Сабийхэм загъэпсэхунымрэ я узыншагъэр ирагъэфIэкIуэнымрэ теухуа Iуэхухэр
зэкIэлъызыгъэкIуэну IуэхущIапIэхэм зэдай комиссэм и пашэщ КъБР-м и Iэтащхьэ КIуэкIуэ Казбек
- Мы гъэм дэ хэпщIыкIыу хэдгъэхъуащ гъэмахуэ зыгъэпсэхугъуэм къриубыдэу сабийхэм я узыншагъэр щрагъэфIэкIуэфыну щIыпIэхэм я бжыгъэм. А Iуэхум трагъэкIуэдэн папщIэ республикэ бюджетым щыхухэтхащ сом мелуани 120-м щIигъу. Сэ пщэрылъ зэращысщIам тету, еджапIэхэм къедза лагерхэм я бжыгъэр хуэдитIкIэ нэхъыбэ ящIащ - муниципалитетхэм щыIа 22-м и пIэкIэ 43-рэ къызэIуахынущ, нэгъуэщIи 5 республикэ егъэджэныгъэ IуэхущIапIэхэм епхауэ щытынущ. Нэхъапэм нэхърэ хуэдитIым щIигъукIэ нэхъыбэм - минищым нэблагъэм - зыщагъэпсэхуфынущ абыхэм, - жиIащ республикэм и Iэтащхьэм.
Апхуэдэ щIыкIэкIэ, 2026 гъэм къриубыдэу санаторэхэм, еджапIэхэм, а IэнатIэм епха нэгъуэщI IуэхущIапIэхэм къыщызэрагъэпэщыну лагерхэм я узыншагъэм щыкIэлъыплъынущ, я къарум щыхагъэхъуэнущ сабий мини 9-м щIигъум. Ар Iыхьэ щанэм нэблагъэкIэ нэхъыбэщ илъэс кIуам зэрыщытам нэхърэ. Апхуэдэуи йолэжь зыгъэпсэхугъуэ пIалъэр сэбэпынагъ нэхъыбэ къыпэкIуэу ягъэкIуэным ехьэлIа Iуэхухэми. «Сабийхэм я зыгъэпсэхугъуэ зэманым теухуа лъэхьэнэм зыхуэгъэхьэзырынымрэ абы хыхьэ Iуэхухэр къызыхуэтыншэу зэфIэгъэкIынымкIэ си нэIэ щIэтщ», - къыхигъэщхьэхукIащ республикэм и унафэщIым.
КIуэкIуэ Казбек махуэ зыбжанэ ипэкIэ Iэ тридзащ Сабийхэм загъэпсэхунымрэ я узыншагъэр ирагъэфIэкIуэнымрэ теухуа Iуэхухэр зэкIэлъызыгъэкIуэну, IуэхущIапIэхэм зэдай комиссэм и лэжьыгъэм зэхъуэкIыныгъэхэр хэлъхьэным теухуа указым. Ар къралъхьащ щIыналъэм и Iэтащхьэм и официальнэ сайтым. Абы зэхъуэкIыныгъэхэр хелъхьэ комиссэм теухуа положенэм икIи щIэуэ хагъэхьахэри къыщыгъэлъэгъуащ. ЗэхъуэкIыныгъэхэм я мурад нэхъыщхьэр - «Урысей Федерацэм щыщ сабийхэм я хуитыныгъэхэм я шэсыпIэ нэхъыщхьэхэр» Къэрал хабзэ №124-ФЗ-м и 12-нэ статьям ипкъ иткIэ комиссэм и хуитыныгъэхэр щIэгъэбыдэнырщ. А законым халъхьа зыхуэфащэ зэхъуэкIыныгъэхэр дызэрыт илъэсым и мазаем къищтащ Урысейм и Президентым. Сабийхэм загъэпсэхунымрэ я узыншагъэр ирагъэфIэкIуэнымрэ теухуа Iуэхухэр зэкIэлъызыгъэкIуэну, IуэхущIапIэхэм зэдай комиссэм иджы и унафэщIу щытын хуейщ УФ-м хыхьэ щIыналъэхэм я Iэтащхьэхэр.
Къэбэрдей-Балъкъэрым а комиссэм хэтщ унэтIыныгъэ зэхуэмыдэхэм я IэщIагъэлIхэр. Мыхьэнэшхуэ зиIэ зэхъуэкIыныгъэхэм ящыщщ мыр - комиссэм абыкIэ хуитыныгъэ зиIэ органым езым жэрдэм къыщыхилъхьэфынущ сабийхэм я зыгъэпсэхугъуэр къызэгъэпэщыныр зэхьэлIа IэнатIэм ар къыхагъэкIыну. Апхуэдэуи комиссэм хэтхэм я къулыкъухэми хэплъэжащ. Нэхъапэм абы и пашэр КъБР-м и Правительствэм и УнафэщIым и къуэдзэрауэ щытамэ, иджы абы и лэжьыгъэхэр зыунэтIынур щIыналъэм и Iэтащхьэрщ. Абы и япэ къуэдзэу ягъэуващ КъБР-м и Правительствэм и УнафэщIым и къуэдзэ, социальнэ унэтIыныгъэр зи нэIэ щIэтыну Хъубий Марат, и къуэдзэу ягъэуващ республикэм лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министр Тогузаев ТIэхьир. IуэхущIапIэхэм зэдай комиссэм хагъэхьащ министерствэхэм, къулыкъущIапIэхэм я нэхъыбапIэм я унафэщIхэр, къалэхэмрэ щIыналъэхэмрэ я администрацэхэм я Iэтащхьэхэр, апхуэдэу кIэлъыплъакIуэ-къэпщытакIуэ IуэхущIапIэхэм я унафэщIхэр.
