Мылъкур зытрагъэкIуадэр

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Къэрал казначействэм и  управленэу Къэбэрдей-Балъкъэрым щыIэм и унафэщI IутIыж Шумахуэ. 
 
ЗэIущIахэр тепсэлъыхьащ Управ­ленэм илъэс блэкIам къриубыдэу ­республикэм и бюджетыр зэригъэзэ­щIамрэ дызэрыт илъэсым щыщу блэ-кIа мазищым яхузэфIэкIамрэ. 
Управленэм къит бжыгъэхэм япкъ ­иткIэ, мэлыжьыхьым и 1-м ирихьэлIэу, бюджетым хэхъуэу иIа псори зэхэту  сом мелард  24,8-м ноблагъэ, ар 2025 гъэм елъытауэ процент 21,8-кIэ нэхъыбэщ.  ЩIыналъэм и бюджетым, адрейхэм къадэкIуэу,  сом мелард 13 ­къы­хэхъуащ, ар блэкIа илъэсым   еплъытмэ, процент 28-кIэ нэхъыбэщ. ЩIыпIэ ­бюджетхэми сом меларди    5,2-м нэс   хэхъуэ яIэщ, ар   блэкIа илъэ­­­­сым ейм елъытауэ про­цент 20,5-кIэ нэхъыбэщ. 
Республикэм и бюджетым хэхъуэ зэ­пыту зэрыщытым и фIыгъэкIэ, цIыхубэ гъащIэм епха къалэнхэр ягъэзэщIэну Iэмал ягъуэт.  Мылъкур трагъэкIуадэ ­зи улахуэр бюджетым къыхэкIхэм я лэ­жьапщIэм  хагъэ­хъуэным, сымаджэ хьэ­лъэхэм  хущхъуэхэр дэчых иIэу Iэрагъэхьэным, коммунальнэ хозяйствэм къащыпэщылъ къалэнхэр ягъэзэ­щIэ­ным, мыхьэнэшхуэ зиIэ нэгъуэщI Iуэху щхьэпэхэм. 
Къэбэрдей-Балъкъэрым щызэфIах лъэпкъ проектхэм къыхуаутIыпщ ахъ­шэр здэкIуапхъэм проценти 100-кIэ зэ­рынигъэсамкIэ пэрытхэм ящыщщ зи гугъу тщIы Управленэр. Къэрал бю­джетым и кассэ зэфIэхыкIэмкIи  лэ­жьыгъэр йофIакIуэ, ахъшэ гъэ­лэжьэ­кIэми (ликвидность)  бюджетым и фейдэ къыхокI.   
Илъэсым и япэ мазищым къызэригъэлъэгъуамкIэ, ирагъэкIуэкIа лэжьыгъэм къыдэхуа  ахъшэхэр  зэрагъэуIуа нэужь, ар сом мелуан  345-м нэсащ. 2021 гъэм щегъэжьауэ а лъэныкъуэмкIэ республикэм хэхъуэу сом меларди 7,1-рэ иIэщ.  
КIуэкIуэ Казбек Управленэм ­щы­ла­жьэхэм дяпэкIи ехъулIэныгъэ яIэу лэ­жьэну ехъуэхъуащ, ахэрщ зэлъытар Къэ­­бэрдей-Ба­лъкъэрым и мылъкум фейдэуэ къыдэкIуэнур.