Мазитху лэжьыгъэр

2026 гъэм и щIышылэм – накъыгъэм Къэбэрдей-Балъкъэрым и промышленнэ индексыр проценти 111,3-рэ хъуащ. Республикэм и экономикэ IэнатIэхэм къагъэлъэгъуа зэфIэкIхэр зэпэщхьэхуэу къатщтэмэ: щIыуэпс хъугъуэфIыгъуэхэр къыщIэхынымкIэ IэнатIэм – процент 96,9-рэ, продукцэхэр къыщIэзыгъэкIхэм, абыхэм елэжь IэнатIэхэм – проценти 109,7-рэ, электрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм - процент 118,1-рэ, псы яхуэзыутIыпщхэм, къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зэлъыIузыххэм - проценти 125,0-рэ къагъэлъэгъуащ.

Къапщытэж пIалъэм къриубыдэу нэкулъ лIэужьыгъуэхэм, гъэшым, крупам, маргариным, тхъуцIынэм, кхъуеймрэ кхъуейлъалъэмрэ, йогуртым, шхум, шатэм, Iусыпхъэм, IэфIыкIэм, нарзаныпсым, тепIэнщIэлъыным,  зэрылажьэ щыгъыным, кIэстумым, щэкIхэкIым, пыIэм, лъэпэдым, унэлъащIэм ирахьэлIэ цIыкIуфэкIум, гъущIым къыхэщIыкIа продукцэм, лэжьыгъэ Iэмэпсымэхэм, унэлъащIэм, медицинэ Iэмэпсымэхэм я куэдагъым хагъэхъуащ. Электрокъарурэ хуабэу къалэжьари нэхъыбэщ.

Апхуэдэу щыхъукIи, лым, пхъэщхьэмыщхьэ-хадэхэкI консервым, сэхуран дагъэм, хьэжыгъэм, псыIэфIым, пыченэм, вакъэм, картоным къыхэщIыкIа ашыкым, кислородым, пластмассэм, пластмассэм къыхэщIыкIа ашыкхэмрэ коробкэхэмрэ, пластмассэм къыхэщIыкIа бжэ-щхьэгъубжэм, абдж банкIхэм, абдж птулъкIэм, бетоным, асфальт-бетон зэхэщIам, чырбышым, кабель продукцэм, рентген аппаратхэм, автотранспортым ирахьэлIэ пкъыгъуэхэм кIэрыхуащ.

2026 гъэм и мазитхум къриубыдэу республикэм щаIэтащ псэупIэу 1244-рэ, абы щыщу унагъуэхэм – 1233-рэ. ФэтэрыщIэу псори зэхэту 2349-рэ яухуащ. ПсэупIэу псори зэхэту яIэтар метр зэбгъузэнатIэ мин 232,5-рэ хъуащ икIи нэгъабэ и апхуэдэ пIалъэм яхузэфIэкIам нэхърэ процент 20,0-кIэ нэхъ мащIэщ ар. Абы щыщу унагъуэхэм яухуащ метр зэбгъузэнатIэ мини 162,1-рэ е нэгъабэ и мазитхум щыIа бжыгъэхэм нэхърэ процент 37,5-кIэ нэхъ мащIэу. Фэтэр куэду зэхэт унэхэр зыщI ухуэныгъэ IуэхущIапIэхэм – метр зэбгъузэнатIэ мин 70,4-рэ. 2025 гъэм и щIышылэм – накъыгъэм яхузэфIэкIар метр зэбгъузэнатIэ мин 31,2-рэщ.

 Къуажэхэм щаухуащ псори зэхэту метр зэбгъузэнатIэ мини 111,1-рэ е нэгъабэ и апхуэдэ пIалъэм щыIа бжыгъэхэм нэхърэ процент 35,2-кIэ нэхъ мащIэ.

2026 гъэм и щIышылэм – накъыгъэм къриубыдэу Къэбэрдей-Балъкъэрым и мэкъумэш, фермер, уней IуэхущIапIэхэмрэ унагъуэхэмрэ зэхэту къалэжьащ мэкъумэш продукцэу сом мелард 14,8-рэ и уасэ е нэгъабэ и апхуэдэ пIалъэм щыIа бжыгъэхэм проценти 102,0-кIэ хуэкIуэу.

Республикэм и мэкъумэшыщIэхэм хьэцэпэцэмрэ хадэхэкI пасэмрэ ящIащ. Иджыпсту нартыху жылапхъэмрэ сэхуранымрэ хасэ.

Мэкъумэш, фермер, уней IуэхущIапIэхэм зэхэту гъатхасэм гектар мин 39,I-рэ ирагъэубыдащ. Нэгъабэ и апхуэдэ пIалъэм щыIа бжыгъэхэм нэхърэ процент 14,7-кIэ нэхъ мащIэщ ар. Абы щыщу гектар мини 7,5-р хьэцэпэцэмрэ джэш лIэужьыгъуэхэмрэ иратащ (нартыхур хэмыту). Нартыху жылапхъэм хухахащ гектар мин 16,6-рэ, сэхураным – гектар мини 4,2-рэ, хадхэкIхэм – гектар мини 4,5-рэ.

2026 гъэм мэкъуауэгъуэм и 1-м ирихьэлIэу, нэгъабэ и апхуэдэ пIалъэм елъытауэ, республикэм и мэкъумэш, фермер, уней IуэхущIапIэхэмрэ унагъуэхэмрэ зэхэту Iэщышхуэу яIыгъащ мин 272,4-рэ (нэгъабэ – мин 280,0-рэ), абы щыщу жэму мини 141,2-рэ (нэгъабэ – мини 144,0-рэ). Апхуэдэу щыхъукIи кхъуэ бжыгъэм зымащIэкIэ хэхъуащ – мини 2,0-рэ, мэлрэ бжэну яIыгъар мин 427,1-рэ хъуащ (нэгъабэ – мин 454,7-рэ), джэдкъазу - мелуани 4-рэ мин 718,5-рэ (нэгъабэ – мелуани 4-рэ мин 201,4-рэ).

Къапщытэж пIалъэм къриубыдэу республикэм Iэщышхуэу щаIыгъам и процент 72,4-р, абы щыщу жэмым и процент 67,8-р, кхъуэм и процент 99,2-р, мэлымрэ бжэнымрэ я процент 46,8-р, джэдкъазым и процент 39,3-р унагъуэхэм щызэрахуэ.

2026 гъэм и щIышылэм – накъыгъэм республикэм и мэкъумэш, фермер, уней IуэхущIапIэхэм зэхэту къалэжьащ лырэ джэдкъазылу (псэууэ шэчауэ) тонн мин 46,9-рэ е нэгъабэ и апхуэдэ пIалъэм яхузэфIэкIам нэхърэ процент 1,2-кIэ нэхъыбэ. Гъэшу къашащ тонн мини 194,3-рэ (проценти 2,9-кIэ нэхъыбэщ), джэдыкIэу кърахащ мелуан 85,8-рэ (проценти 2,3-кIэ нэхъыбэщ).

Къапщытэж пIалъэм къриубыдэу мэкъумэш IуэхущIапIэхэм зы жэмым хуэзэу килограмм 2775-рэ шэуэ къыщIашащ (нэгъабэ 2777-рэ), зы джэдым хуэзэу джэдыкIэу 83-рэ кърахащ (нэгъабэ 81-рэ).           

   ХЬЭЩЫКЪУЕЙ Олег.