ХъыбарегъащIэ Iэмалхэм сыт хуэдэу замыужьами, кином театрыр зэрыхуIумыгъэкIуэтам хуэдэу, радио лэжьакIуэм и IэщIагъэри ди гъащIэм хэтщ мыхьэнэ мымащIэ игъэзащIэу. Псом хуэмыдэу ар тыншщ нэхъыжьхэм я дежкIэ: унагъуэ Iуэху здагъэзащIэм хъыбархэм зыщагъэгъуэзэф, макъамэ гурыхьхэм йодаIуэ.
Сыжажэ Алинэ ящыщщ а IэнатIэр къыхэзыхахэм. Абы къиухащ КъБКъУ-м журналистикэмкIэ и факультетыр. Илъэсибл хъуауэ радиом щылажьэ хъыджэбзым иригъэкIуэкI нэтынхэм ирегъэблагъэ волонтёрхэм, ухуакIуэхэм къыщыщIэдзауэ зыплъыхьакIуэхэм я деж щыщIэкIыжу, икIи мыхьэнэшхуэ зиIэ Iуэхугъуэхэр къарегъэIэт.
Зэгуэр радиом щылэжьэну имыгугъами (зыщIэхъуэпсар дохутыр IэщIагъэрт), махуэ къэс цIыху гъэщIэгъуэнхэм яIущIэм къигъэпсалъэурэ и IэнатIэр и гум дыхьэжащ. Къапщтэмэ, абы иригъэкIуэкI «Интервал QT» нэтыныр медицинэм теухуащ. Абыи куэд къыбжеIэ. КъищынэмыщIауэ, Сыжажэм «Дуней тетыкIэ», «ФIымрэ уахъты зимыIэмрэ» къыдэкIыгъуэхэр егъэхьэзыр. И лэжьэгъухэм я гъусэу, «Си Къэбэрдей-Балъкъэр» «ПщIэну щхьэпэщ» нэтынхэр къет.
- Псом хуэмыдэжу сфIэфIыр цIыхум и узыншагъэр зэрихъумэным теухуауэ зи гугъу сщIа «Интервал QT» нэтыным медицинэм и IэщIагъэлI нэхъыфI дыдэхэр къыщезгъэблагъэрщ. Къысхуэмыгъэсу дэтхэнэми сыпоплъэ, езым, и IэнатIэм, сэбэп зэрыхъум теухуауэ интервью зэрыдезгъэкIуэкIынум. Дытопсэлъыхь Iуэхугъуэ щхьэпэ куэдым: цIыхум япэ дэIэпыкъуныгъэ зэрептынум, узыншагъэм утеплъэкъукI зэрымыхъунум, узыфэр пасэу къызэрыпхутэфыну Iэмалхэм, - жеIэ абы. - Нэтыныр зытедухуэнур къыдэдаIуэхэм къыщыджаIи щыIэщ, «мыпхуэдэ Iуэхугъуэм фытепсэлъыхьарэт» жаIэу. КъыкIэлъыкIуэ нэтыным ахэр зыщIэупщIа Iуэхум и жэуапыр щыщызэхахкIэ, сыт хуэдэу гуапэ ящыхъурэ. Языныкъуэхэр, уеблэмэ къопсалъэ, радионэтыным и фIыгъэкIэ я гъащIэм зэхъуэкIыныгъэ зэрыхалъхьар къыхагъэщу. Апхуэдэхэм деж зыхыбощIэ цIыхум зыгуэркIэ щхьэпэ узэрыхуэхъур, абы нэхъыфIыжу уи IэщIагъэр уегъэлъагъу.
Ди нэтынхэр зэрызэмыщхьым и зы щапхъэ къыпхуэсхьынщ. Къалэ сабий гъэсапIэхэм ящыщ зым и гъэсакIуэм интервью къеIысхырт. Дыщызэпсалъэм, сыщымыгуфIыкIынкIэ Iэмал имыIэу, абы и дэтхэнэ псалъэми къыхэщырт и лэжьыгъэми сабийми яхуиIэ лъагъуныгъэр.
Апхуэдэ дыдэу дин IуэхущIапIэхэм я лIыкIуэхэми сепсэлъэну сфIэфIщ. ФIыуэ дызэрылъагъуным, гуапэу дызэхущытыным, зыхузэфIэмыкIым дэIэпыкъуэгъу дыхуэхъун зэрыхуейм мыхьэнэшхуэ зэриIэр ягу къыдогъэкIыж апхуэдэ ди нэтынхэмкIэ.
Зыщыдгъэгъупщэ хъунукъым языныкъуэми псалъэ къудейкIэ зыгуэрым дызэрыдэIэпыкъуфынур.
