Лэжьыгъэм зыщегъэгъуазэ

11 июня, 2026 - 06:58
Бахъсэн щIыналъэ администрацэм и Iэтащхьэ Абрэдж Iэдиб иджыблагъэ щыIащ районым зэгъэпэщыжыныгъэ лэжьыгъэхэр щрагъэкIуэкI социальнэ IуэхущIапIэхэм. 
Псалъэм къыдэкIуэу, «Егъэджэныгъэ IэнатIэм зегъэужьын» къэрал программэм ипкъ иткIэ мы махуэхэм Бахъсэн щIыналъэм къызыхуэтыншэу щызэрагъэпэщыж курыт еджапIэрэ сабий саду 7. Абыхэм яхэтщ Жанхъуэтекъуэ къуажэм и сабий садыр, Зеикъуэ, ХьэтIохъущыкъуей, Ислъэмей, Бахъсэненкэ жылэхэм я школхэр, нэгъуэщIхэри.
Мы щIыпIэхэм щрагъэкIуэкI лэжьыгъэхэм хыхьэу ухуэныгъэхэм псоми я пкъыгъуэжьхэр къыщыпкърахыжащ, ХьэтIохъущыкъуеймрэ Ислъэмеймрэ я еджапIэхэм я пэшхэр къращIыкIын щIадзащ. Школхэмрэ ухуакIуэхэмрэ я унафэщIхэм щепсэлъам, Абрэджым яжриIащ зыхуагъэувыжа пIалъэхэм тету лэжьыгъэхэм фIагъ лъагэ яIэу ахэр зэрырагъэкIуэкIын хуейр.
Бахъсэн щIыналъэ администрацэм и Iэтащхьэм гулъытэ хэха хуищIащ «Унагъуэ» лъэпкъ пэхуэщIэм ипкъ иткIэ Зеикъуэ къуажэм къызыхуэтыншэу щызэрагъэпэщыж ГъуазджэмкIэ сабий школым. Мыбы лэжьыгъэхэр и кIэм щынэблэгъащ, къэна мащIэхэр зэрагъэзэхуэж, гуфIэгъуэ зэхуэс иращIэкIыу къызэрызэIуахынум хуагъэхьэзыр.
Абрэдж Iэдиб районым и щIыпIэхэр къызэхикIухьа нэужь жиIащ лъэпкъ пэхуэщIэхэмрэ къэрал программэхэмрэ Бахъсэн щIыналъэм зэрыщагъэзащIэм я нэIэ трагъэтыныр я лэжьыгъэм щынэхъыщхьэ Iуэхугъуэхэм зэрахыхьэр, социальнэ ухуэныгъэхэм щрагъэкIуэкI зэгъэпэщыжыныгъэ лэжьыгъэхэри зэхуагъэувыжа пIалъэхэм зэфIагъэкIын зэрыхуейр. 
 
    Илъэс пIалэм тещIыхьауэ
2026 гъэм и мэлыжьыхьым Къэбэрдей-Балъкъэрым къыщекIуэкIа уасэхэм процент 0,3-кIэ кIэрыхуащ абы ипэ ита мазэм щыIахэм елъытауэ. Ар къызыхэкIар я чэзум ирихьэлIэу языныкъуэ ерыскъыхэм я куэдагъыр сату щIапIэхэм нэхъыбэ зэрыщыхъуамрэ сомым зэрызигъэбыдамрэщ.
ЖыпIэнурамэ, фIыуэ кIэрыхуащ джэдыкIэм и уасэм. Дауи, хуабэ зэрыхъужу, джэдхэм джэдыкIэ нэхъыбэ къатын щIадзащ. Апхуэдэуи, нащэр, бэдрэжаныр, шыбжий IэфIыр, бананыр, апельсин-мандаринэхэр нэхъ пуд хъуащ къапщытэж пIалъэм къриубыдэу. Хуабэщым къыщагъэкIа хадэхэкIхэри сату щIыпIэхэм нэхъыбэ щыхъуащ, абы къыхэкIыуи, я уасэхэм кIэрыхуащ. Абы нэмыщI, электрокъаруурэ уэздыгъапщIэу трагъэкIуадэр нэхъ мащIэ зэрыхъуам я фIыгъи хэлъщ а Iуэхум. 
Хамэ къэралхэм къраш пхъэщхьэмыщхьэхэри иджыпсту нэхъ пудщ, сомым зэрызигъэбыдам и фIыгъэкIэ.
ЕрыскъыхэкIыу щымыт продукцэхэм ящыщу зи уасэм кIэрыхуам хохьэ телефон зэпыщIэныгъэм епха Iэмэпсымэхэр, телерадио хьэпшыпхэр, электроникэр, унагъуэхэм къыщагъэсэбэм техникэхэр. Мыбдежми, ар къызыхэкIар сомым зэрызигъэбыдамрэ кредитхэр «къызэрагъэлэламрэщ». 
ЦIыхухэм хуащIэ Iуэхутхьэбзэхэм ящыщу маршрут таксихэм я уасэм хагъэхъуащ, гъэсыныпхъэм, зэгъэпэщыжыныгъэ лэжьыгъэхэм, улахуэм зэрыхагъэхъуам тещIыхьауэ. 
КъищынэмыщIауэ, сомым зэрызигъэбыдам къыхэкIыу, хамэ къэралхэм зыщыбгъэпсэхуну нэхъ пуд хъуащ. Псом хуэмыдэу, путевкэхэм я уасэхэм щыкIэрыхуащ Китайм, Азием и Ипщэ-КъуэкIыпIэ лъэныкъуэхэмкIэ. Абыхэм нэмыщI, ди республикэм и санаторэхэм я путевкэхэри нэхъ пудщ иджыпсту, щIымахуэ турист лъэхъэнэр Iуащхьэмахуэ лъапэ зэрыщызэхуащIыжам кърикIуауэ. 
Инфляцэри, илъэс пIалэм тещIыхьауэ, Къэбэрдей-Балъкъэрым къыщызэтеувыIащ икIи проценти 4,7-рэ хъуащ. УФ-м ику иту щыщыIэ бжыгъэхэм нэхърэ ар нэхъ цIыкIущ. УФ-м и Банк нэхъыщхьэм и плъапIэр – илъэсым и кIэм проценти 4-м деж ар къыщызэтригъэувыIэнырщ.
НАУРЫЗ Билал
  • 14 просмотров
Поделиться: