсэ лъэщхэр щашэщIащ. Курп Ищхъэрэми электрокъарур мащIэу «зышххэм» хуэдэ иджырей светодиод лампIхэр щыпадзащ Тэрч, Мамырыгъэм и уэрамхэм.

Абыхэм я фIыгъэкIэ, социальнэ мыхьэнэ зиIэ IуэхущIапIэхэм я бжэIупэхэр къызэщIэгъэнэхуа, жэщым гъуэгу тетхэм я Iуэхухэри нэхъ тынш хъуащ. 

ГъуэгуфIхэр

«ГъащIэм хуэщIа инфраструктурэ» лъэпкъ пэхуэщIэм ипкъ иткIэ Къэбэрдей-Балъкъэрым щрагъэкIуэкI гъуэгу лэжьыгъэхэм 2026 гъэми пащэжынущ.

Нобэ зи гугъу тщIыну лэжьыгъэхэр хуэгъэпсащ республикэм и щIыпIэ дахэхэмрэ щэнхабзэ мыхьэнэ зиIэ ухуэныгъэхэмрэ уахуэзышэ транспорт инфраструктурэр егъэфIэкIуэным.

Абыхэм ящыщу, нэхъапэ ирагъэщыпхъэхэм хохьэ Малкэ – Ингушли автомобиль гъуэгум и Iыхьэу, «Долинэ Нарзанов» эко-паркымрэ Джылы-Су аузымрэ хуэкIуэ гъуэгур. Мыбдежым щыIэ мардэм къыщрагъэтIэсэну щIыпIэм километр 12-м нэблагъэ и кIыхьагъщ.

Шэджэм щIыналъэм и Шэджэм псыкъелъэхэр, «Флай Шэджэм» паркыр, «Шэджэм Ипщэ» комплексыр, Кулиев Къайсын и фэеплъ унэ-музейр, Кум-Тюбе тафэр зэпызыщIэ, Шэджэм ЕтIуанэ – Булунгу автомобиль гъуэгум иращIэкI зэгъэпэщыжыныгъэ лэжьыгъэхэр икIэм нэблэгъащ.

ИпэIуэкIэ, а гъуэгум хыхьэу километр 12-м щIигъу зыхуей хуагъэзащ, лъэмыжу 14 къыщагъэщIэрэщIэжащ, километри 10-м щIигъу гъуэгур къызэщIагъэнэхуащ. Гъуэгу лэжьыгъэу а щIыпIэм къыщынар дызэрыт илъэсым зэфIагъэкIынущ.

КъищынэмыщIауэ, Шато – Ерчэн турист комплексым ухуэзышэ, Налшык – Май автомобиль гъуэгум и Iыхьэр, километри 6,1-рэ зи кIыхьагъыр, мы гъэм къызыхуэтыншэу зэрагъэпэщыжынущ.

НАУРЫЗ Мысост.