КъБР-м и Iэтащхьэ КIуэкIуэ Казбек Дзэ Iуэху хэхахэм хуэгъэпса къарухэм я махуэм и щIыхькIэ а IэнатIэм къулыкъу щызыщIэхэм захуигъэзащ:
«Урысейм щагъэлъапIэ Дзэ Iуэху хэхахэм хуэгъэпса къарухэм я махуэр.
Шэч хэмылъу, ССО-р къызэгъэпэщыныр уващ Урысейм IэщэкIэ ЗэщIэузэда и Къарухэм зегъэужьынымкIэ икъукIэ мыхьэнэшхуэ зиIэ лъэбакъуэу.
ЗэщIэгъэуIуауэ сыт хуэдэ шынагъуэми пэувыф, иджырей нэхъ Iэщэ лъэщ дыдэрэ техникэкIэ къызэгъэпэща къудамэхэр убзыхуныр къыхэкIащ къэрал щIыб политикэм къыщекIуэкI зэпэщIэтыныгъэхэм, ди къэралыр зыми и унафэ щIэмытыным, абы и шынагъуэншагъэр къызэгъэпэщыным пыщIауэ къэув къалэнхэр гъэзэщIэным.
ПIалъэ кIэщIым къриубыдэу ССО-м и гупхэм УФ-м IэщэкIэ ЗэщIэузэда и Къарухэм езыхэм я увыпIэ щаубыдыжащ, мыхьэнэшхуэ зиIэ хэлъхьэныгъэшхуэхэр хуащIащ Урысей армэм и дзэхэм я лъэщагъым нэхъри хэгъэхъуэным. Абыхэм наIуэ къащIащ къалэн нэхъ гугъу икIи шынагъуэ дыдэхэм зэрапэлъэщынур, сыт хуэдэ щытыкIэми псынщIэу икIи хэкIыпIэ тэмэм къыхуагъуэту къызэрикIыфынур.
Дзэ Iуэху хэхахэм хуэгъэпса къарухэр нобэ зауэм и гуащIапIэм хэтщ - тIасхъэщIэх макIуэ, бийм и щIыналъэм щыIэщ, гъунапкъэм Iус щIыналъэхэм зэран хъун мурад яIэу къихьэ щIэпхъаджащIэхэр лъэныкъуэ ирагъэз.
ФIыщIэ мыухыж яхузощI а IэнатIэм пэрытхэм, я хахуагъэмрэ я къулыкъум къахуигъэув къалэнхэр Iэзэу зэрагъэзащIэмрэ папщIэ.
Шэч хэмылъу, дэ дрогушхуэ ССО-м хэту къулыкъу зыщIэ, Хэкур зыхъумэ ди хэкуэгъу щIалэхэми. Абыхэм къагъэлъагъуэ тхьэрыIуэмрэ дзэ къалэнымрэ зэрахуэпэжыр.
Си гум къыбгъэдэкIыу сохъуэхъу Дзэ Iуэху хэхахэм хуэгъэпса къарухэм къулыкъу щызыщIэхэмрэ ветеранхэмрэ я IэщIагъэм епха махуэмкIэ.
Си гуапэщ узыншагъэ быдэ, ехъулIэныгъэ яIэну, ТекIуэныгъэр икIэщIыпIэкIэ къахьыну!»
