Налшык япэ ирагъэщ

1 июля, 2026 - 10:00
Ди къэралым и щIыналъэхэм къыщызыкIухь туристхэм Iуэхутхьэбзэ яхуэзыщIэ «OneTwoTrip» интернет сайтым и IэщIагъэлIхэм иджыблагъэ ирагъэкIуэкIащ УФ-м и хьэщIэщхэм зэрызыщрагъэтх щIыкIэм теухуа къэпщытэныгъэ. Нэхъ гурыIуэгъуэу жыпIэмэ, щIыналъэм къэкIуэн ипэкIэ махуэ дапщэ иIэжу пэшхэр яубыдми зрагъэщIащ. 
Къэпщытэныгъэхэм къызэрагъэлъэгъуамкIэ, хьэщIэщхэм зыщезыгъэтххэм я процент 14-м ар щащIэр зыплъыхьакIуэ е зыгъэпсэхуакIуэ ежьэным зы махуэ иIэжущ. Апхуэдэу нэхъыбэу щащIыр Урысей Ипщэмрэ Кавказ Ищхъэрэмрэ я курортхэмрэ промышленнэ къалэ инхэмрэщ. 
ЗэрыжаIэу, «гъуэгурыкIуэу», а махуэ дыдэм Налшык къалэм и хьэщIэщхэм зыщезыгъэтх туристхэр нэхъыбэщ, адрей щIыналъэхэм елъытауэ. Ди къалащхьэм къыкIэлъокIуэ Чебоксары, Дон Iус Ростов къалэхэр. Зэман куэд трамыгъэкIуадэу, псынщIэу зызэщIэзыкъуэу зыплъыхьакIуэ ежьэхэм къыхах къалэхэм яхохьэ Новороссийск, Грознэ, Краснодар, Саранск къалэхэри.
«OneTwoTrip»-м и IэщIагъэлIхэм зэрыжаIэмкIэ, Кавказ Ищхъэрэмрэ тенджыз ФIыцIэ Iуфэмрэ япэ щIищым и щхьэусыгъуэр иужьрей илъэсхэм автомобиль туризмэм зыужьыныгъэшхуэ зэригъуэтарщ. ЦIыхухэм, езыхэр щыхуей зэманым, я машинэхэмкIэ зыплъыхьакIуэ е зыгъэпсэхуакIуэ ежьэну Iэмал щаIэм деж, куэдрэ мыгупсысэу гъуэгу тоувэ икIи жэщгъуэлъ къыщызэтеувыIэну щIыпIэри а махуэ дыдэм къыхах.
«Туристхэм иджыпсту нэхъ яфIэфIщ, мурад убзыхуа гуэрым темыту, ягу къыщихьэ зызэщIакъуэу занщIэу гъуэгу техьэну, я гукъыдэжымрэ дунейм и щытыкIэмрэ ятещIыхьауэ. Апхуэдэхэм деж автомобилхэр абыхэм я дэIэпыкъуэгъу нэхъыщхьэщ», - къыхагъэщащ интернет-сайтым и лэжьакIуэхэм. 
 
