ЗэхъуэкIыныгъэхэм я лъэхъэнэм

XXI лIэщIыгъуэр технологие зэхъуэкIыныгъэшхуэхэм я лъэхъэнэу жыпIэ хъунущ, цIыхум и гъащIэм лъэныкъуэ куэдкIэ лъэIэсауэ. ХъыбарегъащIэ Iэмалхэм, медицинэм, энергетикэм, транспортым щIэуэ къыхыхьахэм дунейр яхъуэжащ, жылагъуэм, экономикэм, щэнхабзэм я къэкIуэнур яубзыхуу.

Псалъэм папщIэ, ди гъащIэм къыгуэхыпIэ зимыIэ и Iыхьэщ жып телефонымрэ Интернетымрэ. Абыхэм зэрызаужьрэ цIыхухэр зэрызэпсалъэ щIыкIэми зихъуэжащ, егъэджэныгъэми зиужьащ. Ди зэманым щIэныгъэ щызэбгъэгъуэтыфынущ онлайн курсхэм (еджапIэм Iэмал имыIэу уекIуэлIэн хуейкъым), апхуэдэуи унэм ущIэсу Iуэхутхьэбзэ гуэрхэмкIэ ахъшэ къриблэжьыфынущ.

Къэухь IэрыщIращи, нэхъ ипэкIэ цIыхум и закъуэ фIэкIа хуэмыщIэну щыта къалэнхэр  нейросетхэм ягъэзащIэ: цIыхухэр я сурэткIэ къегъуэт, абы и макъыр егъэIуф, тхыгъэ тредзэ, узыфэхэр зыхуэдэр къэхутэныр хузэфIокI.

Промышленностым кIуэ пэтми нэхъыбэу роботхэр къыщагъэсэбэп хъуащи, къэкIуэну зэманым кIуэдыжынкIэ шынагъуэ пылъу щыIэщ IэщIагъэ зыбжанэ. Абыхэм ящыщу къагъэлъагъуэ, псалъэм папщIэ, колл-центрым и оператор IэщIагъэр. Дегупсысмэ, иджыпстуи нэрылъагъуу абыхэм я къалэн куэд зэфIагъэкI телефонхэм хэт макъ дэIэпыкъуэгъухэмрэ чат-ботхэмрэ. КъыкIэлъыкIуэу, кассирхэм дыхуэмеижынри хэлъщ - тыкуэнхэм, банкхэм кIуэ пэтми  нэхъыбэ щохъу терминалхэр.

ГъэтIылъыпIэхэм щIэт лэжьакIуэхэри лъэныкъуэ ирагъэзынри зыхуэIуа щыIэкъым - IуэхущIапIэхэм робот-хьэлъэзешэхэр, хьэпшып зэхэзыдзхэр къагъэсэбэпу хуежьащ. КъызэрагъэлъагъуэмкIэ, 2030 гъэм ирихьэлIэу, логистикэ центр инхэр къэухь IэрыщIым и нэIэм щIэувэфынущ.

 Дызытепсэлъыхь IэщIагъэхэм яхэтщ бухгалтерым ейри. Иджырей программэхэм цIыхухэм нэхърэ нэхъ псынщIэу икIи щыуагъэ нэхъ мащIэ хэту къапщытэу, къабжу къыхагъэщ. КIуэдыжынухэм ящыщщ типографхэри жьы хъуа Iэмэпсымэхэр зыщIыж IэщIагъэлIхэри.

 ЦIыхуцIэ зиIэм зыщиужькIэ, нэхъ пасэм димыIа хьэпшыпи IэщIагъи къызэрыунэхунури хьэкъщ. Сыт хуэдэ атIэ ахэр жытIэу дылъыхъуэмэ, ди зэманым къыхэшыпсыхь къэухь IэрыщIым зыбжанэ къытхурибжэкIынущ. Псалъэм папщIэ, къэунэхуну хуагъэфащэ цIыху-машинэ зэпыщIэныгъэм и дизайнер IэщIагъэр (цIыхухэмрэ робот системэхэмрэ я зэдэлэжьэкIэр зыубзыху, Iэмэпсымэхэр гурыIуэгъуэ зыщI IэщIагъэлI); къэухь IэрыщIымрэ робототехникэмрэ цIыхум и шынагъуэншагъэр къыщылъытэнымрэ ахэр хабзэхэм къызэрезэгъымрэ кIэлъыплъ лэжьакIуэ;  ИИ-м и гъэсакIуэхэр (IэщIагъэлIхэр нейросетым хуагъасэ хэкIыпIэхэр пэжу къигъуэтыным, псом хуэмыдэу щытыкIэ гугъухэм деж); биопечатым и инженер - апхуэдэ IэщIагъэлIым псэ зыIутхэр зэрызэхэлъыр 3D-печаткIэ къызэригъэлъэгъуэну технологиехэр зэхелъхьэ, донор Iуэхум пылъ гугъуехьхэр зэфIегъэкI; цIыхур къызытехъукIахэр иджурэ, узыфэ иIэнкIэ хъунум зэрыпэщIэтынур къэзыхутэ чэнджэщэгъу щыIэнри дыкъэзыухъуреихь дунейм  и щытыкIэр езыгъэфIэкIуэж IэщIагъэлI диIэнри (къэхутэныгъэхэмрэ инженер бгъэдыхьэкIэхэмрэ я тегъэщIапIэу) хэлъщ.

  Къэухь IэрыщIым зиужькIэрэ сыт хуэдэу щIэгъэкъуэн ар къытхуэмыхъуми, гурыIуэгъуэщ Iуэхугъуэ нэхъыщхьэхэр икIи нэхъ гугъухэр цIыхум фIэкIа зэрыхуэмыгъэзэщIэнур, нобэ хуэдэу, пщэдеи дохутырхэм, егъэджакIуэхэм, гъэсакIуэхэм, ди шынагъуэншагъэр зыхъумэхэм, нэгъуэщI IэщIагъэлI куэдми дызэрыхуэныкъуэнур, дэтхэнэми и лэжьыгъэ мытыншым пщIэ зэрыхуэфащэр.

БАГЪЭТЫР Луизэ.