Лъы хуэныкъуэхэм папщIэ

Налшык къалэм  ведомствэм хэмыт и хъумакIуэ  къудамэм   и лэжьакIуэ 70 хэтащ     Урысей гвардием и  акцэм, «Зы гум къыбгъэдэкIыу адрейм хуэкIуэу» зыфIащам.  Ар хуэгъэпсащ  донор Iуэхум къэралым зыщегъэужьыным.

Республикэм Узыншагъэр хъумэнымкIэ и министерствэм  лъы щыхаш и  станцым росгвардейцхэм лъы литр 40-м щIигъурэ абы и пкъыгъуэхэмрэ щатащ  щIыналъэм и медицинэ IуэхущIапIэхэм папщIэ.   Акцэм ипэ къихуэу абы  хэт псоми я узыншагъэр  къапщытащ.      

- Донор Iуэхухэм хэтыныр дэ хабзэ тхуэхъуащ.  Лъы хуэныкъуэхэм ядэIэпыкъуну гупыж зыщIхэм къахэхъуэ зэпытщ, -  жиIащ  полицэм и майор Къэгъэзэж Азэмэт.  

Медицинэ лэжьакIуэхэм  ведомствэм и лIыкIуэхэм фIыщIэ хуащIащ я гудзакъагъэм папщIэ  икIи  жаIащ адэкIи зэдэлэжьэным зэрыщыгугъыр.     

 БАХЪСЭН  Ланэ.