Сом меларди 3,4-м щIигъу 
2026 гъэм и щIышылэм – мэлыжьыхьым къриубыдэу «Россети Кавказ Ищхъэрэ» компанием и «Къэббалъкъэнерго» щIыналъэ къудамэм республикэм и IуэхущIапIэхэмрэ унагъуэхэмрэ Iуэхутхьэбзэу яхуищIам сом меларди 3,4-м щIигъу къыпэкIуащ икIи нэгъабэ и апхуэдэ пIалъэм щыIа бжыгъэхэм нэхърэ сом мелуан 501,6-кIэ ар нэхъыбэщ.
Дызэрыт илъэсым и япэ мазиплIым къриубыдэу КъБР-м и IуэхущIапIэхэмрэ унагъуэхэмрэ зэхэту Iуэхутхьэбзэу абыхэм хуащIэм и процент 86,5-м и уасэр ятащ. Мыбдежым щыпэрытщ щIыпIэ, щIыналъэ бюджетхэм къыхэкIыу ягъэлажьэ IуэхущIапIэхэр.
«Къэббалъкъэнерго»-м абыхэм яхуищIа Iуэхутхьэбзэм и уасэр проценти 104-кIэ, 101-кIэ ятащ, зэрызэкIэлъыкIуэм хуэдэу (дебитор щIыхуэу ипэIуэкIэ ятелъауэ япшыныжари хэту).
Электрокъару къэзыщэху-зыщэж IуэхущIапIэхэм хуащIа Iуахутхьэбзэм и уасэм и проценти I03,8-р щIатащ.
КъищынэмыщIауэ, къапщытэж пIалъэм къриубыдэу промышленнэ IуэхущIапIэу щымытхэм хуащIа Iуэхутхьэбзэхэм я уасэм и процент 98,7-р, къэрал бюджет IуэхущIапIэхэм – процент 96,6-р, промышленнэ IуэхущIапIэхэм – процент 96,3-р, унагъуэхэм – процент 95,3-р, мэкъумэш IуэхущIапIэхэм – процент 95,1-р ятащ.
«Къэббалъкъэнерго»-м и IуэхутхьэбзэхэмкIэ щIыхуэ нэхъыбэ зытелъыр икIи зи Iуэхур хэплъэгъуэр республикэм и псэупIэ-коммунальнэ комплексым и IуэхущIапIэхэрщ. 2026 гъэм и щIышылэм – мэлыжьыхьым къриубыдэу абыхэм яхуэтар Iуэхутхьэбзэу хуащIам и процент 25,3-рщ. Апхуэдэ щытыкIэм къыхэкIыу я дебитор щIыхуэм хэхъуэ зэпытщ.
   
Субсидиехэр хуагъэкIуэж
Дызэрыт илъэсым зэрыщIидзэрэ Къэбэрдей-Балъкъэрым и унагъуэу 1700-м псэупIэ-коммунальнэ Iуэхутхьэбзэхэм щIата ахъшэм пэкIуэжу субсидиеу сом мелуан 26,4-рэ хуапшыныжащ. Ахъшэр къыхэкIащ щIыналъэ бюджетым.
Субсидиехэр унагъуэхэм хуагъэкIуэж псэупIэ-коммунальнэ Iуэхутхьэбзэхэм папщIэ щIыналъэм нэхъыбэ дыдэу щатын хуейуэ щагъэува ахъшэм нэхърэ ар щынэхъыбэм, псэупIэм и инагъыр, метр зэбгъузэнатIэкIэ къэбгъэлъагъуэмэ, щIыналъэ мардэм щыхуэкIуэм деж. Ауэ, ЖКХ-м и IуэхутхьэбзэхэмкIэ щIыхуэ зытелъхэм апхуэдэ гулъытэ хуащIыркъым.
Фигу къэдгъэкIыжынщи, псэупIэ-коммунальнэ Iуэхутхьэбзэхэм нэхъыбэ дыдэу цIыхухэм щIатыну ахъшэм и куэдагъыр зэрыхъун хуейр унагъуэм зэхэту къахэхъуэ ахъшэм и процент 15-рщ, пенсионерхэм я пенсэ ахъшэм и процент 12-рщ.
ЩЭУЕЙ Былэ.
  • 18 просмотров
Поделиться:

Читать также:

20.07.2026 - 14:47 → КъызэрыгуэкI ухуэныгъэкъым
20.07.2026 - 12:09 → ЦӀыхум и тыншыгъуэр къызэзыгъэпэщ
20.07.2026 - 12:07 → Сыт апхуэдиз уэшх къыщIешхыр?
20.07.2026 - 12:06 → Хыр ягъэкъэбзэжынут…
20.07.2026 - 12:04 → НОБЭ