Нартыхур хасэ

Къэбэрдей-Балъкъэрым Мэкъумэш хозяйствэмкIэ и министерствэм къызэритамкIэ, республикэм и мэкъумэшыщIэхэм нартыху жылапхъэр хасэн щIадзащ икIи нобэкIэ япэ гектар 850-м ар хагъэзэгъащ. 
ЗэкIэ зэрытраухуамкIэ, нартыху жылапхъэм мы гъэм хухахынущ гектар мини 132,7-рэ. Нэгъабэ ар зытращIам нэхърэ проценти 4-м нэблагъэкIэ нэхъыбэ хъунущ.
Къэбэрдей-Балъкъэрым щащIэ мэкъумэш къэкIыгъэхэм нартыхум увыпIэ хэха щеубыд. ЖыпIэнурамэ, хьэцэпэцэмрэ джэш хъуреймрэ зэхэту щIыуэ ди деж щыхухахым и процент 60-м щIигъур абы ирагъэубыд.

МазитI лэжьыгъэм кърикIуахэр

Къэбэрдей-Балъкъэрым ПромышленностымкIэ, энергетикэмрэ сатумкIэ и министерствэм къызэритамкIэ, 2026 гъэм и щIышылэм – мазаем къриубыдэу республикэм и промышленнэ индексым и куэдагъыр проценти 108,4-рэ хъуащ, абы ипэ ита илъэсым и апхуэдэ пIалъэм щыIа бжыгъэхэм елъытауэ.
Мыбдежым хэхъуэ нэхъыбэ къэзыгъэлъэгъуар продукцэхэр къыщIэзыгъэкI, абыхэм елэжь IуэхущIапIэхэрщ: IэнатIэм и промышленнэ индексыр проценти 106,3-м нызэрыхьэсащ. 
Къапщытэж пIалъэм къриубыдэу хэхъуащ щэкIхэкIым, щыгъыным, гъущIу щымыт минерал продукцэхэм, гъущIхэкI продукцэхэм, медицинэ, электрокъару обрудованэхэм, унэлъащIэм, нэгъуэщI цIыкIуфэкIу хьэпшыпхэм я куэдагъым.

IэфIыкIэ зыфIэфIхэм папщIэ

2026 гъэм и щIышылэм – мазаем Къэбэрдей-Балъкъэрым IэфIыкIэрэ IэфIыкIэхэкIыу къыщыщIагъэкIам и куэдагъыр процент 25,7-кIэ нэхъыбэщ абы ипэ ита илъэсым и апхуэдэ пIалъэм щыIа бжыгъэхэм елъытауэ, къитащ иджыблагъэ КъБР-м Мэкъумэш хозяйствэмкIэ и министерствэм.
Къапщытэж пIалъэм къриубыдэу республикэм къыщыщIагъэкIащ IэфIыкIэ зэмылIэужьыгъуэу тонн мини 3-м нэблагъэ. 
НобэкIэ, ди щIыналъэм щолажьэ IэфIыкIэ завод ину щырэ уней IуэхущIапIэ цIыкIухэмрэ икIи абыхэм зэгъусэу къыщIагъэкI фIагъ лъагэ зиIэ а шхыныгъуэ гуакIуэм щыщ лIэужьыгъуэ куэд. 
Мыдрейуэ, а пIалъэм къриубыдэу макарону, щIакхъуэрэ щIакхъуэхэкIыу Къэбэрдей-Балъкъэрым къыщалэжьам и куэдагъыр нэгъабэ щыIа бжыгъэхэм хуэдизу къэнэжащ: тонн мин 0,160-рэ, тонн мини 4,1-рэ, ахэр зэрызэкIэлъыкIуэм хуэдэу къэгъэлъэгъуауэ.