ЛIыхъужьхэр къэгупсысыни хуэмейуэ

ЩоджэнцIыкIу Алий и цIэр зезыхьэ Къэбэрдей къэрал театрым игъэлъагъуэ лэжьыгъэ купщIафIэхэм ящыщ зы нобэ дигу къыдогъэкIыж - ар «Давай за жизнь…» макъамэ-усэ пшыхьырщ, ТекIуэныгъэ Иным и щIыхькIэ ягъэхьэзырар.

Утыкум щекӏуэкӏ ӏуэхум а зэманым ухишэ хуэдэщ - фӏыуэ зэрылъагъухэр зэпэӏэщӏэ зэрыхъур, зэӏыхьлыхэр зэрызэфӏэкӏуэдым и хьэлъагъыр, цIыхухэм я хэкупсагъэр. Абы къыхощ, зэман хьэлъэм емылъытауэ, цIыхухэм я зэхуаку зэныбжьэгъугъи лъагъуныгъэшхуи зэрыдэлъар, абы и фIыгъэкIэ гугъуехьхэм зэрыпхыкIар.

«Давай за жизнь…» лэжьыгъэр уэрэдрэ усэу зэхэтщ. Абы и лIыхъужьхэм я гъащIэр Хэку зауэшхуэм «зэрызэригъэдзэкIар» IупщIу уи нэгу къыщIагъэувэ артистхэм. Сэлэту абы хэтщ Блашэ Имран, Хьэщхъуэжь Ислъам, Хьэжмэт Iэдэм сымэ. Хъыджэбз ролхэр ягъэзащIэ Хъурзокъуэ Элинэ, БитIэхъу Миланэ, Соблыр Динарэ.

Лэжьыгъэр зейр  адыгэ театрым и артисткэ нэхъыжь, Щукиным и цIэр зезыхьэ театр институтыр къэзыуха МафIэдз Заирэтщ. Хъыджэбзым ар и етIуанэ режиссёр лэжьыгъэщ. Япэу игъэувар Рождественский Роберт и усэхэмкIэ зэхилъхьа «Всё начинается с любви» спектаклырщ. Ар театреплъ ныбжьыщIэхэм, школакIуэхэмрэ студентхэмрэ нэхъ яхуэгъэзащ. «Къэбэрдей театрым и спектаклхэр псори адыгэбзэкIэщ зэрекIуэкIыр, институтым къыздитшыжа «Ханума»-м къищынэмыщIа. Ар урысыбзэкIэ щIэдгъэлъагъуэр ди щIыналъэм зыгъэпсэхуакIуэ къакIуэхэм папщIэщ. Рождественскэм ейри урысыбзэкIэ дгъэувыну къыщIэтщтар «Пушкиным и картэкIэ» къакIуэхэм нэхъыбэ къызэщIедгъэубыдэн мурадкIэщ», - жеIэ МафIэдзым.

Режиссёрым усэхэмрэ уэрэдхэмрэ зэрызэхигъэува, къызэрыхиха щIыкIэми гу лъытапхъэщ - ар тхыдэм ириплъэж хуэдэщ, икIи а гузэвэгъуэр къызэрежьа щIыкIэр ди нэгу къыщIегъэхьэ. Псалъэм папщIэ, спектаклым щIэдзапIэ хуохъу фIыуэ зэрылъэгъуа ныбжьыщIэхэм я гурыщIэхэр зэхуаIуатэу. ЖыпIэнурамэ, дунейр мамырщ, щIэращIэщ. АрщхьэкIэ адэкIэ радиокIэ Молотовым (хамэ къэрал IуэхухэмкIэ цIыхубэ комиссару, СССР-м и Наркомым и советым и унафэщIым и къуэдзэу щытам) и макъыр къоIу нэмыцэхэр я псалъэм епцIыжу Совет Союзым къызэрытеуар, Хэку зауэшхуэм зэрыщIидзар, цIыхубэр зэкъуэувэн зэрыхуейр жиIэу.

Пшыхьым хэт лIыхъужьхэми фIыуэ ялъагъухэр зауэм ирагъажьэ, зэныбжьэгъухэм сэлам зэрахыж. Симоновым итха «Жди меня, и я вернусь» усэ цIэрыIуэр къоIу, «къэгъэзэж закъуэ, сыножьэнущ», псалъэхэр тхьэрыIуэ пэлъытэу.

Къэбгъэлъагъуэмэ, мы пшыхьыр и щыхьэтщ зауэ зэманым уэрэд минхэр дунейм къызэрытехьам, гум дыхьэ псалъэхэр зы жьэм жьэдэкIым адрейм жьэдыхьэу, ахэр уэздыгъэнэфым къигъэнэху тIэкIумкIэ тхылъымпIэхэм тратхэу, письмокIэ зэIэпахыу зэрыщытам. УсакIуэ, макъамэтх куэди а илъэсхэм зэуапIэм щыIащ. Уэрэдхэм хэт лIыхъужьхэр къагупсысын хуэмейуи гъащIэм яригъэлъэгъуат. Абыхэм ятхыр цIыху мелуанхэм я бзэгупэм къытенэрт. Апхуэдэуи зауэ уэрэдхэм нэгъуэщI мыхьэнэшхуи яIэт - цIыхухэр ТекIуэныгъэм хуигъэпабгъэрт, къаруущIи яхилъхьэжырт. Зауэм теухуа уэрэдхэмкIэ цIэрыIуэ хъуа «Любэ» гупым игъэзащIэу тщIэ «Комбат», «Солдат», «Там за туманами», «По высокой траве», «Три танкиста» уэрэдхэм, нэгъуэщIхэми иджыри зэ урегъэдэIуэж спектаклым.

Мы пшыхьым ди адэжьхэм текIуэныгъэм щIата уасэри зыхыуигъащIэу, ТекIуэныгъэр къызэрытхуахьами уригъэпагэу апхуэдэщ. «Давай за жизнь» уэрэдым и закъуэ зауэм и купщIэр, ТекIуэныгъэм и лъапIагъыр, ар тщыгъупщэ зэрымыхъунур къыджиIэми ярейщ.